ليش لما نكون عفويين وصريحين في النهاية احنا ننجرح ونتألم..!!
ليش نهتم ونفكر في أشخاص مرات نقول انهم ما يستحقوا كل هذا الاهتمام منا.. بس نلوم نفسنا؟ قلبنا؟ طريقة تفكيرنا؟ عفويتنا؟
من نلوم؟
ليش احنا دائما نضحي ب أشياء كثيرة.. بس ما نلقي حد يضحي عشانا؟
لييش أنا بالذات احس اني شال مسؤولية كبيرة. . بس انا ما احصل حد مسؤول عني او ع الاقل يقولي اني انا الي اسويه في حياتي صح او خطأ..
لأي مدى بنتحمل؟
ولو غبت فترة طويلة عادي محد يسأل..

وايد اسئله في بالي مالها جواب ..
متأكد اني بنام وبنسى كل سؤال في بالي .. بس بكرا بتجي قائمة غيرها بالاسئله ويمكن تتكرر القائمة الي فوق. .

مابرجع أقرأ الي كتبته فوق ماعرف وش كتبت بس كان شي بخاطري وكتبته

تذكرت مره قبل كم شهر مرضت
كنت بروحي في البيت وفيني حمى وايد وما قادر اتحرك..
ماعرف ليش كان فيني كبرياء اني ارسل لاحد من اخواني اقوله اني مريض واريد اروح المستشفى. .
ظليت ع فراشي حاولت انام وكنت بروحي في البيت محد معي..
سبحان الله كان اخوي جاي من مسقط ومر البيت كان يريدني اشل سيارته بكرا للتصليح..
وشاف سيارتي موجودة في البيت وجا دق باب الغرفه ودخل حصل الليت مبند وانا شبه راقد .. لما شغل الليت حصلني تعبان ومشغل المكيف واتصبب من الحرر..
قالي قم البس بنروح المستشفى..
قلتله ما يحتاج بنام.. بعدين جلس فوق راسي ورحت..
يعني لو اجلس عادي اظل كذا فتره ومحد يعرف عني شي ..

لاني انا غلطان..
ونقول بعدها الحياه بخير..
وكله خير.. ولعله خير..

ابي اسافر واغير جو بعييد عن كل احد ..
شكلي بروح اوربا لكن المشكلة معي اختبارات فترية واسايمنتات..
الا اذا اخربها مرة وحدة..
وشكلي كذا بسوي

وقلبي يآ الله في رعآيتك.. ♥
و آرزقني الصحة والعآفية برحمتك يآ الله..
وإن حزنت.. سآمحني يآ الله..

اليوم حد في الدوام قالي جملة تتردد وايد في بالي
صاير وايد اجلس ف مكتبي ما اتكلم مع حد بس اشتغل
وجا خطف عليي واحد قالي كأنك وايد مضغوط.. جاوبت بهدوء بكلمة وحدة "اشوية!"..
بعدين قالي تعلم ما تفتح الباب للناس كامل عشان ما تنضغط..
تو انا ناقص عاد بروحي منفجر داخليا..
وصاير ما اعرف اقول لا ابدا..
كل شي يقولولي اقول ان شاء الله..
والدوام صاير سربته معي.. وباكر ما بداوم

معي تسليم اسايمنتين السبت
وبرزنتيشن اثنينه
ولحد الحين ما مسوي شيء ماعرف ليش ادرس !!
خسارة فلوس ع الفاضي مرات اقول
واجب شكر النعمة بس انا غبي ماعرف استغل الفرص

الحمدلله ع كل حال

وليش انا اكتب؟
ليش ما اكتم كل شي داخلي
وليش وليش وليش

ليش ما انام
الى النوم احسن

"كُنتُ أريدُ أنْ أقولَ لكَ الگثيرْ"..
#فقط..

