الجزء الثاني

صور كثيرة اختلطت براسه وحس بصداع فضيع وتذكر اللي صار
السيارة.. الشباب.. وصديق عمره
حاول يفتح عينه وشاف مجموعة شباب حوله
خاف ليش أشكالهم غريبة شو صاير راسه يعوره ومايشوف زين
فجأة جاه كف قوي وسمع حد يناديه
محمود: فيصل فيصل قوم
فيصل بدأ ينتبه: محمود أنت حي؟
وضحكوا الشباب كلهم
محمود وهو ماسك ضحكته: أيوى حي يالجبان
جلس فيصل وشاف نفسه بخير: جبان؟ قول شجاع وبطل شوفني بخير وعافية ما أثرت فيني ضربة السيارة
انفجر محمود من الضحك: يالخسف صاحب السيارة قدر يسيطر عليها وضرب بريك قوي لما قرب منا وأنت يالدجاجة أغمى عليك من الفزع ههههه

الشباب كانوا ميتين ضحك على فيصل وهو حاس راسه صغر من الفشله

في السيارة
محمود مازال يضحك على الموقف اللي صار: ههه قال أشرشحهم قال
فيصل: تعرف حسيت نفسي بموت
حمود: بيني وبينك أنا خفت قلت ف خاطري مامستعد أموت.. بروح أصلي ركعتين شكر وأنت بعد
فيصل: روح زين فاضي أنا.. بالعكس من هاليوم بستمتع بحياتي أكثر بعد شو وراي أخاف أموت وأنا مامحقق أحلامي
محمود: مامنك فايده.. أنت صايع ضايع مابتتغير

رجع محمود لبيته

دخل فيصل غرفته وكانت الساعة 2 وجلس على سريره ومسك تلفونه.. دور بين الأرقام اللي عنده وقال: هذي زينة خليني اتصل عليها
_: ألو
فيصل: فديت هالصوت اشتقتله
_: توك تذكرتني
فيصل: أنت ف قلبي كل يوم بس تعرفي ظروف الدوام كل يوم سفره.. عسى بس ماكنت نايمة
_: كنت نايمه بس أنت أزعجتني
فيصل: حلو ردك.. إذا ماتريدي تكلميني خلاص باي
_: لحظة لاتزعل بس تعرف وراي دوام
فيصل: باي نامي
_: لا خلاص خلاص بسهر معك ماكل يوم أسمع صوتك بس فيصل أريد منك وعد
فيصل: أنت تأمري أمر
_: لاتتركني ولا تقطعني
فيصل: بس هذا ياروحي ماطلبتي شي من بكره بزعجك ياعيون فيصل
_: تسلم والله كلك ذوق
واستمر الحديت حتى الفجر كالعادة
*******
في الجامعة
كانن سهيلة وفرح مشغولات بالسوالف ومطنشات المحاضرة خير شر وكان الحديث كله يدور على ورقة الدفتر وبدون صوت عشان ماينكشفن

سهيلة: صدقش مافيه واحد فيهم ينفع
فرح: نحن نجي الجامعة عشان نشوف أشكال حلوة تفتح النفس وهذيلا قريعين
سهيلة: بس بو كمة زرقاء شكله لا بأس فيه
فرح: قبل أمس شايفه واحد في الممر عيونه خضرات ولد اللذين وأنا مبهته فيه وهو يتكلم ف التلفون
سهيلة: حلمي.. نحن مايغازلونا غير البغمان
فرح: خاصة ذاك بو ذنين.. بو يقول من حلاته عاد
سهيلة: ياخي هذاك يقتلني ضحك
فرح: أقول الدكتور شو كاتب ف السبورة ماأشوف منها هذي بو راس
سهيلة: شكري ربش لو ما هذيلا الأبراج كان ماقدرنا نسولف
فرح: سويتي الأسايمنت
سهيلة: إذا أنت سويته فأنا سويته ههه

