إعـــــــلان

**am8** · 05-09-2009, 11:30 PM

المووهيمز... الابلة كانت تشوووف ع الي جنبي م اعرف ليش شكت فيها ..
صررررررخت .. : من عنــــــــــــدها موووبايل ف الصف ...
ومحد يرد ..
اقوووووووولكم من عندها .. والا والله بكسرلها راااااسها الحين تعترف ..
وانا اشووف عليها بنظرات بريئة .. واقوول ف نفسي (( ما انا ما انا ما انا )) وارتجف من الخوووف ..

قااالت انزين .. محد يعترف ... (رديت عليها داخليا هاعة ما اعترف ) ..
قالت حال وحدة من الشطار رووحي نادي الوكيــــــــلة ..
((وااااااااااااابووووووووووووووش كريستال بينادوووولج الوكيلة ... ))
احسنلج تعترفي .. بس والله ما اقدر بيصير لي واجد مشاكل .. .. بس ترا اذا ما اعترفتي .. بيصير لج مشاكل اكثر.. واااااااااااااي الحين شوو اسوي شوو اسوي ... ..ليش دووم كل شي ينقلب ضدي

المووهيم .. قمت من كرسيي .. ورحت عند الابلة واعطيتها المووبايل .. وصار وجهها علامات تعجب .. .يعني انتي الي عندج المووبايل .. اوكيه كريستالوو بتشووفي ..
قالتلي : كريستال هذي الحركات ممنووعة ف المدرسة واتوقع انتي عارفة هذا الشي .. وتعرفي انه احضار الهاتف الى المدرسة ممنووع منعا باتا .. وانه هذي السالفة بتوووصل لــ ابلة (....) وحدة تخصنا ف المدرسة ..

وانا ساااااااكتة .. ومستحيــــــــــة ومتفشـــــــلة وما عارفة ايش اقووول ولساني انربط هذيك اللحظة ..
قالتلي ع نهاية الدوام تعال اخذيه.. ..
اول ما خلصت الحصة .. ركيـــــــــــــــض اخبر ربيعتي بالي صار هي انتزقت .. قالت والحين ..
قلتلها والله ما اعرف سووري والله سووري ..
قالتلي ما عندنا حل غير نرووح نكلمها ..
ورحنــــا عندها .. قلتلها ابلة والله ما مالي وكذيه .. وخليت نفسيي المسكينة البريئة .. والدمووع في عيني .. .. وقالت انزين خلا عند الاخصائية نشووف هي ايش تقوول (( بدل لا نكحلها عميناها ))
حراااام الا الاخصائية (( للعلم اخصائيتنا واجد طيووبة كانت )) وبعد انا كنت رايحة عندها قبل عشان لعياني وضحكي وتعليقاتي ف الصف فما يصير ارووح مرة بتاخذ فكرة ما حلوة عني ..
وما خلتنا الا نرووح عندها ...
رحنا عند الاخصائية قشبتنا شوي .. وفتشت الفووون تفتيش .. وشافت الفيديو الي كان خاطري اشووفه ( بو معووورنه فواده)

المووهيم عدت السالفة .. ع خيـــر .. المدرسة الي تخصني ما وصلها خبر.. يعني اهلي ما بيعرفوو ..

اتذكر كنت ارجع معها .. يعني هي توصلنا بيتنا .. واتذكر ف السيارة خااااااااااااايفة تقوول شي عني السالفة وميساوي كانت تسوولف معها وانا سااااااااااكتة بس خايفة يصير شي..

رجعت البيت .. والحمدالله ما صار شي نمت العصر وكذيه ..
ولما صحيت .. اشووف ماماتي تتكلم ف الفووون ... واخووي الكبير يشووف علي ويضحك .. ياااااربي شوو صاير.. ليش يضحك علي

اسألهم شوو صاير .. واقوول ( يااااارب مايكوون الي ف بالي ) ( يارب اخر مرة اسويها بس لا انفضح قدام
امي )

××××××××××××××××××××××××××

**am8** · 05-09-2009, 11:31 PM

الموووهيم .. امي عرفت وقشبتني قشأأأأأأأأأأأأب .. بس انا كان عادي عندي قشاب امي .. بس مقهووورة من اخووي الي جالس يضحك علي من خاطره شوي وارووح عنده واكفخه

وكـــــــــــــذيه السااااااااااااااااالفة

وبنفس السنة .. رحت عند الاخصائية يمكن 3 مرات او اكثر ...(( مرة ناكل مكسرات ف الحصة ) ماخذين راحتنا واجد والسنوات الي بعدها تطوورنا ورحنا عند المديرة

((( لــــكن بعدني ما تبت ... وصرت اخذ فووني المدرسة هع هع .. لكن ع 2 و3 ثانوي .. صرنا كبار شوي .. وما انكشفت مرة ثانية لاني كنت حريصة واااجد انه محد يكشفني ))

العبـــــرة : اســــــتانسوو بحياتكم .. وسويولكم ذكريات ف الثانوية .. ترا الثانوية ما تنعاد ( بس بدوون فوونات ) وبدوون الادارة والاخصائيات ..خلووكم ف حالكم بدوون مشاكل ..
اهم شي have Fun ... مثلي

تشـــــــــــــــــــــــــااااااااااااااااااااااااو

وانتظـــــــــــــــــــــــــــروووووونــــــــــ ــــاااا غـــــــدااا

**am8** · 06-09-2009, 11:06 PM

الحلقـــــــــــــــــــــــ ّّ~ 12 ~ّ ـــــــــــــــــــــــــــــــــــة تاتيكـــــم

بعنـــــوااااااااان : اجــــــــــرك علــى اللـــــــــــه

كتبـــــــــــهااااااا لكـــــــــــم:

