جماعه اكلمكم عن ايام العز سالفا راح تسترجعوا اشياء جميلة و روعه كنتو تسويوها



كان ياما كان ‏​فـِيْ قديم الزمان
كانت الفلوس أقل .
السيارات أقل
قنوات التلفزيون أقل .
ساعات البث أقل.
ثيابنا أقل
نعولنا أقل .
بس الفرح والوناسة واااجد


كان هذا موسم البيذام والنبق وكنا ندور حارة حاره سكة سكة وسيح سيح
وكانت النعال أداة إسقاط البيذام الرئيسية

زمان الاول ننتظر حجاج الحاره يرجعون ونترجاهم عشان نحصل منهم كميم مزركشه والعاب الكاميرات الي تشوف فيها نيجاتيف صور مكة.والمسماه بالعكاسه. وكل سنه نفس الهدايا..والحين لما الطفل تجيبله الكامره بيقلبها ويعقها ولا يهتم يشوف ايش فيها..بطره


زمان اول كانت الحاره تغرق
ماي يوم يطيح المطر ونحن طبعا مستانسين في الطين ويتم الماي شهور طويلة مسوي برك في الحاره ..وشالين مضلاليتنا
سيل سيل سيليه
حمامه فوق لوميه
وكلما زاد المطر أرتفع صوتنا من الفرحه.
والحين من الدرايش فلان لا تروح برة تحت المطر عن تحم ولا تزكم
كانه اول اهلنا ما يحبونا..

اول مايشترون لنا نعال وكنادير الا قبل العيد باسبوع و كل ساعه نفتح كرتون النعال عشان نشوفها وننضفها..
وفي العيد نحاتي النعال عن تنقص وتخيس كأننا راكبين لاتدكروزر ههههه«.

زمان كان (بابوه) يشل كرتونه فيها زليبيا سمبوسه وسندويتشات بيض مسلوق وداغوس ويحوط في الحارة وينادي زليبيا زليبيا سمبوسه سمبوسه ونحن وراه ركض كل واحد شال بيده خمسين بيسه وذيك البيسه كنها عندنا ألف ريال

زمان ويا محلى زمان تنجح في المدرسة يوزعوا ميرندا وكراش وبيبسي .. حتى لو ناجح بدفره وعلى الحافه المهم ناجح شي كبير ..والحين لو نجيب الدرجات النهائيه ياالله ياالله كلمة مبروك..
زمان اول لو طلعنا نمشي و مر علينا معلمنا اللي يدرسنا في الصف بنرتجف من الخوف عن ينازعنا كأنه هو والدنا ونهرب

زمان اول لما تمر علينا سيارةشرطة
نشغل التوربو و ركض كل واحد ورا نخلةيندس
كأنه مار علينا عزرائيل
اما اولاد تو احتمال يعترضو امام سيارةالشرطه يعملوله حظر تجوال

زمان اول الوالدة تخبز ونحن نجلس جنبها ساكتين مؤدبين نترجاها تعطينا رغيف خبزة

زمن اول لما يجلس معانا ابونا نحس كأنه صاحب الجلاله جالس معنا نخاف ننطق حرف ولما يقوم ويروح عنا نسوي عيد من الفرحة
واولاد تو يجلسو مع ابوهم كأنهم جالسين مع اخوهم الصغير حساااافة

زمان أول أحلى زمان
أياليت الزمان يعود يوما...