هالأيام ماعرف وش سالفتي كل شيء يختبص معي
يوم السبت كان معي اختبار وكان معي برزنتيشنين وتسليم اسايمنتين
وكالعادة طبعا الله يستر ههه
عاد يوم الجمعة خلصت اسايمنت واحد وخلصت برزنتيشن واحد والاسايمنت الثاني سويت ربعه.. ولما جات 10 ونص قلت عاد بنام وبنش ساعة 1 ونص ولا 2
ههه انا نمت ونشيت 5 ضبط مره..
جالس اشوف الساعة أقول تو ذي حقيقي كذا.. ههه المهم تقبلت الوضع ونشيت بسرعه ورحت اصلي..
تو عاد رجعت جلست افكر باقي برزنتيشن واكمل الاسايمنت واذاكر للامتحان و وش اسوي هههه
قلت ببدي السهل سويت البرزنتيشن والموضوع جديد ما فاهمنه جلست افهمه وجات ساعه 7 خلصته ع السريع..
رحت اتجهز ورحت الجامعة ونسيت اللاب في البيت طبعا والاسايمنت الي مسوي ربعه فيه ما نقلته ف فلاش هههه
ودخلت الكلاس متأخر 8 و20 دقيقة
واشوف الكلاس كامل يطالعني كأني مسوي شي غلط.. المهم جلست هههه واسأل ربيعي أقول وش السالفة علامكم ساكتين وتطالعوا وش صاير..
قالوا كان يبا يختبرنا تو بس انت تأخرت
خخخخ بعد ساعه ونص اختبرنا وخبصت طبعا.. قصدي حليتته ما شاء الله كاااااامل ههه
بعد الاختبار كان يقول الدكتور من عليه برزنتيشن اليوم.. هههه بنت رفعت ايدها وانا كنت افكر لاني مسوي البرزنتيشن الصبح والدكتور يقول من الثاني ههه وماشي إجابة
بعدين قلتله انا انا دكتور ههه جلس يطالعني وقال مستعدين للبرزنتيشن.. البنت قالت ايواا ع طول وانا افكر أقول تو وش أقوله ذا مستعد ولا .. أخاف أقوله لا ويقولي أجله الأسبوع الجاي وانا اوردي قاص الفيزا عشان اشرد قصدي اسافر.. بعدين شافني الدكتور اني جالس افكر هههه قالي طبعا انت ما مستعد تو ماله ذا يقصف انا ما تكلمت هع
قلتله لا عادي ما اني مستعد بس بعرض البرزنتيشن قالي انا ماريد أي كلام اريد الطلاب ييستفيدوا منه اذا ما مستعد اجله الأسبوع الجاي وانا أقول فخاطري احلم هههه
المهم قال يالله فلانه عرضي البرنتيشن .. تو هي قالت البرزنتيشن مالي متعلق بموضوعه وانا بشرح موضوعه أصلا .. وانا اطالع واسمع
قال الدكتور ايوا صح .. وانا أقول فخاطري عيل يوم صح ليش عاطني هالموضوع وشاط عمري الصبح جالس ابحث وافهم
المهم البنت عرضت مالها وشرحت نص الي كنت أبا اشرحه هههه .. بعدين جاني الدكتور قالي انت وش بتسوي تو؟
بتشرح نفس الموضوع كذا بتنقص درجات لانك ما بتضيف شي جديد .. قلتله ما عليه انا بتعمق فيه وبشرح زيادة.. وانا ما فاهم أصلا ههههه

بعدين نهاية المحاضرة جلست افكر أقول خلني اغير الموضوع واشوف وقت ثاني للبرزنتيشن.. عاد عطاني موضوع ثاني ههه
خلص الشرح قال يالله كل واحد يطلع لابه ويراويني الاسايمنت ماله واشوف الشعب كله جايب لابه حسيت نفسي غلط هههه
بعدين قلتله دكتور انا ناسي لابي ههه جلس يطالعني كأنه يقولي انت أصلا وش جاي تسوي هنا ههههه
قالي باكر اخر يوم معك الظهر تسلمه


جينا للمحاضره الثانيه وعاد جالس استعد للبرزنتيشن الثاني أقول باقي ذا بحاول ابدع فيه.. وانا وجالس احضر اشوف الدكتور الثاني جاي يركض صوبي
قالي اليوم ماشي محاضرة ترا.. قلت له افاا.. قالي ايوا انت بتشرح لنا عملي كيف نسوي الداتابيس ونبرمج في الساب وخطوة خطوة وخذ راحتك حتى لو تطول ساعه ونص او ساعتين..
وانا بس اطالع كذا وأقول فخاطري ما اتفقنا كذااااا
المهم عديته وشرحت من ساعه 12 لن 2 ونص وهلكني بالاسئله