@ حامل المسك @
عضو نشيط جدا

السلام عليكم ورحمة الله وبركاته ...
طبعآ فكرة الموضوع رهيبة جدآ جدآ ..ف يشرفني جدآ أنزل قصة صارت لي ..طويلة بس تحملو شوي
الموضوع عن (( ))
قبل تقريبآ 4 سنوات ..يعنى كنت أنا صف عاشر .. وبتحديد قبل بدأ العام الدراسي بسبوع ..كان يوم الأربعاء ..
الساعة 3 ضهر أخذت مفتاح السيارة .. كانت مال حد من الأهل جديدة برقم الفحص ..وأنا طالع حصلت الوالدة قالت :وييييييييييين رايح ؟؟ قلت : أتمشى شوي في الحارة قالت : نزين أرجع بعد نصف ساعة أنتضرك توديني بيت خالتك .قلت : تمام نصف ساعة وبكون عندك أنتي تاااااااامري أمر .. ..طبعآ طلعت أنا أدور في الحارة وأدور ..حصلت سيارة واقفة ع الشارع وشكلة الأيطار منقش .. طبعآ قلت ما فيها كلام بنزل أساعدة أنا فاضي ما وراي شي .. وأنا أخف السرعة وأقترب من السيارة إلا هن حريم !! .. قلت فبالي مااااااا في بارض بينكسر ضهري .. السيارة مورانو وأنا وحدي وهن حريم يعنى ما يحتاج أشرح ...طبعآ قبل كنت على وشك أني أوقف ..بس أول ما ضغط ع الريس بعد ما غيرت قراري أنتبة !!! هن يضربن لي فول ليت .. فقلت ما شي فايدة شكلهن يعرفني أو يعرفن السيارة .. رجعت وقفت إلا نزلن طبعآ عمانيات .. قالن أنت أخت فلانه صح ؟؟ قلت أيوة .. قالن : بليز التاير منفش وأنت عارف الرجال قوامون ع لنساء ..قلت في بالي طبعآ (( تو عاااااااااد الرجال قوامون في التواير )) .. قلت : ما مشكلة أنتن ركبن السيارة .. طبعآ هن ركبن سيارتي وأنا رحت أبدل السبير .. عاااااااااااااااااد فور ويل ويالله أرفع التاير وأقلع النتات وجيب السبير تاير وبدل . بس أنا نسيت أنا أحد ينتضرني !!! لا وبعد نص ساعة وبكووووووووووون عندك أنتي أمري !!!لا و الغم التليفون مالي في سيارة الحريم وأنا ما فكرت فيه أبد .. كل تفكيري في ذا التايرالبغيض ..
بعد مرور 45 دقيقة الوالدة تنتضر قدووووووووووم أبنها المغوووووووووووووار .. أنا طبعآ ... مسكت جوالها وقامت تتصل بي .. أنا ما مسجل رقم الوالدة قي سجل الأسماء لأسباب أمنية .. أتصلت مرة ..مرتين ..ثلاث محد يرد .. راحت البلكونة وقامت تطالع السياراة البيت شافت معظمهن موجودات ما عدا السيارة إلي شالنها و طبعآ سيارة الوالد إلي كان في الدوام ..راحت بسرعة لأختي وقالت لها : ووووووين أخوك(( طبعآ كانت نايمه )) قالت : مادري عنه أذكرة أخذ سيارتي وطلع .. مسكت أختي جوالها وتصلت بي .. وهنا يكمل سر المشكلة .. أنا كاتب في الجوال my first sister ..البنات شافن الجوال يرن والرقم مالوف ..هن قالن هي أخته ربيعتنا بنرد عليها .. لما مسكن بيردن عليها .. إلا أختي تعطي التليفون للوالدة .. طبعآ الوالدة ما تعرفهن .. أول ما قالت السلام عليكم .. جاوبتها وحده منهن وعليكم السلام .. قالت الوالدة عفوآ شكلنا ضربنا الرقم بلغلط .. طبعآ طبعآ الوالدة قشبت أختي .. من ها الرقم إلي عطيتيني إياه .. قالت هذا رقمه ومتأكدة .. طبعآ حاولن يتصلن بي مرة ثانية .. لكن البنات ما ردن أستغربن من المكالمة الأولى وتوقعن ما أهو رقم ربيعتهن ..يعنى ما وضحن الموقف أبدآ أبدآ .. فكرن يتصلن بأختي بس قالن : بتقول لنا جلسن وغيرة وحن نريد نروح مستعجلين بنتصل فيها وحن مروحات ..
طبعآ الوالدة بدأت يدووووووور في رأسها الأفكار .. من ذلاك ؟؟وليش ؟؟وكيف ؟؟وأنا ما أصدق في ولدي ؟؟وغيرة من الأفكار .. لا تستغربو هم حاطين فينا ثقة كبيييييييرة جدآ ..
طبعآ أنا خلصت بعد عنا طويل جدآ .. أول ما ركبت السيارة إلا أشوف 11 كالمة لم يتم الرد عليها !!!! بسم الله الرحمن الرحيم .. طبعآ بديت برقم الوالدة .. ألو أنا تو جاي .. شو أنت تو جاي ؟؟ قبل تعال من كان عندك ؟؟ و..و..و.. طبعآ كان تحقيق من الخاطر وقشب محترم يعنى بدرجة ..وأنا ماقدرت أتكلم كلمة وحدة ..شو أقول السالفة طويلة ..بعدين الوالدة معصبة ..يعنى فيها فيها ..ما شي أمل ولا حنان ..طبعآ قاتلي تعال بسرعة وتو ..
جلست أفكر وأفكر شو دراى الوالدة أصلآ ؟؟.. أنتبة في مكالمة تم الرد عليها و الوقت قصير .. فهمت الموضوع وقلت ووووووووووووووووواغيابك ..شو بقول ؟؟ قلت ما شي حل إلا أتصل بالوالد .. الوالد كان عنده أجتماع .. لما خلص كلمة وفهمته الموضوع من ط ط إلي سلام عليكم .. الوالد كان يثق فني واجد ..فقال لي : ولا يهمك أنا ما شي البيت وأنت بعد ساعة كذا تعال البيت .. الطريق من الدوام إلي البيت بعيد شوي ..
طبعآ الوالد راح البيت وخلص الموضوع .. بس أنا في ذيك الساعة جلست أفكر وأفكر .. أقول في بالي :شوف والله أنا ما سويت شي ..وشوف إلي أستوى لي .. صدق الربع يوم يقولو لا تسوي خير لحد في ذا الزمان أذ ما جاك شر منه قول الحمد الله ..يعنى لا تترجى خير من أحد .. يعنى أنا لوووووووووووووووو مكمل طريقي كان ما بيستوي شي بس شو أقول ..((يا من شراله من حلاله علة ))..

أما العبرة فبقولها من خلال القصة مع جدي ..
كنا في المجلس وجدي كان عندة ضيوف كالعادة .. لما روحوا كنت جالس أخبر خالي ..طبعآ قام يتمصخر علي ....وأنا أكمل في الشرح ..إلا جدي يسألني شو السالفة ؟؟ جلست جنبة وخبرتة .. قال :بالعكس ولدي أنت ينرفع بك الراس وهذا درس ليك .. شفت كيف الله يحبك.. بعدين لما تسوي شي خله لوجة الله ما مهم شو بيحصل بعدين .. يعنى أنت مثاب عند الله مهما حصل..قلت : مثاب صح بس شوف إلي جاني!!قال : ياولدي أنت لي سويته صح بعدين (( الله في عون العبد ما دام العبد في عون أخية )) .. قالي شفت كيف ضهرت الحقيقة وفي لمح البصر لانك أنت ما غلط في شي .. أنا ستغليت هذي الفرصة .. إلا أقول : يعتى جدي ما أسمع كلام خالي أهو يقوووول : غيب هذا إلا يسوي خير ذا الزمان .. عصب جدي وقشب خالي وهو يقول : خلك من ذا الدمير .. طبعآ شبت حرب بعدين ..

اشكـــركم جميــعااا ع المتــااابعه الطيبــه واتمنـــــــى من الي حـــــاااب ان تنـزل قصــته بكــرا يرســلي ايــاااهاا ع الخـــااص باســرع وقت ممكـــــــــن ...

