[align=center]
عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق

.
.


- يا نجم .. نورك ليه كده بيرتجف ؟
هو انت قنديل زيت ؟ أو تختلف ؟
- قال : أنا نجم عالي .. بس عالي قوي
و كل ما انظر تحت اخاف انحدف

.
.

وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام بيتقــــــــــــاس بالمســـــــــــطرة


.
.


ياللي انت بيتك قش مفروش بريش
تقوي عليه الريح .. يصبح مفيش
عجبي عليك حواليك مخالب كـــــبار
و ما لكش غير منقار و قادر تعيش


.
.


غمست سنك في السواد يا قلـم
عشان ما تكتب شعر يقطر ألـــــم
مالك جرالك إيه يا مجنون ... و ليـه
رسمت ورده وبيت و قلب و علـــم

.
.


حاسب من الاحزان و حاســب لها
حاسب علي رقابيك من حبلــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟


.
.


يا وردة قلبي معاكي في الريح لعب
لا بتعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب


.
.


أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه
ووشوشني قال :
لابد ما يموت شئ عشان يحيا شئ


للشاعر : صلاح جاهين
الرباعيات


[/align]