انا يا بنت لي طبع وتقاليد وقيم وسلوم
اسوج اعتا الدروب ولا رقيت ارقاعلى القمه
وانا يا بنت لي عزوه ونخوه وانتم لقروم
ولا احني هامتي وابقا بطبعي عالي الهمه
واذا صار الهوى كلمة خضوع وكبرياء ولوم
خلاص انسي محبتنا ولا اسمع من فمك كلمه
واذا كان الهوى عندك مشاعر صادقه وتدوم
تعالي واشربي قلبي غلا لو كان من دمه
احبك قبل ما اعرفك وصرتي في الخيال حلوم
يجيني طيفك العابر بصدر الليل واضمه
هلا يا ماس يا لولو هلا يا جوهر منظوم
هلا بك يا شبيه البدر لامن بان في الغمه
انا ون جيت ابا اعشق ما عشقت الا خيار القوم
وانا ون جيت ابا اكره ما كرهت الا هل الزمه
واحب بكل ما تعنيه كلمة حب من مفهوم
واجافي من جفاني واتركه وانساه واغمه
يصحيني سنا البارق وانا غافي بعز النوم
بليل يحضن العاشق كما طفل بحضن امه
اسافر في سما حلمي مع برق ومطر وغيوم
وخلف الغيم يجذبني سنا نجمه ورا نجمه
ترى حظي شحيح وعارفن حظي متاه يقوم
اكيد يقوم يا عمري متا ما صرتي بيمه
فقير الحظ يا عمري من احساس البشر محروم
يصير الحزن ابوه ويصبح الهوجاس ابن عمه
بقايا حلمنا والليل والذكرى وذاك اليوم
نهار كنت انا وياك فيه اقلوب ملتمه
قبل ما الناس تدري عن غلانا والغلا مكتوم
زمان ما دروا عنا هل الغيبات والنمه
زمان كنت انا وانتي يسامرنا قمر ونجوم
زمان نارد العد القديم ونرتوي جمه
وكان العشق حلم في سما ذاك الغلا مرسوم
نقشته في صخور الوقت واسمي كان فوق اسمه
اجيه بشوق ويجيني بعشق يا وراه اعلوم
يجيني في هجوع الليل راكد ما حد همه
على الذكرى تلاقينا وفرقنا زمان الشوم
زمان بث فيه الحقد بقلوب الغلا سمه
نويت ارحل عن ادروبك مدام ان الوفا معدوم
نويت اغيب عن دربك مدامك غير مهتمه
مدام ان العذول اللي وضع سيفه وهو مسموم
بقلبك لين بعتيني يمين الله ما اذمه