سلمت اسايمنت واحد وبرزنتيشن واحد وكلهن ف نفس المادة
والمادة الثانيه هههه نص اسايمنت والامتححان ما شاء الله.. والبرزنتيشن في علم الغيب هع

وانتهت القصه مع الزحمة

"لا تؤجل عمل اليوم الى الغد"..
ما شاء الله عليي

اتذكر موقف أمس لما طلعت متضايق من دوامي على الساعة 12 الظهر..
اول ما ركبت السيارة جاني رقم غريب .. واقول فخاطري ارد ولا ما ارد هههه..
كنت خايف يقولوا لي ارجع او حد من الدوام يريد شيء..

لما رديت ع الاتصال.. الوو السلام عليكم
Hi, is this Mr X
ايوا انا
معك شركة PDO متصلين فيك عشان وظيفة مبرمج ومعك مقابله
تو انا ف عالم وهذيلا بعالم وجالس اقول فخاطري تو وش ارد هههه
تذكرت اني ابا اسافر وقلتلهم انا بسافر وهالفتره ماقدر .. قالولي متى يناسبك نزين عشان نحدد موعد o_O
بعدين قلت خلني اجرب يمكن تدق فراسي وانتقل معهم..
وتم تحديد الموعد وعسى خير
بس تفاجأت اني طالع متضايق ويجيني هالاتصال هههه كأنه اختبار لي..
او ان يمكن عشان ما اسافر ههه

كله خير من الله..
وقراراتي غبيه مثلي..

حان وقت النوم..
تصبح ع خير ي آنآ..

جدا جدا جدا منضغط من الدوام ..
الضغط النفسي اول مره يوصل حده خصوصا من الاشياء الي تحصل لي. .
احس وايد مستغلين طيبتي لدرجة اني صرت غبي في بعض المواقف او بمعنى اخر استغبوني وهضموا حقوقي حتى في راحتي..
وايد في خاطري اشياء و اول مره احط اشياء في خاطري وتأثر عليي كذا..
عادة لما يصير لي مواقف اطنش وانسى..
بس الي يصير لي في الدوام والاستغلال في الشغل رسخ في خاطري وايد اشياء صعب امسحها بسرعة..

ما أقول غير الله يعين..
اليوم داومت 8 وربع وطلعت ساعة 2.. صاير مالي خلق حتى اداوم..
اقول الحمدلله اني اداوم وغيري ما محصل وظيفة.. لكن ما توصل لدرجة الانهيار الداخلي ..
بكرا اخر يوم اداوم من شهر 4 ..
الحمدلله بطلع اجازة 3 اسابيع.. وخاطري اروح بعيد جدا جدا استمتع باجازتي..


تصبح على خير ي أنآ..

مهمآ حصل بيننآ..
آعترف آنني آشتآقُ إليگ.

اليوم المفروض كنت ماخذ اجازه بس داومت لاني تأخرت في نقل موقع الشركة الي مسونه من غير النظام الثاني
كلهن نقلتهن لهم في نفس الوقت.. وكنت من اول الصباح لن نهاية الدوام جالس ع كمبيوتري ما اكلم حد
المدير يجي صوبي يبا يكلمني شكله وبعدين يتراجع يروح هههه
بعدين مسكين رسل لي ع الواتس يتطمن


المشكلة اني رجعت حساس اكثر عن قبل محد قادر يكلمني اول مره يشوفوني كذا اتصرف لدرجة اني صرت اطنش ما ارد ع اي حد
اعرف ان فيه اشياء كثيرة اثرت عليي خلال الشهر الماضي.. انا ما متضايق بقدر ما اني متحطم داخليا من اشياء كثيرة..
ماعليه .. نقول نتعلم ..

ابا اقول وايد اشياء في خاطري لكن يمكن ما يناسب الوقت والمكان..
في النهاية انا دايماً الوم نفسي في كل شيء..
صدق يوم يقول المثل "الباب الي يجيك منه الريح سده واستريح"..