السلام عليكم ورحمه الله وبركاته


اخباركم عاشوقين علومكم ؟؟


المهم حبيت انزل موضوع عن سوالف اول على لسان احد عاش ذيك الايام المره ,,,

الموهييييييم

في يوم من الايام الجميله كنت طالعه مستمله كان الوقت العصر والكل محد ,, فكرت وين اروح قلت بروح بيت حبابوتي ,,, بس وانا طالعه شفت عمي جالس وحده قدام رفصه المجلس مال بيتهم
قلت احسن اروح عند عمي الين يأذن المغرب ويروح يصلي في المسجد
المهم
رحت عداله وسلمت عليه وجلست ادعكم مع الحوار

شعاع : السلام عليكم عمي اخبارك ؟
عمي : وعليكم السلام الحمد لله بخير انتيه مو معدله ؟
شعاع : الحمد لله طيبه
عمي : وكيف الدراسه ؟
شعاع : ممشين الحال الحمد لله ,,عمي خبرني عن اول انتوه درستوا صح ؟
عمي : هيه يا بنتي انا درست بس ما هنا ما في عمان
شعاع : عجب باه هين دارس ؟
عمي : درست في الكويت
شعاع : اها حتى ابوي معكم ؟؟
عمي : لا ابوش رجع عمان ,,
شعاع : ليش كنتوا وين اول ؟؟
عمي: كنا اول في عمان وطلعنا نحن 4 اخوان السعوديه ابوش وعمش الكبير رجعوا عمان ونحن رحنى نكمل دراستنا في الكويت ؟
شعاع : اها وبعدين
عمي : والله يا بنتي رحنى ندرس في الكويت وكان كل شي صعب علينا ما كما تو كل شي موجود ويجيك لين عندك ,,,كنا في الكويت ندرس مسائي ونشتغل في نفس الوقت ,,
شعاع : تشتغلوا وتدرسوا ؟ كيف كذاك
عمي : يا بنتي كنا ننهض من الفجر بعد الاذان نشتغل علين المساء بنتعشاء ونروح المدرسه وبعدين ننام وننهض الصبح مره ثانيه
شعاع : كان شي صعب صح
عمي : صح صعب واجد انك تتغرب عن اهلك سنين وانته ما تعرف اخبارهم

واذا اذان المغرب
عمي : يالله بنتي انا رايح اصلي ووقت غيره نكمل
شعاع : ان شاء الله
ورحت وانا افكر يعني اللي انا فيه ما يسوي قطره من اللي مرو به اهلنا بس لحظه عرفت عن عمي ,,, ابوي والسعوديه ما سالت عنه ,, يبالي اسال لكن في المره الجايه


في يوم من الايام كنا سهرانين الين الساعه 12ونص بالليل وفجأه انقطعت الكهرباء وطلعنا في الحوش وفرشنا بساط وولعنا كم شمعه وجلسنا نسولف الكل طلع برى الا خواني اللي عندهم دوامات واستمر انقطاع الكهرباء واتذكرت السالفه ورحت عدال ابوي ,,

شعاع : يو باه
ابوي: مو بايه
شعاع :خبرني عن اول ياخي ؟
ابوي : عن اول ؟؟ سيري عني يالله

: من الاول عارفه انه بيرفض :
رحت عنه وانا للحين في فضول اعرف سيره حياه ابوي
بعده عرفت له مواقف بصراحه هو كبير وكل ماله ويكبر في عيني اكثر




# الفائده #

نحن في نعمه لكن ما نقدر قيمتها لازم نفهم انه عندنا نعمه غير عن غيرنا ولما نقارن انفسنا بغيرنا فنقارن من اللي همه اقل منا ونقول الحمد لله