هذه قصه عن نساء من هذا الزمان
اريد منكم ان تقراءها , وتفهموها, و ان تعطوها الفرصة الكافية ...
نعم
انهم نساء موجوداة حولان
قد تكون قصةامك او اختك او ابنتك.


نساء من هذا الزمان
+++++++++
القصة عن خمس نساء دلال وندى والجازي وشيماء وسعاد ..
كل وحدة الزمن شلون يدور معاها
أتمنى إنها تعجبكم ..


الحلقة الأولى ..


هز ايدها بقوة وهو يقول ــ دلالوه دلالوه قومي ..بسك رقاد .

فتحت عيونها تشوف أخوها يوسف واقف على راسها معصب ..

ــ يا صباح خير نعم!!!!!!!!

وهي تتثاوب قال لها يوسف ـــ دلالوه يوم اليمعه سلفتك ثمانين ريال يوم نسيتي بوكج في المول ..أبيهم الحين .

قامت وهي معصبة وفتحت شنطتها وطلعت امية ريال وقالت وهي معصبة ــ هاك يالله فارج ..

خذ الفلوس وطلع طالعت دلال الساعة كانت ست الصبح وصرخت ــ تأخرت !!

طلعت معصبة وكشتها مب مشطة وطقت الباب على غرفة خواتها كانوا قافلين الباب كالعادة ..

ــ سويروه شيوخ علوي هنود حمدوووه بطلوا الباب !(سارة وحمده وهند أخواتها لكن عليا وشيخة بنات عمها )

فتحت سارة الباب وعيونها مبققة مخترعة

ــ ها دلال شتبين!!

دلال ــ الساعة ست ما وراكم امتحانات ؟؟ يله تزهبوا عشر دقايق وتنزلون ..اللجنة تبدأ الساعة سبع ونص ويالله تريقون وتتزهبون مايمدانا نوصل

ـــ زيين ..

ردت دلال حق غرفتها وراحت الحمام تروشت بسرعة ..وطلعت ..كالعادة السيشوار قبل كل شي بس على سريع مشت على شعرها وبعدين المكياج فكرت آنه شلبس اليوم ؟؟ اوكي

بلبس أحمر القميص الأحمر على تنورة سودا...
بس ...
المكياج !!
اذا حطيت أحمر بيكون صارخ !
اوكي اليوم بلبس تنورة جينز ..
علشان المكياج يكون أزرق شوي ..
القميص مب لايق مع التنورة شكلي بلبس بلوزة وردية .
.صج بكون علج في حلج البنات بس مو مشكلة
(..حطت الميكياج أزرق على وردي خفيف الوردي مخليها شوي أصغر مع بشرتها البيضا مخليها مشرقة شوي .)
فكرت شوي بالإكسسوار فتحت علبتها ولقت علبة الحلق الغجري مإلبسته ولا مرة كان فيه لون أزرق فاتح طالعت لقت الإسوارة الغجرية في نفس الكيسة .إلبستهم حضرت شنطتها العطر والبوك وأوراق لبعض البنات إلبست عباتها وحطت الشيلة على كتفها وجوالها في شنطتها وطالعت أحذيتها ..شتلبس اليوم واطي ولا كعب؟؟ ولا عادي بوت البوت تقريبا خفت موضته ..طقت سارة الباب ودخلت ــ دلال أعطيني سشوارج !

طالعت دلال أختها وقالت لها ــ للحينج مالبستي ولا استشورتي أنا خلصت تقريبا وخواتك وبنات عمك؟خلصوا ؟

ـــ واقفين بالدور على الشسوار كلهم إلبسوا إلا أنا رحت وزهبت الريوق مافيني أنطرهم تعطيني اياه؟؟

راحت دلال وطلعت الشسوار من الدرج وقالت ــ شرايج ألبس كعب اليوم ؟؟

سارة وهي تبي تطلع ـــ تعرفين لازم ..على فكرة شكلج واايد حلو تفتحين النفس حسافة ما تراقبين علينا ..

استحت دلال من كلام اختها وقالت ـــ تعرفين ما يخلوني أراقب إذا حد يقرب لي في اللجنة براقب صف ثاني ثانوي أدبي ....عندهم فترتين ..

علقت سارة ـــ دام أدبي كشخي عدل وإلبسي كعب تعرفينهم مخهم فاضي ويقعدون يفحصونك ولا سيارة قطعة قطعة لابسة إيش حركاتج شلون حتى أظافيرج مابتسلم منهم ..ولا تآخذين

جوالج معاج بيقولون تكشخ علينا كأن ماحد عنده جوال غيرها !

