جالس ف حالي ولحالي
هزتني حاجة وذكرتك
وأثره يهتز تيلفوني
به رسالة من حضرتك
فيها: "معقولة يا سامي
كل هذا وما وحشتك!"


ما علينا.. بسنا من ذا الغاوي.. أحسن ندخل ف الموضوع بلا مقدمات، صاني مليت أسوي مقدمات كل مرة، ما جالس أسوي بحث تو أنا..

باختصار ياخي مشتاق المدرسة .. أمس دقتني عبرة يوم تذكرت ذكريات الزمن الجميل، ما أعرف هين سمعاننها ذي العبارة، ..

خلونا ف المهم عن نسير بعيد وما نحيد نضوي ، تذكروا زمان الطابور يوم يصفطونا ف ذيك الشمس تصلجنا من صباح الله خير؟
نعم أتذكر لين صف أول اعدادي كنا نصف طابور ف التراب وعاد مدر الهيال يلزق ف الثياب بمرة واحنا مبونا صغيرين وحلطين -صراحة لين تو حلطين- ، وعاد صف ثاني اعدادي حصلناهم مسويين أرضية غاوية بس بعدها كانت الشمس تسقعنا خاصة ع نهاية الفصل الثاني .. وعاد تطورنا يوم وصلنا ثالث اعدادي ورقعوها المدرسة بمظلة من ذاك الألمنيوم الغاوي ..

نزين عاد ذكريات داخل الطابور، كنا نسوي تحية العلم -ذيك اليوم كنت ف الكشافة- ومو سمه ذاك، مرة وحدة كان المدير واقف وراي وأنا ما عندي خبر.. عب نوبه ما أحيده مو استوالي ذيك اليوم وعفستها تحية العلم عفس ، وشوي وشفت الدنيا قلبت سودا، عثرنه المدير سطرني بكف متصفد ع الرقبة إلين ما شفت شي قدامي وعدتها سيدة ما تلخبطت.. ذوقيه

وعاد ثالث ثانوي والله ما أحيدني كماموه جبتها ذيك النسبة .. هذا الصف سلامتكم ما دخلته غير يوم امتحانات المنتصف ، وتو جالس أفكر وأقول واغيابك يافتى صحار لو يحيدك أبوك مو كنت تسوى ثالث ثانوي، نوبه هيه بمقشاع ع الراس ..

ولادي وبناتي، صاه أنا ما جالس أحكيلكم بلاش، باغنكم توخذوا العبرة والعظة -مصدق عمره صاحبنا- وباغنكم بو عنده ذكريات غاوية ف الطابور يحطها، صاه بعده واجد ذكريات عندي بس ما يوسعهن هنا..