ما كنت اعتقد اني في يوم الأيام سأكتب في منتدى عماني ولكن بسبب أحداث اغلاق سلبة العرب وتبعاتها اكتب عن تجربه مريره عشتها بسبب سلبة العرب ويمكن عاشها ناس كثير بسبب حرية الفكر اللي كل الناس تتكلم عنها واللي للأسف في ناس كثير ماتعرف معناها.

بس قبل لا ابدء اريد كل شخص يقرء هذه المشاركة انه يراعي الآتي:
- أنا ما اتحامل على اي منتدى لأني أعرف قيمة هذه الآداه وكان لها الفضل الكبير اني تعلمت اشياء كثيره عن طريق المنتديات من نهاية التسعينيات وبداية الألفيه الثانيه ساعدتني في عملي وحياتي.
- المنتديات فيها مشاركات كثيره ما لها اساس من الصحة واحيانا تستخدم بشكل سلبي من قبل الناس بدون اي تفكير وفيها كثير كلام منقول او كلام غلط يريد اصحابه تحقيق غايات شخصية او فقط مجرد التنفيس عن كبت لأحساسهم بالظلم او التمييز ألخخخخ.

قصتي انه في يوم من الايام قبل اكثر من عامين في شخص كتب موضوع عن مؤامره بحيث انه يظهر بمظهر البريء المسكين ويتهمني بالتواطيء مع احد اصحاب الاعمال واحد من الوزراء. الشخص اللي كتب الموضوع كان يتكلم عن استنتاجات محضه بدون اي حقائق لأنه يعرف انه ما عنده اي اثبات لكلامه وحب انه يسوي شوشره عشان يحقق اهدافه الشخصيه.

الناس منها تأثر بكلامه لأنهم ما يعرفو غير اللي يقرؤوه بس الناس اللي كانت تعرف كانت تضحك عن سعة خيال الكاتب. انا ما رديت على الموضوع بس في احد من اللي يعرفو الحقيقه ما قصر وكتب رد. لكن ايش ينفع الرد بعد ما قام شخص من دون ضمير بأتهام شخص لمجرد احساس! هل الناس اللي قرأت الموضوع تعرف انه الشخص اللي كتب الموضوع كان في ورطه وكان يريد ينتقم عن طريق نشر قصه من خياله!!!! هل كان الشخص يتصور انه بعد كل هالمده انه في ناس لما تشوفني تنظر لي بنظرة شك!!!!!!!!

الانترنت فيها كثير من وسائل التعبير عن الرأي لكن التعبير يكون سليم لما نحترم الناس الثانيين مو لما نشوه سمعتهم.

للأسف في ناس كثيره تكتب بدون ما يكون عندها ادنى فكره عن المواضيع اللي تكتبها او حتى االي تعلق عليها. يمكن الشخص يكتب عن انطباع بس مو حقائق والناس اللي تقراء تصدق الكلام على انه حقيقه 100% وفي ناس تكتب عشان تحدث ضجه لا أكثر.

في ناس كثير تدخل الشبكه وتكتب وتسوي اشياء بدون ما يكون عندهم ادنى فكره انهم معرضين للملاحقه نتيجه لأعمالهم وانه في وسائل كثير لتعقبهم وفي ناس لها اغراض دنيئة تكتب لتحقيقها.

كلماتي الأخيره: اذا كتبت، اكتب بضمير واذا سمعت كلام لا تنقله على اساس انه حقيقه عشان ما تعطي انطباع خاطىء. اصحاب المنتديات ومشرفيها وفرو مساحه لك للتعبير عن الرأي فلا تسيء التصرف وتظلم غيرك.

دعائي للأخوة بسبلة العرب انه تنفك عنهم كربتهم وترجع سلبة العرب منبر من منابر التعبير الصادق للمجتمع العماني.