**am8** · 07-09-2009, 08:23 PM

مرحـــــــــــــــــــــــــــــــباااا جمـــــــــــــــــــــــــيعااا

حلقـــــــــــــــــــــــــــة اليــووووم بسيـــــــــطه .. بس مميــــــزة بكــــــــاااااااتبهااا
عضـــــــــــووو مميــــــــــــــــز ... تمــــــــــيز برووووووحه المــــــرحه ف المنـتـــــــدى ومــوااضيعه الاروووووووووع
ترك بصمـــــــــــــه كبيــــــــــره والدليل ان امــــــــــوووته النســــــااايه ما نســته ابـــد

اليــــــــــــــــــوووم رجعلـــــــــــــنا بحقـــــــــــــله كيــــــــــــووووت

ارتـــــــــــــــــككم الان مع الحلقــــــــــــــــــــ !! 13 !! ـــــــــــــــــــــــــــة
بعنـــــــــــــوااااااان : بنـــــــــــــااات النـــــــــاااس م لعبـــــــــــه
كتبــــــــــهااا لكــــــــــم :

omarion
مشرف قسم الترويح والترفيه

اويا مامبوووووووز جميعا
اول شي اشكر اختي am8 ع المسلسل الحلو هذا والحين بقولكم ستوري مالي اهم شي يعجبكم اورايت
ونقبل التهاني فالخاص لووول امزح
المهم
"كان يا مكان في قديم الزمان مال قبل يومين ولا 3 ما اتذكر كنت ماشي انا وصاحبي نشوف الطبيعه الخلابه ف الحديقه اللي اهي حديقة القرم الطبيعيه ونحن مارين كذا وهو وانا نضرب ستوريز وسوالف وضحك وحماااس يعني مره ربشه وحالتنا حاله < لول اصلا كنا ف بروموشين دوام بس ضربنا شرده خخ
المهم إلا ونشوف قدامنا بنت حبوبه كذا صغيره يعني مال نفس عمرنا مال 17 سنه كذا اهم شي وواحد يلحقها تو بالأول عبالنا اخوها ولا شي كذا وشوي ونشوف البنت تجي عند الناس يعني قريب الناس وكذا وهو يكلمها كذا وهي ما ترد عليه ونحن ما فاهمنا <فاهميت> < علشان am8 تفهم :p > السالفه اهم شي إلا ونشوف شوي كذا راحت وهو بعد وراها قلنا نروح نشوف مو يصير ترى ما شي طبيعي هذا إلا شوي ف مكان ماحد كنه يريد يقترب منها وهي ركضت وعاد شوي نستعرض عضلاتنا انا وصديقي قررنا نروح نكلمه هذاك وشويه دقيناه كم علامه فالفيس علشان يتأدب مره خخ
لول شوي ف الستوري فيه املاح علشان يحلى الستوري شويه ما واجد ترى

المهم اللي استفدت من القصه هاذي
انه ما نخلي البنات يروحوا لأماكن عامه + نعلمهم اشغال المطبخ علشان ما يطلعوا برا البيت لول امزح
اللي تعلمته انه البنت لازم تشوف نفسها وأي شي يصير لازم البنت تعرف تتصرف من اول لحظه ورمضانكم مبارك
اهم شي النيه وتوتاونانا ف اقرب وقت

وانتظـــــــــــــــــرووونااا ســووون

**am8** · 09-09-2009, 01:59 AM

متــــــــــاااااااااابعينـــــــااا الكـــــــــرااام
اليكـــــــم الحلقــــــــ ^^ 14 ^^ــــــــــــة
بعنـــواانيـــهااا: من اعتمــد عـلى غيره قل خــيره
كمـــــاا تـدين تُــدااان

كتبـــهااا لكــــم :

]:[دلــوع الفريــج]:[
~*¤§VIP Member§¤*~

أخيرا رجعت أكتب في التسلية بعد غياب طويل

المهم

قصتي يا جماعة الخير تتلخص في جزئين

(الجزء الاول بعنوان من اعتمد على غيره قل خيره والجزء الثاني كما تدين تدان)

تمهيد

تدور احداث القصة في إحدى مؤسسات التعليم العالي الخاصة و بتخصص هندسي.

الجزء الاول

(من أعتمد على غيره قل خيره)

بعد مكده خلال السنوات الاولى من الدراسة جينا الحين على السنة الاخيرة. القصة تبدأ من اليوم اللي تعين فيه صديقي كرئيس للسنة اللي احنا فيها وانا تم اختياري كنائب رئيس وفوضني الرئيس اني اتكلم مع الشباب في الكلاس قبل ما تبدا الدراسة الفعليه .

أذكر وقتها أني وقفت وكلمت الشباب بدون مقدمات انه لازم نتعاون خصوصا انها أخر سنة وعددنا ما يتجاوز 22 طالب فحرام يرسب احد فينا الكل لازم ينجح بس لازم نساعد بعضنا البعض في حل المشاريع لانها بتكون طويله المهم بعد البيت الشعبي اللي سويته انبسطت لاني شفت الشباب كلهم وافقوا.

بدت السنة وبدأ الحسد يعطي مفعوله (عمانيييين) وبدت تتكون احزاب سريه المهم كل ما عطونا مشروع ونسأل الشباب عن حل احد الاسئلة يقولوا

ما نعرف

ما متأكدين

نسيت الاوراق في البيت

اجوبتي غلط وهن صح

وبعض الناس تأخذ أوراق تساعدهم على حل المشاريع من عند المدرس ويوعدوه انهم بيوزعوها على الطلبة كلهم وفي النهاية (يضربونا طاف وإحنا خبر خير) .

واستمرينا على هالحاله والنتيجة قمنا نشتغل على المشاريع لمدة 14 ساعة باليوم عشان نخلصهن بس لو كنا متعاونين ما راح نأخذ 5 ساعات باليوم.

بعض الشباب الله يهديهم ما نشوفهم بالايام ويجيك قبل التسليم بساعات ويقولك عطيني الحل واذا سويت مثل ما سوا الجماعة وصرت حاسد يجلسوا يتكلمو عليك من وراك ووووووو (بس على مين).

كملنا على هذه الحالة لين خلص الفصل الاول

والنتيجة أنقسم الصف إلى ثلاث أحزاب (حزب اليمين وحزب اليسار والحزب الديمقراطي المحايد)
حزب اليمين يطالب بالمساعدة في حل المشاريع
وحزب اليسار حزب المتمسكنين الشلخ عندهم ببيسه يأخذوا الحلول وما يساعدوا.
والحزب الديمقراطي المحايد ممكن نطلق عليه حزب أليف لا يهش ولا ينش.

وعرفت بالفعل ان سالفة التعاون عند الطلبة ما تنفع البر ومثل ما يقول المثل من اعتمد على غيره قل خيره

المهم انا سكت على المهزله اللي صارت وما كلمت حد

**am8** · 09-09-2009, 02:00 AM

الجزء الثاني

(كما تدين تدان)

في شهر 4 شفت المدرس بالممر قالي فلان هذه المشاريع خذها ووزعها على الطلبة قلت له حاضر

اخذت الاوراق ووزعتها للطلبة وبدت الاصوات ترتفع انه لازم نتعاون خصوصا انه الحين نحن مزحومين كثير بالمشاريع وما راح نقدر نخلص (في نفسي تو الناس)

هذا المشروع (متعلق بمادة البزنس)

كان مطلوب منا في المشروع الاخير انه نعمل دراسة على ثلاث مشاريع اقتصادية ونختار افضل واحد فيهم ونعمل خطة لتحفيز المشاريع الخاسرة وابصراحه هذه المادة من احسن المواد إلى قلبي.

هذه المادة كنا ندرسها في الاسبوع مرة واحدة من الساعة 2 -4 العصر

فصرت كل ما يجي وقت المحاظرة اقول للشباب ايش الفايدة انكم تحضروا وانتوا مشغولين بالمشاريع

يردوا علي بأنه الاستاذ وعدهم انه راح يساعدهم بالحل.

وارد عليهم من متى تو انا جاي من عنده وقال ما راح يساعد حد بو باغي ينجح ينجح واللي ما باغي يغيب

عاد لاني نائب الرئيس كلهم يصدقوا الكلام ويطلعوا واستمر الحال لمدة شهر بنفس المنوال.

