تويت
يــــــمــــــة
يــــــمــــــة
يمه.. على الباب الشتا كشّر الناب
يمه .. دخيلك خايفٍ واحضنيني
أخاف ياخذني وأنا جلدي ثياب
يمه..طلبتك لو رجع دثريني
البارحة وقّف لي الحزن بالباب
مدري أنا وش بين حزني وبيني!!
كذاب وقتي والأمل ..ولد كذاب
كل يوم حلم يموت قدام عيني
في خاطري دمعة وفي صمتي إعتاب
ببكي ولا تبكيك دمعة أنيني
ولا تسألين الدمع عن ذيك الأسباب
أخشى في بعض الأجوبة تحرجيني
يمه..تراها ماهي بفتل الأشناب
وإن كانها..ماظن تقصر يميني
يمه..عطيني للأمل ذرة اتراب
ذاك الشعور اللي رحل من سنيني
محتاج لك مزنه..تبل أرض.. وهضاب
وإن ضعت.. محتاجك تقولين ويني
أخاف من ليلي..وصمتي..والأصحاب
ومني أخاف إن طول الجرح فيني
يمه..ولدك الشاب ما عاد بالشاب
تعبان..ولصدرك دخيلك خذيني
أو علميني للوجع أحسب احساب
واشلون أدفي دون مااحرق..يديني
وإذا لمحتي بعدها للشتا ..ناب
تكفين يمه..لو بكيت..احقريني