ونمت امس ورجع نفس المنام اللي قبل يومين

من اول مارجعت من السفر..ماشفت لك بينه

وانا اللي كنت احسبك قبل ادوس ارض المطاربتجين

تكونين انتي اول شخص عيني تحتضن عينه

وكنت اتخيلك من زود فرحه رجعتي........تبكين...

واشوف بدمعتك حكيك..واعرفه قبل تحكينه

واجيب احلى من اللي بتحكينه... واتركك تحكين

تقولين:الوطن نور واقول:بنور مضوينه

تقولي لي:غديت احلى واقول:عيونك الحلوين

كلام نام بشفاهك وخفتي لاتصحينه

ذخريته لغرام اللي ينام ويتركك تصحين

تغانمتي غيابي..لين رجحتي موازينه

تعلم من يدك لمس الكفوف وعلمك تجفين

وليتك لاقيه به شي...فيني ماتلاقينه

ماهو بغرور...لكن خابرك مالك امل تلقين

تغافلك بغلا..والا الحلا..ماهو بمن زينه

تزينه الصور......بس الصحيح ابن الحلال(زوين)

وانا ماني بناقص عنه يوم انك تبدينه

نصيبي هو نصيبي لويسددها من الصوبين

قنوع بمظهري ...والسم مايذبح ثعابينه

على قول المثل((ماني حلو..لكن ماني شين))

اذا اهداك الزهر مره..فانا اهديتك بساتينه

واذا الهاك بفرح ليله..فانا تهت لبكاك سنين

واذا استضعفتك املاكه..وشتتك ملايينه

انا حتى فتات الخبزة اقسمها معك نصين

طموحي ؟؟بس اجي واظفر بشئ تستحقينه

تدينته تسلفته سرقته...مو مهم منين؟؟

كأني من كثر ماارضى بكل اللي تمنيته

لو انك تطلبين الله يعنيني بأقول:امين

انا ماالعب على الحبلين وقت الطيش وسنينه

تبين الحين يوم اني كبرت العب على الحبلين

ترى عند البدو بالذات عيب اللي تسوينه

حلاتك لاعشقتيني......تعشقيني ليوم الدين

غرام نسكن ضلوعه....حشيمه من مجانينه

جفا يجمع معزتنا......ولاعشق يذل اثنين

كثار اللي تحدوني وقالوا لي:تحبينه

امانه...لاتخليني صغير بعينهم...تكفين

لأني كل ماقالو تخون اقول:مسكينه

عليك الله وامانه..علميهم من هو المسكين

انا خايف..ليا طاح الجمل تكثر سكاكينه

وانا ماعادت ضلوعي تحمل طعنه السكين

مثل ماقالوا: المكتوب واضح من عناوينه

لو ارحل منك للغربه..بسافر من ظلامك وين؟؟؟

كفايه كل حلم يمر برقادي تزورينه

كفايه من تفارقنا وانا ماغمضت لي عين....

قبل يومين شفتك بالمنام وقمت من حينه

ونمت امس ورجع نفس المنام اللي قبل يومين