اخر شيء جاني استدعاء من رئيس القسم وشكله احد منهم بلغ علي

رئيس القسم: ليش تحرض الشباب انهم ما يحظروا المحاظرة

أنا: أنا

رئيس القسم: لا انا

أنا: مستر طول مدة دراستي في الكلية وانا أمشي بالسليم ما حرضت حد

رئيس القسم: انزين وانت ليش ما تداوم وما تحضر المحاظرة

أنا: انا احضر بس يوم ما احصل حد مو تبغاني اسوي اكيد بطلع

قلتله اسمعني انا من يوم ما بديت ادرس هنا غلطت في حاجة قالي لا قلت له انزين كيف تصدق هذا الكلام

الرجال اقتنع وقالي روح ما مقصر فيه (أريقه واغديه حنك) كيف ما يكون عسل معاي

أخر اسبوع قبل تسليم المشروع قالوا الشباب فلان ترى ما اشتغلنا على المشروع كيف نسوي قلت لهم لا تحاتوا انا بحل المشروع وبعطيكم نسخة منه فرحوا الشباب وما شفتهم غير يوم التسليم اللي كان يوم السبت.

جينا على يوم السبت والتسليم في كليتنا لازم ما يكون بعد الساعة 4 العصر بس احنا من يوم دخلنا الكلية كنا نسلم الساعة 4 العصر سواء مخلص او لا .

اللي صار اني جيت يوم السبت وسلمت مشروعي الساعة 7 الصباح قبل لا يجيوا الشباب. رميت المشروع بصندوق المشاريع وطلعت اشتريت شاي وجلست قدام قسمنا اتشوف على اللي الجاي ورايح. دقائق والشباب وصلوا وكل واحد كاشخ بابتسامه شبرين ونص.

الشباب: كيف بو الشباب خلصت المشروع؟

أنا: من زمااااااااااااااااااااااااااااااااااااااان

الشباب: انزين عطنا النسخة عشان نخلص امورنا

أنا: أي نسخة ما شيء غير النسخة الاصلية ورميتها بالصندوق

الشباب: أيش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أنا: مالكم متنزقين مو تبغوله المشروع كله مسجل في ذا الرأس طلعوا اوراقكم وانا بساعدكم

الشباب: تمام نلتقي بالمكتبة

المهم ساعدت الشباب وعطيتهم نفس الاجوبة يلي كنت كاتبنهم في مشروعي

وبعد اسبوعين شفت المحاظر في الممر وقالي فلان ترى بكره عندكم فايفا (يعني بريزنتيشن)
قلت له ليش؟ قالي شفت معظم الاجوبه متشابهه والواضح انهم منقولين من عند شخص واحد (اسميها الخطة نجحت).

اليوم الثاني

انا والشباب جالسين في الكلاس دخل المحاظر وعلى طول عينه علي قالي فلان تعال عشان تسوي (فايفا) رحت له قالي فلان اسمع انا اعرف ان كل الاجوبه منقوله من عندك لانك انت الوحيد اللي جلست تجي عندي وتناقشني في كل نقطة وكل ما خلصت من سؤال تجي وتوريني الجواب.

قلت له ايوه الكلام صحيح. قالي انزين انا بعذركم لانكم مضغوطين كثير بس لازم انقاش الشباب في الاجوبة اللي سلموها على الاقل لما تنقل حاجة تكون فاهم اللي كتبته قلت له اكيد الحين بنادي على الشباب واحد واحد.

ناقش الاستاذ الطلبة وللاسف كلهم فشلوا ولا سؤال عرفوا يجاوبوا ما عدا اثنين واللي هم ربعي مخبرنهم كيف تكون المناقشة

والنتيجة

جبت

A

وربعي

B

وبقية الشباب

C & D

في قلبي اقول دوروووووووه بو يساعدكم مرة ثانية

وانتظــــــــرووونا tomorrow

**am8** · 11-09-2009, 12:56 AM

بــداية اعتــذر عن تاجيل حلقــة الامـس لليــوم.. بسبب ظـــرووف فنــية خارجه عن ارادتي
اقـــــــــــــدم لكـــــــــــم الحلقــــــــــــ '.' 15 '.' ــــــــــــــــــــــــــة

العنـــــــوااان: يصــــاارعـون جبــال الخطـــووب
كتبتــــــــهاااا لكم:

الفراشة البيضاء
~*¤§ عضو شرف §¤*~

الســـــــــــــــلامو عليكمو جميعو

تلبية لدعوة عمو فرفينة -عمو فرفينة يوم يدخل يخمس يبدي بذي الايقونة تقريبا هع هع - للمشاركة في موضوع خالوه زموتة ..جئت أثااااااارك .. ايوا أثاااااااارك ..

تعالوا نبدي

بثم الله قصدي بسم الله :

مرام وفادي وشادي أخوة مصابون بالسكلر(مو اسمائهم الحقيقة طبعا) وراح يكون ان شاء الله موضوعي عنهم

مرام فرحاانة واجد ..باكر عرس بنت عمها ...مرام : هذه راح البسها حال الليل وهذه حال الصباحية و .....
.
لكن شاء القدر أن تنوم مرام فجر اليوم التالي في المستشفى .. لذلك لم تحضر العرس!! وبقيت في المستشفى لما بعد ايام من
انتهاء العرس..يعني م حضرت ولااااااااااااااااا شيء...

مرام.و فادي و شادي بالمدرسة يشاركهم المعلمون في الإذاعات المدرسية وكما نعلم يجهزوا حال الإذاعة ويدربوا قبل اليوم
المحدد للاذاعة... ولكن في اليوم الموعود ..يحدث مالم يكن بالحسبان ..فيدخلوا إلى المستشفى للألم الذي يباغتهم دون سابق
انذار!!لذلك يضطروا إلى الغاء الاذاعة ف ذاك اليوم- خاصة أنهم يطلب منهم قراءة المقدمة أحيانا وأخص بالذكر هنا مرام-
ويسوا بدل الاذاعة اللي مرتبينها اشياء بسيطة ...عشاااااان كذا هم الحين ما يشاركوا وااااااااااجد في الاذاعات عشان م
يضيعوا ع زملائه!!

هم بعد كان عيد ميلاد بنت خالهم والعيلة كلها مجتمعة عشان يحتفلوا بس استوى انه قبل فترة من الحفلة تمرضت مرام
أو شادي (م اذكر زين) وم حضروا الحفلة!!!!!!!!!!!

موااااااااااااااااقف كثييييييييييييرة لا يسعفني الوقت لذكرها ..وم ذكرت هالمواقف عشان استثير شفقتكم تجاههم

الــــــــــحــــيـــــــــــــن

تعااااااااالوا معاي وشوفوا كيف لما يكونوا بصحتهم – ما شااااء الله عليهم الله يحفظهم-

مرام فتاة مجتهدة بمعنى الكلمة – ما شاء الله عليها- ..طبعا بسبب مرضها تروح عليها حصص كثييييييرة وم تحضرها
فتضطر أنها تآخذ دفاتر صديقتها ..وهي ما تحب تنسخ دفاتر – عاد مدري ليش ! - فتشتغل بكتابة الدروس وكذا أشياء
وطبعا أمها وأخوانها لما يكونوا بخير م يقصروا معاها.....ولما يروحوا لبيت جدهم أيام المدرسة (يوم الخميس) تشل معاها
حاجة تخلصها واذا عندها اختراب (أقصد اختبار) مرات م تروح عند جدها . .وتعتمد ع نفسها ف أغلب الأحيان..