وفجأة قال الدكتور: Farah can you please answer the question in p42
فرح من الربكه ماسمعت الدكتور زين وفكرته يقول لها اقري اللي في صفحة 42 وفتحت الكتاب وبدت تقرأ.. وفجأة سمعت الكل يضحك
رفعت راسها مستغربة

سهيلة: يالبقرة يقولش جاوبي ع السؤال اللي في الصفحة ماتقري

نزلت فرح راسها تقرأ السؤال ومن الفشله ماقدرت تتكلم: I don‎'t know the answer 
الدكتور: but I have just answer it while I was explaining
فرح: I‎'m sorry I havn‎'t pay attention
الدكتور: then why are you sitting here
‏*‏******
في المدرسة

حور: هههه بجد سويتي كذا
سماح: طبعا عجب أخليه يفشلني
حور: بس بجد أنت قوية أتمنى أكون مثلش
سماح: عادي أعلمش حبيبتي
حور: كيف
سماح: ايش رايش تجي عندي البيت
حور: ليش؟
سماح: بس كذا نسولف
حور: طيب بشوف كيف ظروفي وبرد عليش
سماح: بس أنا ماعندي رقمش
حور: انزين كتبيه .......9

ثريا: حور تعالي شوي
حور:لحظة.. من توصلي البيت سويلي رنة
سماح: عادي حبيبتي الحين أسويلش
حور: أنت جايبه التلفون؟
سماح: كل يوم أجيبه
حور: صح انش قوية.. خلاص أنا بشوف وبرد عليش

وراحت عند ثريا: ايش تريدي
ثريا: مو مجلسنش مع سماح
حور: عادي نسولف
ثريا: انصحش نصيحة لاتجلسي معاها هالبنت مازينة
حور: تعرفي إني ماأحب هالنصايح.. أنا بمعرفتي فيها أقرر إذا زينة أولا.. بعدين أنا أعرف مصلحتي وأعرف الصح من الغلط
ثريا: أنا علي حذرتش
حور: مشكورة
ثريا: أنت فاضية اليوم بجي عندش
حور: لا أنا بروح عند سماح.. ايش رايش نلتقي هناك
ثريا: توش كلمتيها عاد بتروحي تزوريها مسرعش.. أنت واثقة منها عشان تروحي بيتها
حور: استغفر الله.. بروح بيتها يابنتي بروح بيتها مابروح أتصيع مالش معقدة السالفة
ثريا: روحي وحدش أنا أجلس في البيت أحسلي
*******
اتصلت شذى بخالد: هلا حبي
خالد: هلا بهالصوت فديتك ..والله ينور يومي لما اسمع صوتك بدل هالأشكال
شذى: أشكال من
خالد: أشكال الشباب يالغيورة للأسف ماعندنا بنات في المكتب
شذى: لاوالله.. باي أنا الغلطانة متصله فيك
خالد: هههه فديتها الغيورة.. ياروح خالد والله بنات الكون كلهن مايجن نقطة ببحر جمالك وروعتك ياأم وسام
شذى: صدق خلودي
خالد: آآآخ هالخلودي تطعني في القلب
شذى: سلامة قلبك حبيبي
خالد: أنت بس لا تقولي خلودي وأنا أكون بخير
شذى: فديت روحك.. حبي بغيت أستأذنك أروح بيت أهلي وبتغدا عندهم وإن شاء الله العصر برجع
خالد: روحي وسلمي عليهم كثير بس أنا بجي عندكم العصر إن شاء الله أسلم على عمي وعمتي من زمان ماشفتهم
شذى: تم حبيبي.. ما تريد شي
خالد: بصراحة أيوى أريد شي بس خايف ترفضي طلبي
شذى: شو هو حبي
خالد: لا بس خلاص أخاف ينكسر خاطري لو مانفذتي
شذى: خوفتني قول شو تريد
خالد: بصراحة........ أمممم أريد بوسه
شذى: ههههه.. من عيوني بتجيك أقوى بوسة
خالد: لحظة لحظة خليني أجلس أخاف تطيحني هالبوسة
شذى: ههههه مستعد حبي
خالد: لحظة بس أربط حزام الأمان.. يالله مستعد
شذى: امممممواااااااه
خالد: لا هي خربانه خربانه خلاص.. دقايق وأكون عندك
شذى: اجلس اجلس مكانك بروح بيت أهلي
خالد: الله يعيني
***********
في الجامعة
سهيلة: هههه حلو شكلش وأنت مبوزه
فرح: ترا ما أنت اللي تفشلتي.. أموت وأعرف ليش دايما أنا اللي أتفشل وأنت لا
سهيلة: حظي حلو.. هاه شو تريدي تاكلي
فرح: اللي يسمعش يقول من زود الخيارات اللي عندنا.. أنت طلبي أي شي أنا بروح الحمام وبرجع
سهيلة: تمام

