قالولك اسكت ما تحكيش
إنت خلقت للتلطيش
للحواجز للمعابر للتفتيش
كتبوا على جبينك ينداس
من الضابط للشاويش
فلسطيني وممنوع تعيش

فلسطيني ممنوع تثور
و مش مسموح تكون مقهور
إياك تطالب بحقك
اوعك بيوم تشوف النور
ممنوع تجدد هوية
ممنوع تجدد بسبور

فلسطيني و بدك تتعلم
هالشغلة ضد الدستور
فلسطيني لازم تتألم
من دون ما يشوفك دكتور

فلسطيني ممنوع تتظلم
ولا يطلع بجناحك ريش
فلسطيني واعرف إنك
إرهابي وممنوع تعيش

فلسطيني بكل المطارات
اسمك بالاحمر مكتوب
وعند مصلحة الجوازات
كتبوا علي جبينك مطلوب
لازم تتوقف ساعات
مذنب أو من دون ذنوب

ويتوجه الك اتهامات
إنك سبب كل الحروب
كأنو بسببك الحق مات
والعدل بأرضك مسلوب
وكأنك سبب النكسات
وكل أزمات الشعوب

وكأنو بسببك مجرم فات
على جنين بلحظة الغروب
وذبح صبيان وبنات
وعجوز على أمرها مغلوب
مع إنه الحقيقة...
أنا اللي بالدنيا ضحية

عملتوني ارهابي ومجرم
وقضية للي ما عندو قضية
أنا اللي راسي ما إنحنى
بوجه الريح القوية
أنا اللي شعبي صمد
في الضفة وغزة الابية
أنا اللي شعبي انتفض
و بحجر حارب دورية
واليوم ... وبكرة ... وللأبد
عندنا كلمة وحدة هي:


فلسطيني ومن حقي أعيش ... وعمرها ما تموت القضية !!