فادي ولد والنعم فيه يعجبني فيه بصراحة اجتهاده (وأشياء 2 سرية ما بخبركم) وهالموقف شاهد ع ذلك :
فادي يسقى دم شهريا ..السنة الماضية كان عنده امتحانات نهاية العام وطبعا عطوهم اجازة مدتها اسبوع قبل الامتحان ..هو
قال ما بروح يسقوني لاني ما بقدر اذاكر ويجيني دوار وكذا أشياء بخليها لحد م يخلصن الامتحانات ( لانه حريص ع أنه
يجيب درجات عالية وحتى يجيني مرات أشرح له دروس ) ..لكن طبعا تكسر كريات الدم الحمراء لشكل منجلي ..يعيق كما
نعلم وصول الدم لبعض الأجزاء ومنها الاطراف ..تمرض في ذك الفترة وم امتحن غير امتحان واحد تقريبا ونوموه ف
المستشفى فتررررررة وجلس فتررررة بعدها في البيت ع السرير..(بيني وبينكم والله كاااااانت الحااااااالة م تحتمل لما تشوفه
ع السرير عاجز عن الحركة والألم يلم به من كل صوب )

لكثرت ترددهم على المستشفى وأمهم تكون مقيمة مع المريض منهم .. تعودوا منذ صغرهم على الاعتماد على أنفسهم في
جوااااانب كثيرة في حياتهم ويساعدوا بعضهم البعض ...

هناك أكثر من كذا ..لكنه الحين م يحضرني

نجي ع آخر جزئية بالموضوع :

بداية هلا أولاد اختي ... وبيني وبينكم ابصررررراحة اغبطهم ع قوة الصبر اللي منحهم الله إياها و تعلمت منهم أشيااااء
كثيييييرة.
عاد نصيحة مني : من الواقع والمنظر اللي يشوفه الواحد قدامه ..اقووووول أي شخص مقبل على الزواج يجري
فحص قبل الزواج خاااااصة اذا كانت العيلة عندهم مرض وراثي ..صح هي نسبة قليلة جدا اللي تتوفق بينهم ويتم الزواج
بس حلو الإنسان يآخذ بالأسباب و هالشيء لمصلحتهم مستقبلا أما ما اعتقد حد يريد يشوف ابناءه يعتصروا قدامه من الالم
..عاد اذا ما يبا وغلبت ع تفكيره الامور الثانية – الامور الثانية هع هع بو وصله قصدي وصله م خصني– فيتحمل عاقبة
الامر.

وبما أني نزلت هالموضوع فبغيت أذكركم أن: مرة الأخت سماء نزلت موضوع عن بنك الدم بمستشفى جامعة السلطان
قابوس وحاجته الملحة للتبرع بالدم..فاللي قادر لييييييييييييييييييييييييييش ما يساعد؟؟!! ..معاااااااااناة صراحة يلاقيها
المحتاجون للدم! (هذا الشيء استشفيته من الواقع) ..فرجاااااااااااااااااااااااااااااااء ً القادر ع التبرع لا يبخل ولو
بقطرررررررررررررررررة من دمه . تراها الدنيا دوارة ..يعني لا تفرح بعمرك واجد...اليوم لك هالنعمة وبكرة يمكن
لا ..(اذا كنت ذا نعمة فارعها ).وهالشيء اشوفه نوع من الاهتمام بما منّ الله به عليك.

أخيرا أقول : اعذروني أطلت عليكم وأشكر كل من قرأ موضوعي ... وتعجز الكلمات عن التعبير لتشكر كل من قرأ
الموضوع واستفاد منه وراح يطبقه في حياته الشخصية.
لا تنسونا من صالح دعائكم ..
الإمضاء: الفـــــــــــــــراشـــــــــــــــة البيــــــــــــــــــــــــــضاء

لقــــــــــااائنـا يتجــــــدد

**mysteriousgirl** · 19-09-2009, 11:30 PM

السلام عليـكم و رحمة الله و بركآته ..
/
تسلم عليكم أمووتة ... و هذي الحلقة الأخيرة من المسلسل الرمضآني
- يوم من حيآتي -
طبعاً موقف صآير مع أموتة حبت تشارككم بيه .. !!

ما أطول عليــكم

بارت 1

\

يوم الاربــعاء .. ف بدايه شهـــــ 6 ـــــر...
ع الســـــــــــــاااعه 10 وشــووي دخلت انــــااام .. وجت معاي بنت اختــي ( توها ف سن المـراااهقه ) >>> الموقف الي صار م المفـروض يصير قدامها
واذا بتلفـــــــــووني العزيز يرن
ف البدايه فكــرت انه مسكـــووول طـــووويل ... بس بعد ثواني استـوعبت انه اتــصال
اخذت التلـــفووون .. وكـــــــــااان الرقم غريب
احـــــــــترت ارد او لا؟؟
بس انــــــــااا من النــووع الي ارد ع كـــل المكـــــــــاالمــــــااات كــثر ما تعـودت استــلم مكــاالمــااات من ناس اعرفه بس بارقـــام غريبه.
ف رديت ع الاتــصال..
امـــــووته : الســـلام عليكم
المتــصل: وعليكم الســـــــــــــلااااااام ورحمة الله وبـركــااته >>> يمد كلامه بعد
امـــووته: ......... ( بانتــظـاار المتحدث)
المتــصل: كــيفج؟؟
امـــــــوووته: بخــــــير الحمدللــه
المتـــــــصل: ويــش علــووومك؟؟
امــــــووته : الحمــدللـــــــه .. عفــــــوا من معــي؟؟
المتـــــــصل: ويــــــش مــسوويه؟؟ وكيــف الاجــــــاازة معـــاااك؟؟
امـــــــوووته: عفــــــــوا من معــــــــــي؟؟
المتـــصل: ممممممم وليــش تريدي تعـرفي؟؟
امـــــــــوووته: مو ليش اريد اعرف؟؟ اذا ما تريد تقـولي انت ف ليش متصــل؟؟
المتـصل: لا تحــــاااتي .. انـــاا بخبـــــــــرك بكـــل شي
امــــــــــوووته: تفـــضل
المتـــــــــصل: انتي امــــــــــووته صح؟؟ تدرسي ف كلــيه ..... صح؟
امــــــــوووته: من انـت؟؟ وويش تريد؟؟
المتــــــصل: ممممم .. بصــراحه ما اعرف ويش اقـــوول
امـــــــوووته: اذا ما تعرف تتكــلم ليش متصــل؟؟ . اسمحلي بسكــر التلفـــووون
المتـــــــــصل : لااااا .. بخبــرك كل شي بس بعــدين .. ما الحين
امــــــــوووته: مافي بعـــــدين.. تتكلم الحـين او اسكــــر ف وجهك؟؟
المتــصل يستمــــــــــر في حديثه السخــيف ف محــــاااولة اللعــب بعقــل امــــــــــــوووته واخـــــــــــيرا قــال : انا بصــراحه معجــب فيك.. واريد اتعرف عليك
امـــــــــــوووته : >>> عاد ما وقـــــاحه ( قلتها ف قلـبي ) ..
انت شــاايف بنــات النــاس لعبـه؟ ما عندك اخــواات تخــاف عليهم؟؟
المتــــــــصل: لا انــا ما عنـدي اخـــــواات... بعدين انــاا اعرف انك بنت عيــله ونــااس واكــــااابر .. بس انا والله متعــلق فيك وااااااجد و...الخ
امـــــــــوووته: (بكــل كبــريـااء) واذا انت عارف اني بنت عيله وناس ليش تضـيع وقتك معاي؟؟ وانت عارف انك ما بتستفــيد؟؟
المتـــــصل: لا ان شاء الله م بيصـير بينـا غير كـل خـير ...>>> واخذ الاخ راحته يريد يسـولف
امــــــــــوووته: من وين جبت رقمــي؟؟
المتـــــــــصل: في محــــــــــااولات مستمـره للتهــرب من الاجـــــــابه بس ف الاخـير قال: من حد من الكليــه .. طلبت حد الشباب وجابلي ايــااه >>> هذا بعد ما تعب يكــذب ويلف ويدوور .. مره يقـول من بنت ومره من ولد .ز ومره ولد جابه من بنت و....الخ