كانت فرح تمشي وهي سرحانة في الموقف المحرج اللي صارلها ولما رفعت راسها حصلت اثنين بياكلوها بنظراتهم
فرح فخاطرها: يا حلاتكم وأخيرا حد عبرني.. لازم أرقق مشيتي عن أتفشل بعد.. فديتني والله أنا كنت واثقة إني قمر بس محد مشجعني

طاحت ورقة من دفترها وانحنت عشان تشلها وسمعت طقطقة الكعب ولما رفعت راسها شافت ريم تتبختر بمشيتها ومرت من جنبها ولا كأنها تعرفها

حست فرح بقهر: يعني كانوا يشوفوا عليها.. مالت علي وأنا مصدقه نفسي أفففف ماترومي تطيحي أنت وهالكعب اللي لابستنه

وفجأة سمعت صوت دوية قوية وشافت ريم طايحه وكعبها ف صوب وشنطتها ف صوب وكتبها ف صوب وانفجرت فرح من الضحك
والشباب اللي كانوا يشوفوا على ريم يتقلبوا من الضحك وصرخلها واحد: سلامات الأخت عسى ماتعور البورش اللي لابستنه

قامت ريم تجمع أغراضها وراحت بسرعة

وصلت فرح الحمام وهي دايخه من الضحك ولما دخلت حصلت ريم عند المغسلة ووجهها محمر من الصياح
وراحت فرح تركض للحمام وقفلت الباب بسرعة وحطت يدها على فمها وكتمت صوت ضحكتها وحست بطنها يمغصها
*******
كانت أمل تساعد أم حسن في المطبخ
أم حسن تعز أمل كثير لأنها طيبة وشغوله وحاطه حسن فعينها بس ودها تشوف حفيدها قبل لاتفارق هالدنيا
أم حسن: أمل مافيه شي بالطريق
أمل حست وكأنه عمتها طعنتها ف قلبها بهالسؤال: لا والله ياعمتي خاطري أفرحكم بس الله ما كاتب
أم حسن: طيب يابنتي روحوا وتعالجوا.. الطب الحين الحمدلله تطور وناس كثير مثل حالتكم والله كتبلهم الشفاء
أمل: بس ياعمتي نحن رحنا وفحصنا وقالولنا سليمين ومافينا شي
أم حسن: أنتو صارلكم 5 سنوات متزوجين واللي مثلكم عاد عندهم ولدين وثلاثة
أمل: شو أسوي عمتي ما بقيت شي ماسويته بس ما صار
أم حسن: أمل لاتزعلي مني تراني أريد مصلحتكم
أمل: أعرف الله يخليش لنا