ـــ سويروه ماله داعي تعلميني ؟أعرف ..الله يرحم أيامنا كنا لما نشوف المدرسة ماكنا نهتم لإيش لابسة كل المهم أنها راضية علينا ..

طلعت سارة وتمت دلال تلبس بالكعب العالي .. طالعت درج تحتفظ فيه بكل أغراضها لخاصة وذكرياتها فتحت الدرج وطلعت الصور .. وتمت تطالع صورته ..جاسم ..واقف مع أخوها

أحمد وراهم ابو الهول!!..جاسم!! ليتك ترحمني وتقولي إذا تبيني ولا لا! أنا في نظر أهلي عنست خلاص ..لو تدري كم واحد رديت علشانك ..الحين نادر ماييون

الخطاطيب ..كبرت ,,كبرت وأنا عمري ماتعدى الثمان وعشرين ..بس أبي اثبات إنك للحين تبيني ..أرجوك أي إثبات أي إشارة أبوي عصب علي وقال لي أنا مب دايملج العمر كله ...

ردت الصور للدرج وامسكت نفسها وهي تقول ـــ أنا أعزك بس .. معزتك ما بتفيدني في الآخر !

نزلت وقعدت تتريق طالعت الساعة لقتها سبع .. البنات نزلوا من فوق ومعاهم هند وشيخة

ــــ صباح الخير ..هند وشيخة مالكم مكان في السيارة .. وين جايين؟؟(هند في جامعة فرجيينيا كومونولث وشيخة في جامعة قطر)..

هند ـــ عندنا محاضرات ونبي نروح تأخرنا ..

شيخة ـــ صج أنا راحت علي أولى ..عندي ثانية ورابعة ..والدريول على مايوصلكم نكون تريقنا ..

دلال ـــ كيفكم أنا رايحة بنات يالله وكالعادة الزيادة تنقط في الكرسي اللي ورى ..

علياــ لا والله!! تستانسون أنتم كل مرة قاطيني ورى والله لأقعد بينكم ماعلي السيارة واسعة وتكفي أربعة ..

سارة ــ هي عالوسع واسعة لكن احنا نتكلم عن راحتنا أنت ماشالله تضيقيين علينا المكان فما نقدر نتنفس ..

طق الباب في هذي اللحظة ودخلت جارتهم أم خالد ومعاه بنتها سبيكة ..

ـــ صباح الخير بنياتي ..

ـــ صباح النور هلا أم خالد حياج ..

ام خالد ــ ادري إن أمج محد هالحزة مابطول بس سبجوه طافها الباص وأنا شفت دريولكم موجود قلت إذا ما فيها كلافة..

دلال ـــ لا ولو سبيكة أختنا رابية معانا بتروح معاي ..

أم خالد ــ زيين عيل أخليكم الحين بسير البيت ..

دلال ــ بس ما ضيفناج ارتاحي شوي ..

أم خالد ــ لا مشكورة بس ما أقدر أبو خالد في البيت وبيطلع دوامة وللحين ما زهبت له الريوق ..مع السلامة .

دلال ــ الله يسلمج .يالله بنات للسيارة ..

سبيكة ــ أنا ما بقعد ورى !(طبعا لانهم كلهم بنات ماحد يقعد قدام علشان الدريول السيارة نيسان فيها كراسي ورى دايما دلال تخلي اللي يجوون زيادة( ضيوف ) سواء أخواتها أو بنات عمها (لأنهم عادي مع بعض ما في كلفة بينهم )يجلسون ورى حتى سبيكة ما سلمت من هالقانون البنات يتفشلون وهم ينزلون من ورى فكرت دلال في نفسها بنات آخر زمن الله يرحم يوم كنت أندس مع أخواني في البيك آب اللي فيها كرسيين و أنا في الثانوية )..ضحكت دلال وقالت ــ لا تخافين هالمرة مب بروحج معاج علوي ..

عليا ــــ لا تناديني علوي أحسن إني ولد !

دلال ــ أو! أجل أيش أنت ؟؟؟ بنت معقوولة!!

ضحكوا كل البنات على عليا ..اللي قالت ــ غلطة عمري هالقصة ..الله ياخذج ياعنوودووه هي اللي قالت لي قصي بوي بيطلعج أنثوية شوي .قالت شنو .بيبين رقبتج يعل رقبتج القطع ياعنوودوه وين ما كنتي الحين..
( عليا رقيقة وايد بس شكلها يقول إنها شيطانة عيونها حادة ورسمتها مثل رسمة عيون المها ونظرتها حادة ..قصة البوي مطلعتها نااااعمة بس أخواتها وبنات عمها يحبون أنهم يعقدونها.لأنهم ما يقدرون يتصورون عليا أنثى.خاص إنها طويلة وضعيفة واايد ..وحركية ما تقعد في مكان واحد )
*************






--------------------------------------------------------------------------------
آخر تحرير بواسطة ندى الرياض : 01-06-2006 الساعة 05:33 PM.