واستمـــــــــــــر الحديث لفتــره من الزمــــــــن ..
وبعد عده اسئله وضرابات ومقـــااشبــــــااات من هنــــــــااا هنــــــــاااك وقت الاتصــال .. وبعدها ف المسجات قال: انـــاا جيت مره زيــااره لكليتكم .. وشفتك من بعـــــيد.. واعجبت فيك .. ف طلبت من واحد من الشباب يجيبلي رقمـــك
حسب المعــلومات الي قالها المتــصل ( معلومــاات متنــااقضه اثبتتلي انه كـذاب ):

* اخـذ رقمـي من احد الشباب ف الـفاونديشن >>> اصلا زمــلائي ف التخــصص ما عندهم رقمـــــــــي عاد بروح اعطيه لشــباااب الفـاونديشن؟؟

* الشـــــــــاااب جــاابه حصله من بنـــاات الفــــااونديشن >>> اصلا م عطيت رقمـي الا لبنتيــن فقط من الفــااونديشن.. والبنتين ثقه 100%

* هـــــــوو ما يعرف الشـــــــاااب لانهم اول مره يلتقـوا ف الكليه >>> عيل حد يروح يطلب رقم بنت من ولد ما يعرفه؟؟

* الشــــــااب عطــــاه رقمــي بمــقاابل >>> ما رضى يقـول ويش هـــوو.

* هـــــــوو شــــــااافني من بعيـــد واعجب فيني >>> يعطـــــــيييييييييك الحب من اوووول شــــــوووفه .... بصراحه حسيته غبي لما قال هالكلمه

* قضــى 3 اشهــــــــر وهو يدور ع رقـــمي هذا ف المسج .. وف الاتصــال قال شهــرين
* ف واحد من مسجــاته قال " ما رح اخــليك الا بعد ما تحــسي ولو بذره من الي احس فيه " >>>> قـــــــــووويه بـــــــووووب .. بعدين بالعـقل .. مو الفايده ابادلك نفس مشاعرك الكـذابه وانت ف الاخير ناوي تتركني ؟؟ ... اهــبل والله العظيم

* وغــــــــــــــيرهااا من الكــذبااات المتنــــــــااقضه والي حتى م تدخل الراس

بختـــــــــــصر الســالفه شـــووي

الولد استمـر يرسل مسجـــــــااات ممــلوووءه بعبــاارات الحب والغزل .. رسل يمكن 3 مسجـــــــااات بالليــل .. واليوم الثاني الصبــــــاااح رسل .. وانــــــااا خــــــــــبر خــــــــــــــير
اذا الناس الي اعرفهم واحبهم ما افضـــــى اعبرهم.ز عاد بعبر واحد كـذا؟؟
no0o0o0o0oway

xxxxxxxxxxxxxx

الخمــــــــــــيس باللــيل وف حدود السـاعه 10 او 11 ... وكالعــاده اموووووته متخدره تعب .. وتريد تنـــــااام .. وصادف ان هــذاك اليـووم my mood was off يعني متكـــــــــربه من الخــااطـــــــــــر
ف اوووول ما رن تلفــوني رديت بدوون ما اشـوف الرقم .. وانصدمت انه الصوت نفــسه
امــــــــــووته بكـــــل عصبيه: خــــــــــــير؟؟
المتــــــــــصل: كيفــك؟؟
امــــــــــــووته: تعرف تقـول انت من ويش تريد؟؟ خلصني ما فاضيه؟؟
المتــــــصل : يحــااول يسحب اموته بالكــلام
امــــــــــــوووته: اسمعنــــــي انت.. اعرف انك كــذاب وتريد تلعب وانا ما فاضيــه
المتــصل يقــــااطعني : والله قصـدي شريف ما اريد العب .. واصلا انتي من اســلووبك امـس اثبتيلي انك بنت عيــله ونـــــــاااس .. وانك شخــصيتك قــوويه و...الخ من المدح >>> ياربي كل الاولاد قصدهم شريف وما يلعبــوواا؟
امــــــــوووته تقـــااطع المتــصل : اسمــع .. والله العظــــــيم اذا جــاني منك اي اتــصال ... او مسج ف ما بتـلوم الا نفــسك
المتـــصل بكل بطـره : انا ما يعجبني حد يهددني .. مو بتـسوي؟؟
امـــــــــوووته : مـــــــراكز الشــرطه فـاايشه ف عمــــــــــااان
المتــصل يتظـــــاااهر انه co0o0o0ol
بعد التهديد والوعيــد .. ينقطع الاتصــال بانتهــــااء رصيد المتـصل .. ف رسلي مسج.. " اروح اعبي رصيد وارجع اتصل فيج "
كـالعــــــــــــــــــاااده : ضربته طـــــــــــــــااااف وما رديت .. ف ما اتــصل

xxxxxxxxxxxxxx

**mysteriousgirl** · 19-09-2009, 11:35 PM

- بارت 2-
\

يوم الجمــــــــــــــعه ... 3 محـــــــــــااولات اتــصال من السيد .. وانا ما ارد عليهم
تعب ورسل مسج " اريد اتصل فيج وبليــز جـــــااوبي واوعدج يكون اخــر اتــصال "
امـــــــــوووته: دووووووووكم ع باله الا فااضيه؟؟ ... رووح عني دب واحد

وبالليــــــــل تجهـــــزت ورحت عرس مع الوالده ... اتصل وانا ف العرس .. ف رديت ع الاتـصال وقلت له عطني ثواني اطلع من القــاعه
الولد حاول يسـوي نفــسه محتـــــــرم وقال : مبـــــــاارك عليكم .. عقبالك! من تــزوج؟؟ >>> ف الاخـــير يطــلع العــريس يخــصه

وانا بكل وقـــــــاااحه : خير ويش بغيت؟؟
المتــصل: انا بس بغيت اقــووولك اني اسحب الطلب الي طلبتك ايـــاااه ( قصده انه خلاص راح الاعجـاب وانه م يريد يتعرف علي) ... لان انــاا مر علي كــــــــــل طـــــــبش والبنـــااات .. ولا وحده عامــلتني بالطـريقه الي انتي عاملتيني فيـــهاا .. انتي اهنتي كــــــراامتي وجــرحتي مشـــاااعري >>> يــــــــاااي انـــــــااا ع الرقــه
امــــــووته وكلــهاا فخــــــر : هذا درس حالك عشـان تعـــرف ان بنــات النــااس ما لعبــه

.