دخل وسام المطبخ وراح يركض لجدته وهو يقول ماما ماما
أم حسن: أبوووي أنت تعال يو روح ماماتك
شذى: السلام عليكم
أمل: وعليكم السلام شذوي عندنا؟ تو نور البيت والله
شذى: منور بأصحابه
راحت تسلم على أمها وحبت راسها
أم حسن: أنت وينش لاحس ولا خبر قاطعتنا مرة وحدة
شذى: ظروف الحياة يالغالية
أم حسن: ظروف الحياة تقطعش عن أهلش
شذى: الله يخليش ماه بلا عتب والله مشتاقتنكم موت وبتغدا عندكم اليوم ولا تزعلي الغالية
أم حسن: البيت بيتش.. وخالد وينه 
شذى: في الدوام بيجي العصر يسلم عليكم وبنروح
أم حسن: وليش ما تجلسوا لحد الليل تتعشوا عندنا
شذى: تعرفي خالد يرجع تعبان ويريد يرتاح
أم حسن: على راحتكم
********

فرح: ههههه والله فاتش نص عمرش
سهيلة: أففففف صارلش نص ساعة وأنت تتكشوخي خلا خلصيني مو صار
فرح: ههههههههههههههه وابطني ماقادرة هههه
سهيلة: خلاص أبوي معذرة ماأريد أعرف
فرح: لا لا خلاص بخبرش هههههههه
سهيلة: لما تتفيقي من الضحك خبريني
فرح: والله لو كنت مكاني كنت بتموتي ضحك
سهيلة: أنا سايره اللاب أنت جلسي ضحكي
فرح: جلسي مكانش
سهيلة: يالله قولي
فرح: وأنا رايحه الحمام شفت 2 يشوفوا علي لكن شو يا سهيلة يذبحوا حلوين موت مامثل البغمان بو معنا
سهيلة: والله؟ يعني جانا الفرج أخيرا
فرح: سكتي بس خليني أكمل.. طلعوا الماصخين يشوفوا ع البنت اللي وراي
سهيلة: وأنا أقول من متى حد يعبرش يالدغمى
فرح: مالت ع حظي.. واللي غمني أنه اللي وراي كانت ريم ومشت من قدامي تتلالي سويدة الوجه.. بس لو تعرفي شو صار
سهيلة وقوطي البيبسي ف يدها من الحماس كأنها تشوف فلم: شو صار؟
فرح: لما شفتها قلت ف خاطري مايصير تنخبطي أنت وهالكعب.. وماهي إلا ثواني وتجيش ريموه متكرسعه واندبغت ع الأرض وطش كل شي ف صوب

