أنا في خاطري حاجه ولا ادري ويش ابي بالضبط
ولانـي قـادر اكتمهـا ولانـي قـادر ابديهـا

متهاه داخل اعماقـي بحـر حيـره بليـا شـط
خذاني موجها العاتـي عذابـي عـن موانيهـا

أبا اهرب من غموضي مير ماباليد حـل وربـط
ضياعي كلٍ يشوفه حقيقـه مـا اقـدر انفيهـا

أنا ما ادري مكاني فـوق ولا تحـت ولا وسـط
أسوق الرجـل واتبعهـا واقـول الله يسويهـا

أنا عايش بها لدنيـا بـلا قيـد وبليـا شـرط
مجـرد ظـل لايامـي تباريـنـي واباريـهـا

أنا ايامي سوا .. مافيه يوم اصعب ويوم ابسـط
ولا ادري كيف اميز بين حاضرهـا وماضيهـا

أنا مااشكي من احزاني ولاذقـت السعـاده قـط
ومع هذا أحـس النـاس واضحكهـا وابكيهـا

أنا واحد من العالـم أنـا جملـه تحتهـا خـط
أحاسيسـي غريبـه مـن بدايتهـا لتاليـهـا

أنا في صفحة الدنيـا حـروف ماعليهـا نقـط
حياتـي مالقيـت اللـي يترجـم لـي معانيهـا