انتهــى الاتــــــــــصاال ... وترجع امــــــووته لكـــرسيــهاا .. بعدين حسيت بشي غلط : كيف كل شي انتهى؟ وانــاا للحـين م عرفت من الولد؟؟ ومن وين جـاب رقمــي؟؟ اليوم لعب علي بكــرا بيلعب ع غيري؟؟ الســالفه ما رح تعدي كــذا..
رجعت البيت.. دخلت المسن .. استشــرت انســاان ثقه 100% عن الي ف بالي.. ف قالي انتي صح وتوكلي

اخذت تلفــووني ورسلتله: " اعرف انك بتستغرب هالمـسج .. بس انا اريد اشـوفك " >>> اعرف انــهاا حــركه قـــوويه
الولد كــله انصدم بالقـــــــووه .. ف خاف يرسل مســج بعد ما هددته بالشـرطه .. اتصـل فيني .. وكانت السـاعه 12 وشي ... ع طول سكرت ف شكله ورسلت " اسفه ما اريد اتكلم معاك ف هالوقت.. رد علي بمـسج"
رد علي: " انتي متاكده والا تمـزحي؟؟"
رديت عليه : " تشـوف شكـلي مال مزاح؟؟ انا ما امزح مع اشكـالك ... اتكلم جد " >>>> ياربي عــــــــاااد ما رد .. قووويه طلعت
رد علي: " طيب ليش؟؟ ومتـى ووين؟؟ "
رديت: " ف الكليه السـاعه .... وبتعرف لما نلتقى لان كل شي ف وقته حــلوو"

xxxxxxxxxxxxxx

يوووم السبـــــت الصبـــــــــاح
راحت امــــــــــــوووته الكـولج قبل موعد الـ meeting الي كان عندها .. وع طول ع مكتب شـؤون الطـلبة: مرحــباا استـــــــاااذ ..... كيفك؟
الاستــــــــااذ: هــلااا امــــــوووته كيفك؟؟ وكيف الاجـــــاازة؟؟ اكـيد جــياه عشـــاان موضــووع .... ( ما لازم تعرفووه :p).
امــــــــوووته: هو ايـوا بس عندي موضوع اهـــــــم من هذا
الاســــتااذ: خير تفــضلي؟؟!
امـــــــــوووته : هذا الله يسـلم حالك يا استــــااذ ........ ( تحكيله كل الي صار)
الاســــتااذ:

.. زين انتي متاكده ان م حد من زمـلائك عطـــــااه؟؟ او حتى صديقاتك؟؟
امـــــــــــوووته: مستحــيل حد منهم يسـويها .. بعدين الشباب م عندهم رقمـي وعمـرهم ما فكـروا يطـلبووني اياه او ياخذووه من البنات

الاستـــــــــاااذ: طيب خزني رقم موبايلي عندك.. ولما يجي ارسليلي مســج وانا بجـيه

طبــــــــعاا استمـر الاتــصال بينـااا ( انا والولد المجهـول ) عشــاان معاليه يـوصل الكلــيه .. ف قــالي: وينك؟؟ وين بحصلك؟؟
خـــــبرته: تعال اللاب
قال: ما اعرف وينه

>>> دليل ع انه كذاب وما جاله دخل الكليه قبل

بعــــد عده محـاولاات اتفقــنا نلتقــي ف المكتــبه ووصفتله الطريق المؤديه الى المكتبه .. سالته: ويش لابس؟؟ عشان اعرفك!
قــالي: دشداااشه لون ......... وانتي؟؟

انـــــا :

ما ع اســااس انك شفتني؟ واعجبت فيني؟؟ معقــووله قدرت تنـسى شكـلي بهالســرعه؟؟

هـــو : تفــشل وقــــاال: لا بس انتـوا البنــاات تتغـيروا بسـرعه .. يعني يمكن تكوني لابسه شيله غــير و...الخ
انـــــــاا مقـــااطعه لحـديثه: شووي وبجيك .. باي
ع طوول رسلت مسج للاستـــااذ ... انا ف المكتــبه .. ارجوووك لا تتــاخر علي

دخلت المكتــبه وع طــول عرفته من لبســه + كان ماسك تلفــوونه يتصل فيني
سحبت الكـرسي الي مقــاابله .. وسجلت وعلامات الخوف المدموج بالضيق والعصبيه مبينين ف وجهي : ممكن تتكلم وتقـول من انت؟ من تكون؟؟ ومن طرشك علي؟؟ ومن ين جبت رقمـي؟؟؟

هــو: تو انتي جايبتني عشان تسألني هالاسئلة؟؟ انا خبرتك خلاص انسي السـالفه... وكل واحد يروح ف حال سبيله..
انـــااا: الحــذاله الي عطاك رقمـي اليــووم.. بكــرا بيعطــيه لـ 57674545 واحد غيرك

هـــوو: لالا ما بيعطي حد .. ورقمك ما بينتشـــر .. واذا صار اي شي وانتشـر الرقم انا مستعد اتحمـل المـسؤوليه

ويستمـــــــــر الحديث هكــذا في محاوله اقناعه انه يتكــلم .. دوون جدوى
وف نفس الوقت كنت ارسل مسجـــــــااات للاستـــااذ وهــوو كــــــاان ف اجتمــااع ف ما يرد علي

بس الحمـــــدلله قدر الاستـــااذ يتــصرف واتــصل بـواحد من الموظفين وخبره بالي لازم يســـوويه.

ثــــــــووواني واشــوف هذا الموظف قدامـــي يسـلم علي : كيفك امـــــووته؟؟
وانـــــاا: هذا مو يسـوي هنـــــــااا؟؟

سـلم ع الشــااب وقاله: انا فلان الفـلاني .. تعــــــاال معـــي .
الولد م قدر يقـول شي وراح مع الرجــال .. وانا ف مكـاني ما عارفه ويش اســوي .. ادعي ربي الارض تنشــق وتبلــعني بس

... كان موقف لا احـسد عليه

شــليت اغراضي وطلعت وانا مكــــــــــــسوووره .. وف طريقي اتصل فيني الاستاذ يعتذر لانه كان ف اجتماع وطلب مني اروح مكتبه ..
غيرت مســـــــاااري وانــاا رايحه لمكتبه احصله ف الطريق ف خبرته ان الولد م رضى يقـول اي شي + افتــرى كذب ع واحد من زمــلائي

قالي خلاص انتي هدي اعصـابك وان شاء الله بنـحل الموضوع
رحنــاا المكتب والولد والموظف هناك ينتظـرونا
بدا الكلام والحوار بين الرجــال وانا راسي ع الارض اسمع بس..
الاستـــاااذ فهم الولد مقدار الغلط الي سواه... ويش المفـرووض عقــاابه و..الخ
وقاله : المـــوضووع كله بيـد امـــــووته.. هي الي تقــــــــــرر اذا تتنــاازل عن حقـها او لا.. وشاف علي وكانه يقـول: صار دورك تتكلمي

شفت ع الشاب وقلتله: انــاا ممكن اتنـــــااازل وما اخــلي الســالفه تكــبر اذا عرفت انت من وين جبت رقمــي
بدون تردد قالي : من فـــلااان الفــــــــــلاااني >>> وهذا الشخص انا اعرفه زين وسببلي مشــااكل ع اصـــــــووول من قبل
ســـاله الاستــااذ: هذا الشخص يقـربلك؟؟
قـــــــــاال: للاسف ايـــــــــــــوووا

لا اراديــــــــــااا بديت اصرخ ف وجهه وقشبـــــــته قشب >> يمكن اول مره بنت تسـوي فيه كذا ... تو صح انا جرحت مشـاعره بس يستــاااهل
والكل ساكت ويسمع ... هو ما عارف ويش يقــوول لان حالته يرثى لهـــاا .. والاســـااتذه مقدرين موقــفي ..
لا والي قهــرني كـااان يقـولي طبعا نهايه التعارف زواج اذا اتفقنــاا .. ف الاخــــــــــير طلع اصغر مني بسنتين

ناقصه اربي صغيرين بعدني

المهـــم اتخذنا تجــــــــاااهه الاجــــــراءات اللازمه ... وتركت الموضوع لهم.. بعد ما بريت ذمتي .. وتاكدت اني ما غلطـــــــــااانه ... طــلعت وانــاا احبس دمـــووعي والاســااتذه يقـولولي : لا تزعلي.. انتي ما غلطـانه.. والي سويته حركه جريئة علمتيه فيهاا درس م ينــسااه.

