هلا

بصراحة ما صارت .. كل مره اجي اسحب فيها من مكينة السحب الي عند الاستهلاكية احصل زحمة وما هذه المشكلة لان الزحمة شي طبيعي .. بس المشكلة مع البنات !! يعني اوقات نكون جايين قبلهن ولكن بمجرد ان بس بنت وحده تتقدم لتسحب حسب الدور .. يقفزن البنات الباقيات يوقفن جنبها عند ألة السحب ومن تخلص ذك البنت غير تقفز الثانية وتتبعها الثالثة والرابعة .. المشكلة اوقات لما يكون وااايد شباب وبنت وحده تحصل الشباب من طيبهم يقدموها عليهم بس للاسف ما يصير العكس مع البنات .. وكم مره اكون وحدي مع جيش بنات بس ولا وحده تقول تقدم يا اخ !!! وانا قايل اني ما اخليهن يتقدمن في اي شي بس المشكلة انك ما تقدر تعمم القضية على الكل لان في بنات والنعم فيهن بجد .. واليوم الصباح كان واايد زحمة نفس الشي وكنت رايح اسحب وكان شباب واايد ويمكن مال اربع بنات .. فكانوا الشباب ما معطينهن مجال ابدا .. فأنا رحمتهن وقلت بسوي فيهن خير ولو اني بأمانة ما كنت اريد اعطيهن سيد واخليهن يوقفن في الممر دواهن ..بس قلنا النخوه والشهامة ما يصير نخلي الاخوات فالممر وقبل لا اروح اسحب قلت للشباب الي هناك لو سمحتوا شباب بنخلي الاخوات يتقدمن .. فمساكين ما قالوا شي ولو انهم كانوا مصنفين لكن سكتوا .. فقلت انا لهن تقدمن الاخوات اسحبن .. وليتني ما قلت لهن ما حد عبرني ولا ردني حتى علي ان عادي ننتظر او شي من هالقبيل حتى والله الشباب الي كانوا هناك عصبوا وقالوا لي : هالبنات لا تسوي لهن طوله لا عند البنك ولا عند ألة التصوير ولا في اي مكان فيه انتظار لانهن ما يحشمن احد ..

الحين الرجاء من كل طالبة او طالب يقراء هالموضوع يعطيني رايه فالموضوع مع حل لمثل هالموضوع ..

ورجاءا الي ما يعجبه الموضوع لا يعلق عليه ولا يرد ابدا بس يكفي انه يطلع منه ..

دمتم بود ..