كانت سهيلة تشرب بيبسي ولما سمعت هالكلام انبطت من الضحك وطش البيبسي ف وجه فرح

فرح: أخيييييه يالحصه واااع تو بنقلب سودا عاد طالع من ثمش وأنت كلش جراثيم
سهيلة: هههههه حلفي فروحه أنه ريم طاحت
فرح: قومي قبل عسي وجهي ياللوع
سهيلة: ياخي عينش حارة الله لا يبلا حد فيش.. زين أنش تحبيني وماتكرهيني
فرح: صح والله ما انتبهت هههه أحلى موقف ف حياتي ما بنساه أبد
*******
كالعادة كان نايم وما هامتنه الدنيا ودخلت أخته الغرفة
زينب: فيصل ممكن تقوم أريدك ف موضوع
فيصل وعين مفتحه وعين مغمضه: موه باغيه
زينب: ممكن تقوم
فيصل: ياخي أنت لو تغيبي في الجبل كما هذيك البنت بو في المسلسل يكون أحسن
زينب: مشكور ياخوي
فيصل: العفو.. الحين ممكن تنقرعي برع
زينب عرفت أنه ما راح ينفع معاه شي فقررت تدخل في الموضوع: يرضيك أبوي زعلان من أمس على كلامك
فيصل: الله يسد نفسش كما سديتي نفسي بهالسيرة
زينب: حرام عليك هذا أبوك
فيصل: مو يعني أبوي باغتني أقطع لحمي وأعطيه اياه
زينب: أنا أشك انك انسان
فيصل: اختصري ماباغيه أبوش يزعل خليه يبتعد عني ولا يجي صوبي ولا يكلمني ولا أكلمه وبكذا الكل يرتاح
زينب: أبوي يخاف عليك ويريد مصلحتك
فيصل: قالولش صغير أنا مامحتاج حد يخاف علي أنا مرتاح بحياتي
زينب: أنت الولد الوحيد وأمي وأبوي خاطرهم يفرحوا بك
فيصل: انزين وليش ما يفرحوا لما أقولهم أنا مرتاح كذا.. طلعي برع
ورد نام.. نزلت دمعة حارة على خد زينب وطلعت وهي يائسه من أخوها
******
تجمع الكل ع الغدا وكانوا فرحانين بوسام وأمه
أبو حسن: هههه والله وسومي منور البيت
شذى حزت بخاطرها: وأمه تغيب مالها داعي
حسن: لا والله أنت الأصل ولا تزعلي
شذى: محد يفهمني غيرك هههه
حور: حسن ممكن اليوم العصر توديني بيت صديقتي
حسن: ومن هذي وليش تريدي تروحي عندها
حور اضطرت تكذب لأنها تعرف أنه حسن مستحيل بياخذها لو قالت انها بتروح تقضي وقت: البنت هذي ما شاء الله عليها شاطرة ف الرياضيات وقلت أروح عندها تفهمني
حسن: خلاص تمام بشلش
حور: مشكور عجب أسير أخبرها
أم حسن: جلسي كملي غداش
حور: بسني شبعت
وراحت تركض تخبر سماح
شذى: خسارة سلطان وفرح ما معانا
أم حسن: كل واحد ف دوامه
شذى: عسى يوصلوا قبل ماأروح
********
فرح: مابغيت تجي حضرتك جالس مخلني أحرص من ساعة
سلطان: دوكم البطرة ماتشكر ربها إني مكلف على نفسي وجايبنها
فرح: غصب عن شكلك أصلا
سلطان: أقول نزلي نزلي
وفجأة سرح نظره ف مكان بعيد
فرح: أووووي مالك
سلطان كان سرحان ف بنت عسل تمشي من جنب السيارة: شو هالدلع هذا
التفتت فرح وانصدمت لما شافت ريم
وتذكرت الموقف ورجعت تضحك: أمحق دلع
سلطان: فرح تعرفيها من هذي
فرح: هذي اسمها المنخبطه ههههه
سلطان: موه؟
فرح: ولاشي خلصنا حرك
*******
لما وصلوا البيت شافت فرح وسام قدامها وماصدقت نفسها وراحت تحضنه وتبوسه وهو فرحان: وابختي من هالعسل أمووووت فيه
سلطان: عجب وين شذى؟
طلعت شذى من المطبخ: أنا هنا
سلطان: زين جيتي وعبرتينا
شذى: أخبارك ياللزقه
سلطان: بخير يالحطبه
فرح: شذوي حرام عليش ماتعرفي كيف أشتاق وسام ليش ماتجيبيه عندي
شذى: مايستغني عن ماماته
فرح: هذاك لو أنت هنا بس دام مايشوفش فأنا ماماته