انــــــاااوبنــبرة صـــوووت مخنـــووقه: وسمعتـــي؟؟ ليش هالانســـاان يسـوي فيني كـذا وانا عمري م سويتله شي؟؟ .. عمـرنا ما سلمـنا ع بعـض ولا كــاان بينـــــــــاا اي اتـــــــــصااال
كل اعرفه عنه اشيـــــااء سطحــيه .. وهــوو نفس الشي

الاستـــــــااذ: امـــــــــوووته .. سمعتك مصــــووونه .. احنــــاا نعرفك ونشهد ع اخــــلاااقك .. واذا فكــــــــر مره ثانيه يغلط عليك احــناا بنتدخل ف الموضوع .. رغم انه مالنــاا حق لانه م يدرس ف الكليه .. بس انتي بنت الكليه وما بنسمح لاحد يغلط عليك و.......الخ من عباراة المواسه

ما كتبت الموضوع عشان افخـر بنفــسي بالعكـــس
اكتـــــــــبه ودمــوووعي ع خدي تنزل غصــب عني
ليش صــــــاار كــــــذا؟؟ ويش راح يستفــــــيد؟؟

يــــــــااا شبـــــاااب تــووبـواا وخـــاافــواا الله
فـي حد يــرضى منكم هالـشي لاختـــه؟؟
حتـــى لو ما عندك اخــووات تغــاار عليهم.. ما عندك غيره لبنــااات المسلمين؟؟!!

واللـــــــه عيـــــــــــــــــــــب عـــــــــــــــــيب
انا ما اعــــــمم الكــــلاام ع الكـــل لان اصــاابع اليــد ما مثل بعـض

اتمنــى المغــــــــــزي يكــوون وصل

** مــــــلاااحظــة: نص القصـه كان بتصــرف ( يعني مغيره في اشيـااء بسيـطه بدون م ااثـر ع الاحـدااث الحقيقيــه )

**mysteriousgirl** · 19-09-2009, 11:38 PM

في الاخـــــــــــير اسمــحوا الـي بالتــوجه بالشكـــــــــر الجـــــزيل لكل من شـــــاارك معاي ف المســـلسل .. ككتــــــــــــاااب ومتـــاااابعـــين
اخــــــــص بالشكــــــــــــر

ميمو المبدعة

مهندسة08

معذورة بطبعي

~*Mira*~

فتروس

crystal blaze

@ حامل المسك @

omarion

]:[دلــوع الفريــج]:[

الفراشة البيضاء

قاتل الزمن

ولا انــــــــــــــسى من كـــــــااان خـــلف هــذا الابـــــداااع

السيـــــــده :

mysteriousgirl

والسيـــــــــــــد:

القلم

**mysteriousgirl** · 20-09-2009, 02:22 AM

عدنــــا ،،

هذي قصة لـ قاتل الزمن ..
تأخرنا نطرحها بـ سبب الظروف .. لكن أهم شي انها توصل صح ..؟
^^

/

قاتل الزمن
طبعي طيب

هذه القصه

مراحـــــــــب
شــــخــــــــبـــــــــاركم؟

الموهيييييم
هذه قصتي وأعذروني لأنها قصيره
تقريباً من ثلاث سنوات كنت هذيك الأيام أداوم في سوبرماركت ودخل
إلى المحل شاب في مقتبل العمر >> يعطيك العربيه الفصحى

المهم بعد شوي شفته يتكلم في التلفون
المهم جلس يتشرى وأشترى أغراض كثيره من عيش وطحين ودجاج المهم بعد شوي رحت أنا اجيب غرض حال أحد الأشخاص وفي طريقي أشوف مية ريال عباره عن ورقتين من فئة الخمسين ريال المهم أخذتهم وحطيتهم بمخباي وقلت الي مغيبنهن بيتكلم وانا شكيت في الشاب الي دخل وأشترى أغراض كثيره وقلت يمكن طاحت عليه لما طلع تلفونه من مخباه
المهم بعد شوي أجا الشاب عند المحاسبه وأنا أكيس الأغراض له
وكانت قيمة الأغراض ما يقارب الثمانين ريال ولما جا يطلع الفلوس من مخباه ما حصل شيء وقال : لحظه يمكن نسيتهن بالسياره.
وراح يشيك على السياره ورجع وما حصلهن فسألته : كم المبلغ الي مغيبنه؟
قال : مية ريال.
فقلت له : مية ريال ؟؟
قال : أيوه خمسين خمسين كنت ساحبنهن من البنك.
فطلعت الفلوس من مخباي وقلت له : هذه فلوسك أخوي حصلتهن في المحل وخليتهن معي وقلت إذا كان صاحبهن في المحل يتشرى فمعناه بيتكلم عند المحاسبه لما يريد يطلع فلوسه.
الشاب شكرني وحاول يعطني المبلغ الي بقى من المية ريال بس أنا ما رضيت

خبرته : أنه انا ما سويت كذا عشان الفلوس ولو كنت سويت كذا عشان الفلوس كنت أخذتهن من أول شي ولا خبرت أحد ولا رجعتهن لك.
العبره الأولى :
إذا حصلت فلوس وعرفت صاحب الفلوس فالأولى إنه نرجعهن له وما نحتفظ بهن لأنا ما نحب الحرام.
العبرة الثانيه :
الشغل مهما كان نوعه فما هو بعيب
فمثلا أنا أول ما أشتغلت أشتغلت بمحل هواتف وبراتب خمسين ريال وأغلبية ربعي ما عجبهم أوين آخرتها أشتغل بمحل

وأشتغلت بمحطة بترول والواحد منهم لما يمر علي حتى ما يسلم ويخلي عمره ما يعرفني أوين ما من مستواهم

ونفس الشيء لما أشتغلت بالمحل.
أشتغلو الشغل ما عيب العيب تجلس تطلب أبوك فلوس حق الرصيد وكذا أشتغل على قولتهم مال تمشية حال ألين تحصل شغل أحسن.
والحمدلله الحين حالي أفضل عن أول بكثير
بعد ما تخرجت من معهد الضيافه.

دمتم بود

**عنقوده** · 21-09-2009, 03:24 AM

السلام عليكم ورحمة الله وبركاته ..
بـ ما ان الموضوع وصل للحلقه الاخـيره
فـ يرفع عن القفل .. حتى الكل يضع رأئه بعد هذي الحلقات الرائعه !
وشكـر خاصه لكل من ساهم ف نجاح هالعمل ..! وفي رقي قسم التسليه .

**مهندسة08** · 21-09-2009, 02:36 PM

أجمــــــل وأرقـــــى تحيـــة للعضـــوة المتميـــزة..أمـــوووتــة..

لكـ كل التقديــر والاحتـــرام..

**الرعشه** · 21-09-2009, 02:38 PM

خلاص عاد الرمضان خلص

يغلق !!!!

**the wizard** · 22-09-2009, 01:51 AM

am8

.. شكرًا لا تكفي ..

إعـــــــلان

المسلسل الرمـضـاني: يــــــ // من حيــــــــاااتي // ـــــووووم

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق