السلام عليكم ورحمه الله وبركاته
الى من يهمه الامر
الموضوع مهم وخطير
ومثل ماهو معروف للجميع
ان طلاب جامعه السلطان قابوس
السكن الخارجي
يصرف لهم مبلغ وقدره ميه وعشرين ريال علاوه
عن السكن والنقل والاكل
ومشكوره الجامعه وجزاها الف خير
لكن الطمع والجشع اعمى ابصار اصحاب العمارات والشقق في الخوض
الى درجه ان الغرفه المفرده
وصلت قيمتها الى 100 ريال
يعني لو الواحد دفع 100 ريال حق الغرفه شو راح يبقى لك
والمساكين هم طلاب سنه الاولى الي توهم طالعين على الدنيا وماعارفين وين الله حاشرهم
اقل شقه الحين معروضه حق الايجار في الخوض
3 غرف من دون صاله ب170 ريال؟؟؟
وانا اذكر لما كنت سنه اولى كانت الغرفه ب30 ريال وصاحب الغرفه هو
الي يركض وراك مو انته تحايله عشان ينزل لك 5 ريالات من الايجار
الحين الغرف والشقق ضاربه فوق وصايره نار
وين الحكومه عن هذيلا ؟؟
يعني هذي حريه التجاره المفروض ان هذيلا التجار يراعوا الطلاب
المشكله في طلاب سنه اولى
احنا شققنا عليها عقود من اول ما سكنا وماحد جاء يكلمنا في سالفه الايجارات لان
هذا الشي متفقين عليه من اول
لكن هذيلا الاخوان
يريدوا سكن في اي مكان وباي سعر
وهم بعدهم ما يعرفوا الحياه كيف راح تكون
وعاد الي ماعندهم سيارات الله يعين كيف راح يذلوهم اصحاب التكاسي
انا اذكر يوم سنه اولى كنت احيانا ما احصل تكسي ويوم احصل اكون بروحي
يقول لي اقل من 800 ما اوصلك الجامعه
والواحد في مثل هذي المواقف يضطر يعني
بالعقل من الخوض الى الجامعه 800 بيسه
ارجوا ان الموضوع يوصل الى اصحاب القرار
ويتخذوا قرار في هذا الموضوع الخطير
والله يعين الطلاب الجدد
وبالتوفيق للجميع