السلام عليكم جميعا
اول شي انا طالبة سنة اولى تخصص مختبرات طبية.. بس طبعا بعدي ادرس فاونديشن لفل 6..
مشكلتي اني للحين ما احمل اي مشاعر للجامعة وانتظر الاجازات بفارغ الصبر.. مع اني ف البداية كنت واايد متحمسة للجامعة والدراسة الجامعية..
واهم شي اني احس نفسي ولا شي .. ما اشارك ف الكلاس الا نادرا .. وحتى مذاكرتي مب ذاك الزود .. مب مثل الدح اللي ف المدرسة .. يمكن السبب عسب ندرس مع اولاد .
والصراحة كل ما حد يشوفي اذاكر من البنات الكبار يقولي لاحقة ع الشقا واستانسي بالفاونديشن .. عسب جيه يمكن اكون قصرت ف المذاكرة .. ودرجاتي الحمدلله زينة بس مب مثل ما اطمح .. ومشكلتي ف اللسبينج لما اطلع عسب اقول انسي نص الرمسة وااختصر لآخر حد ..
وسؤالي هو: كيف تنظموا وقتكم.. وكيف تذاكروا وتدحوا .. وفيه عندي مشكلة من دخلت الجامعة اني صايرة وايد انسي والاقي صعوبة ف حفظ الفوكاب
اتمنى انكم تردون علي باللي يفيدني لاني ما ابي ادخل الجامعة واتخرج منها كأي شخص عادي.. طول حياتي عشتها بتميز وابي اعيش حياتي الجامعية بتميز وتفوق
ابي ارجع لأهي احمل شهادة الامتياز مع مرتبة الشرف..
ابي اعشق الجامعة واعشق المذاكرة ..

هل لكم ان تنتشلوني مما انا فيه .. فلم اعد اطيق البقاء هذا بلا تميز

( هنالك عبرة متعلقة في عيني .. لا أريدها ان تسقط الان .. لاني اريد ان احولها لدمعة فرح لا حزن )


دموع باسمة