ندى الرياض
عرض الملف الشخصي العام
إرسال رسالة خاصة إلى ندى الرياض
إرسال رسالة بريد إلكتروني إلى ندى الرياض
البحث عن المزيد من المشاركات بواسطة ندى الرياض
إضافة ندى الرياض إلى قائمة الأصدقاء

01-06-2006, 05:22 PM #2
ندى الرياض
ضوء نشيط جدا



الملف الشخصيرقم العضوية : 46948
تاريخ الانضمام : Apr 2006
المشاركات : 670
الإقامة : عالم الخيال
الجـنـس: أنثى





دخلت دلال الغرفة ..وراحت صوب مكتبها المدرسات الحين كل وحدة في لجنتها ..انزعت عباتها وحطت شيلتها على كتفها .. ضبطت شعرها ورشت العطر وطلعت رايحة للجنة اللي تراقب عليها ..
دخلت ولقت الجازي واقفة توزع الأوراق ..
دلال ـــ صباح الخير ,امتحانهم وصل ولا هذي كراريس الإجابة؟؟
الجازي ـــ هذي الكراريس ..ساعديني شوي .
.اللجنة كبيرة تتكون من ثلاثين طالبة ..وزعت الكراريس .. البنات يطالعونها شلون ..بطريقة أربكتها حاولت إنها تتجاهلهم .
وقالت في نفسها ــــ صج بيفككوني قطعة قطعة ..
الجازي ــ دلال شفتي نورة تحت؟
ـــ نورة العلي؟؟لا ماشفتها بس شفت خلود المانع ..تبين أناديها لج ؟؟
ـــ ياليت ..في كراريس من نوع ثاني ..ياليت..أنا اعتقد مخربطين لأن فيها خرايط ..
ـــ بناديها ..
طلعت دلال وهي تدور خلود لكنها لقت نورة ...
مر نص الوقت وبنات أدبي مب مقصرين بطلباتهم الكثيرة ..
طالعت دلال الجازي وقالت ــ اليازيه فديتج بس أبي منج قلم..للي قربج قامت اليازي وأعطته دلال..وهي مستغربة ليش شتبي دلال من القلم الأحمر ,,
قامت دلال وكتبت على ورقة وحدة من البنات (ضبطت وهي تغش !) وسحبت منها الورقة والبنت اللي اسمها نايفة منصطدمة ..دلال امسكت البراشيم اللي كانت نايفة مخبيتهم في كم قميصها وحطتهم داخل الورقة والبنت تمت تصيح من قلب وهي تقول آخر مرة والله آخر مرة ..
كانت هذي أول مرة دلال تمسك بنت تغش ..
دخلت الغرفة وهي متضايقة شوي ..ما هانت عليها البنت ..
دخلت الجازي وراها وكانت تحس إنها متضايقة فقالت تحاول أنها ترفه عن دلال ـــ وااو ما صدقت متى تخلص الفترة الأولى ..
دلال ـــ أنا أكره اليوم الاول سواء في الدراسة ولا في الأمتحانات يسبب لي توتر ...
دخلت باقي المدرسات وأولهم ندى وقالت لدلال وهي تغمزــ الله الله إذا كان حبيبك ثور إلبس له أحمر ..
طالعتها دلال وقالت ــ والله كان قلبي حاس كنت أبي ألبس احمر اليوم بس قلت شيفكني من لسان ندووش .وبعدين هذا ور دي آوه نسيت أن عندج عمى ألوان ..
سعاد ــ والله يا دلول لولا ندووش كان البنات اكتبوا على باب غرفتنا غرفة المدرسات العانسات الحمدلله إن البنات يموتون عليها وعلى خفة دمها وإلا احنا أولا وأخيرا شلة عوانس مقابلين بعض ..
الجازي ــ تكلمي عن نفسج بس ..
التفت دلال حق الجازي اللي كانت مستحية وقالت وهي مبققة عيونها مصدومه ـــ قولييييييييييييي والله!
ما افهمت شيماءالسالفة وقالت ـــ عسى ماشر؟؟
ضحكت دلال وقالت لندى وسعاد وشيماء ـــ الخايسة شكلها انخطبت !!
ندى +سعاد +شيماء= يالنذلة يا خاينة العيش والملح صج خايسة متى وليش ماتقولينه ليش ما تعزمين(طبعا كل وحدة منهم سؤال وشتيمة حق الجازي)