شذى: وهو ماعنده غير فلح وفلح
فرح: فديته أنا قلبي والله
*******
كانت سهيلة تشوف على وجهها ف المرايه وتتحسر ودخلت أختها: مابغيتي تجي
سهيلة بضيق: ايش اسوي محاضراتي تخلص ف وقت متأخر ومحد فاضي يرجعني فلازم أرجع مع الباص 
سوسن: أشوف وجهش.. كأنش مضروبه كالعادة
سهيلة: طبعا أخوش المحترم مامقصر فيني
سوسن: وايش مسويه ياقليلة الأدب
سهيلة وف عينها دمعة من هالكلمة: قسم بالله ماسويت شي شافني نازله من الباص آخر وحدة وفكر بيني وبينه شي
سوسن: يالسفلة بتسودي وجوهنا
سهيلة ودموعها تسيل: قسم بالله مافيه شي أنتو ليش ما تفهموا.. ترا لازم يوصلني آخر وحدة.. مايكفي أخوش سواله الرجال سالفة وقاله استر عليها وتزوجها
سوسن: طبعا شوي اللي مسوتنه
سهيلة وهي منهارة خلاص: لا حول ولا قوة إلا بالله
سوسن: قولي بعد ماتريديه تراكن تسون علاقات مع مليون واحد ولما يريدوا يخطبوكن تتهربن.. وشو قال؟
سهيلة خاطرها تضحك من سخافة أختها: قال أنا مالي شغل فيها لاتبلوني بشي
سوسن: شفتي كيف الخسيس تخلى عنش
سهيلة تحاول تكتم ضحكتها: نفس تفكير أخوش.. وهو من سمع هالكلام قفل علي الباب وطاح فيني ضرب لولا رحمة الله وتلطفه فيني كان مت
سوسن: ياريتش متي وريحتينا من سوالفش
سهيلة حبت تقهر أختها أكثر: وأزيدش بعد.. الرجال صار مايطيقني ويوصلني أول وحدة عشان مايبتلش فيني
سوسن: طاح حظش شكلش بتجلسي على كبودنا وخلي العلاقات تنفعش
وطلعت
جلست سهيلة وهي سرحانة ماتعرف تضحك ولا تبكي ع المأساة اللي عايشتنها
********
دخلت حور غرفة سماح اللي كان كل أثاثها روعة يعني غرفة بنت بمعنى الكلمة من سريرها اللي كانت شراشفه وردية إلى كباتها اللي كان بلون بيج وفيه فصوص فضية تلمع وستارتها الوردية اللي تتسل أشعة الشمس من خلالها بخفها وووو
جلست حور وهي منبهره: غرفتش روعة تفتح النفس
سماح: مشكورة حبيبتي فرحانة لأنش جيتي
حور: وأنا بعد.. أحب أتعرف ع الناس
سماح: سبحان الله نفس طبعي
حور: صدق؟
سماح: أيوى خاصة عن طريق الشات
حور: ههههه الشات هذا مايعتبر تعارف
سماح: بس تسليه لو تجلسي عليه اليوم بطوله ماتملي شوفي مثلا أنا من يوم جيت من المدرسة وأنا حدي متسلية
حور: طيب وريني شو تسوي.. أنا عن نفسي ماأحب الشات
فتحت سماح لاب توبها الوردي: شوفي.. جالسة أسوي شات مع ساحر القلوب
سماح: سوري تأخرت عليك
ساحر القلوب: عادي عسولة ولا يهمك بس وين رحتي
سماح: جات عندي صديقتي ورحت استقبلها
س ق: آهاااا تصدقي مليت بروحي جالس
سماح: ومامليت مني
س ق: أبدا.. أسلوبك حلو ارتحت كثير وأنا أكلمك
سماح: حتى أنا بصراحة
س ق: أنت دايما تدخلي؟
سماح: لا هذي أول مرة
س ق: أتمنى ماتكون آخر مرة
سماح: بصراحة ماأظن أنا ماأحب الشات بس دخلت أجرب وأشوف
س ق: وشو رأيك
سماح: فيس منحرج
س ق: هههه طيب عسولة أنا من ساعة أريد أطلع بس ماقادر أخاف ماأشوفك مرة
سماح: عادي اطلع إذا مشغول
س ق: طيب ممكن ايميلك عشان نتواصل
سماح: لا أسفة أنا مامتعودة اعطيي ايميلي لشباب
س ق: صدقيني بس أريد أتواصل معك وأعرف أخبارك
سماح: طيب  هذا هو ............بس اوعدني ماتعطيه لأحد 
س ق: وعد.. يالله باي