الجازي ــ والله أنتم النذالة تبون أقولكم وللحين ما استوى شي علشان تـنـطون لي في البيت مثل السبال ويشوفكم ويهون عني ..
سعاد ـــ صج........ !!شأصله وشلون تعرفتي عليه ؟
الجازي ــ هو هاجري من ربع أخوي شافني بالغلط مرة ..وعيبته ..
شيماء ــ اخطبس خلاص خطبة ؟؟ماأشوف الخاتم وينه؟؟
دلال ــ أبوج شلون رضى ؟؟؟قولي شصار !
الجازي ـــ هو طرش أهله من يومين أبوي بيرد له خبر اليوم ..كان أبوي مب موافق ..
بس ...
يدتي قالت له (الجازي تقلد صوت جدتها )اليازية صار عمرها ثلاثين متى بتعرس ودام إنه رفيج ولدكا زين الرياييل ..عاد أبوي إلتفت علي وسألني اليازية بوي شرايك؟؟ فقلت له إن كلام يدتي صج وأنا ما شايفة شي يعيب الريال أبوي انصطدم لأنه لو سألني قبل سنة كان ما قدرت أبطل حلجي بحرف لكن الحين قلت لنفسي بلا مستحى بلا بطييييييييييييييييييخ...يا نصير فوق يا نطيح ..
قامت دلال واحضنت صديقة عمرها وباركت لها ..وقالت ـــ عقبالي ..شوقتيني أعرس ..
شيماء ــ شسمة ومن ولده أذا هاجري أكيد بعرفة خليني أرسم عليه بنت قبيلته أصلح له من مطيرية مثلس.
سعاد ــ نعم ؟؟شيموه يوزي ..أنا حاجزته قبلش ..هو يرضى بمرية؟؟ صدقيني البيت علي وطلعات البر والمهر ..
ندى بعصبية ــ صج مرية هيه أنتي تقولج يبي يخطبها مب مطرشها تدور عن عروس له؟؟وبعدين إنتي ليش مرخصة عمرج له ..
دلال ــ ندى ..شفيج عليها أكيد صاير لج شي من ورى سالفة المهر ..قولي ..شصاير .(.دلال بدون قصد فتحت جرح في قلب ندى ),,
ندى ارتبكت شوي وقالت ــ أعرف بنت .أبوها رخص فيها وعطاها لأبن عمها ببلاش ابن عمها خطبها ...بس هانت عليه بنت عمه وتزوج بنت ثانية ودفع مهرها ثلاثمية ألف ريال ..
دلال ـــ وبنت عمه ؟؟
ندى ــ طبعا ..الأبو مات من الجلطة وبنت العم تعقدت وكرهت الرياييل ..شكلها ما بتعرس
( هذي ببساطة قصة ندى لكن ما قالت لأحد عنها علشان محد يرخص من قيمتها أو يشفق عليها ..)
دلال ــ حراااااااااااااااااااااااااااااااااااااااااااااااا اام ..
كانت هالكلمة مثل السكين اللي انطعن في قلب ندى وقلبت السالفة مزح ـــ عسى الله يرزقج بواحد بطران مثله انشالله ما يرخص فيك فلوس الدنيا ..
..وضحكوا البنات ...
سألتها شيما ــ ندووش من أي عرب ولد عمها ؟؟
ندى ــ مــ..
كانت تبي تقول مهنديين بس قالت ـــ ما أدري ..السالفة صارت في الكويت ..
(ندى تستغفر ربها في قلبها لأنها تكذب)
علقت دلال ــ بنت خالتي وصلت من الكويت الأسبوع اللي راح وما تمت اشاعة ولا سالفة في الكويت ما قالتها اللي ذبح اخته واللي صاد زوجته مع رفيجه واللي مات حتى أسامي اللي يفحطون في الليل ويشلون تعرفهم ما يابت لي طاري عن هالرمسة !
التفتوا البنات حق دلال وقالوا ــ دلول كم مرة قلنا لج لا تتكلمين انجليزي واحنا مع بعض !
ضحكت دلال من قلب على البنات ..اللي ما يعرفون معنى هالكلمة وقالت ـــ معناها السالفة ..كلمة امارتية ,,أجل لو يلستوا مع يدتي أم محمد شيصير فيكم ...بنات ..الفترة الثانية كأنها ابتدت يالله ..
*****************