حور: أنت مجنونة تعطيه ايميلش
سماح: هي قصرت ع الايميل ترا بيطلب الرقم بعدين
حور: وبتعطيه؟
سماح: ع حسب إذا شفته زين أعطيه.. وتراني بخرفه رصيد
حور: ههههه والله حلوة السالفة
********
في غرفة فرح

شذى: غريبة خالد تأخر
فرح: شذى باتي عندنا اليوم خلينا نرجع لزمن أول
شذى: ما أقدر أخلي خالد بروحه
فرح: يالله أرجوووش يعني خالد مايصير يجلس يوم واحد بروحه
شذى: ماأظنه بيرضى
فرح: بليز حاولي معه خلينا نسهر نسولف مثل أول
شذى: بتصل فيه وبشوف ايش يقول

وبعد ثالث رنة
خالد: اللي لقى أحبابه نسى أصحابه.. زين تذكرتيني
شذى: وأنا أقدر أنساك.. بس تعرف لهيت مع أهلي
خالد: طمنيني عليهم أخبارهم
شذى: الحمدلله كلهم بخير.. خلودي ممكن طلب
خالد: لا أنت ناويه تذبحيني.. خلودي بعد مرة ثانية؟
شذى: هههه حبي أريد أنام عند أهلي اليوم
خالد: نعم نعم ماسمعت
شذى: هاه شو قلت حبي
خالد: طبعا لا
شذى: أفااااا ليش
خالد: ياروحي والله ماأقدر أنام وأنت ووسام بعيدين عني
شذى: كلها يوم واحد
خالد: أسف حبي مايصير حسي فيني
شذى: تمام حياتي ع راحتك
خالد: أنا الحين بطلع وجاي عندكم
شذى: تمام

شذى تكلم فرح: قلتلش مابيوافق
فرح: هذا زوجش يبغاله تصفيع مسوي نفسه روميو
شذى: حرام عليش

********
خالد: السلام عليكم
أبو حسن: وعليكم السلام هلا هلا خالد اقرب
خالد: كيف الحال
أبو حسن: الحمدلله.. ايش أخبارك وكيف الدوام
خالد: الحمدلله يسرك الحال
حسن: هلا والله بأبو وسام زين عبرتنا ياخي
خالد: ههه أهلين فيك.. مشاغل الدنيا
دخلت أم حسن: أي مشاغل قول ماتريد تجي عندنا
خالد: لااااه عاد كله ولا زعل عمتي
أم حسن: وبعد مامخلنها تجلس معنا
خالد: ما شبعتوا منها من قبل الظهر وهي عندكم
أم حسن: حد يشبع من ضناه

نزلن فرح وشذى اللي كانت جاهزة تروح
فرح: هاااه جيت روميو زمانك
خالد: أف السوسه هنا
فرح وهي ترقق صوتها: ماأقدر أنام وأنت بعيدة عني
خالد: ههههه بدا شغل الغيرة
فرح: ياخي ع الأقل جلسوا تعشوا عندنا والله ماشبعت من شوفة وسام
أم حسن: صح صدقها
خالد: مايصير أريد أروح أرتاح
سلطان: يالله الشمج عندنا.. يوم ع الراحة روح في المجلس وارتاح
خالد: جاء السوسه الغيرها

كان خالد يشوف على شذى وهي تترجاه بنظراتها عشان يوافق وماحب يكسر بخاطرها: خلاص تم بس بعد العشاء نروح

وفجأة رن تلفون أم حسن بنغمة مزعجة "we will we will rock you‎"‎

سلطان: هههه بعد العجايز يعرفن انجليزي
أم حسن: هذا كله من حور الزفته هي اللي تسوي هذي النغمات الماصخه

وراحت ترد ع الاتصال

أبو حسن: روح خالد في المجلس وريحلك شوي وبعدين تعال
خالد: إن شاء الله


فرح: الله بتجلسوا معنا
شذى: صح انش سوسه مرة لما تحني ع الشي
فرح: هههه فديتني والله
ومسكت وسام تحضنه وتدغدغه وهو كالعادة يضحك لها
وبعد كم دقيقة دخلت أم حسن: للللللللووووويييييييش يافرحتي اليوم
أبو حسن: خير إن شاء الله
أم حسن والكل عينه عليها: فرح انخطبت