والله وأنا مثلك تعبنا ما ماسكين غير كلمة فساد فساد فساد ومعنا أدلة ..

كلنا نريد التغيير والإصلاحات .. وإن شاء الله كل شيء يتحقق .. بس تعبنا كل واحد قام وقال خلا نسوي اعتصام .. والله ترى بس تعبنا من حال البلاد كذا ..


عمان الغالية عمان الحبية ليش ما تفكروا فيها .. ليش ما تفكروا ف القائد اللي جالس يغير كل مرة شيء عشان يرضيكم ... وفوق هذا تجيوا تششكوا في مصداقية القرارات ..

بس بس يكفي

فعلا حالنا ما يسر ...
بصراحة وانا أشوف هذا الشي يصير في الدول الثانية قلت عمانيين وإن سووا ما بيسوا أعمال تخريب ولا شي..
وألحين صاير أي شي يخطر ف بالهم سووا مظاهرة..
واللي يقهر انه أحيانا يسووا مظاهرات ع أشياء ما تستحق ومن ناس مثقفين ومتعلمين ..
سبحان الله لما نفكر فيها قبل اشهر كنا نحتفل بالعيد الأربعين واليوم مظاهرات وتخريب...
نريد الاصلاح نعم .. ولكن ليس بهذه الطريقه...
وجلالة السلطان ربي يحفظه ما قصر وقام بتغييرات كثيرة والقادم أحلى بس اهم شي ما نستعجل وناخذ الامور لعبة وتقليد...

يسلمووو أخوي وطرحك للموضوع..

معكم حق وكله تقليد البلدان الثانية وين راح العقل بس صدق من قال إن لم تستحي فافعل ما شئت
وقابوسنا بس ساكت للحين عنهم من احترامه لهم فقط وما يريد منازعات ولا هو قادر ينظف عمان
من هذولاء الحثالة وعذرا على الكلام القوي بس يقهرني انكم تسوا كذا وهو مسكين كل مرة يصدر مراسيم
بس عشانكم وكرمال الدولة هل تريدوا تسقط دولتكم لا سمح الله فكروا شوية وحكموا عقولكم~

ما اقول غير اخ عليهم اللي يسوا هالحركات صراحة واجد مصخوها الله يهديهم وترد عمان هادئة ومثل اول ويحفظ لنا ابونا الغلي السلطان صراحة ما نعرف وش كنا بدونه الله يطول لنا عمره

تعبير عن الرأي لاه
اذا بدون ضرر للمجتمع ف عادي الناس يتظاهرو عشان يحلو مشاكلهم بدل الجلسه ف بيت ومذله م الغير

اسمح لي لجولك ان لولا هالاعتصامات كان ماتغير شي م حال العرب كان ابن علي ومبارك بعدهم ع مناصبهم وشعوبهم ميته جوع وكان علي ماجد وامثاله ما اخافوا الله ووجفوا نهب وسرق لبلادنا المظاهرات لها اكثر من جانب وجانبها المضئ هو اللي يغير الشعوب لان فيها تتوحد كلمة المظلومين ولان ايد وحده ما تصفج والمظاهره توحد كلمة الشعوب وهمومها,,,,,,,صدج ناس تخرب وحرق وهذا غلط بس هذا ما يعكس هدف المظاهرات

اوافق الرأي حسافة ع ما ال الية الشعب.... وحسافة ع المستوى التعليمي ..... كل القنوات تبث ع عمان بدل ما كنا نشوف الخراب والدمار للدول الثانية ...اصحوا يا شعب سلطانى ما بيقصر .....وبعدين شو المطالب الي العقل ما يقبلها مثل اهل عبري يريدوا شغالة ف كل بيت ولا بحر. ولا هي مشكلة عناد وبس ... وين الامن والاستقرار الي كنا نعيشة الي الكل يريد مثل حاكمنا وشعبنا شو صارلكم . افيقوا ما صارت ... الكل يعيش ف خوف الحين بسبب التهديدات والاغتيال

أشكر الاخوة على طرح هذا الموضوع الى يكون فى مصلحة الكل..
الازمة والمظاهرات وكل الدمار إلى شمل السلطنة كل هذا لأجل ماذا ؟؟من أجل نقص فى الحقوق.. حسنا اعترضوا بدون نزف الدماء فى الشوارع او تخريب اوتكسير واهانة كرامة الاخرين ..
والمطالبة حق لكل إنسان ولاكن بحدود دينية وأخلاقية بدون التعرض لاحد
وهكذا قد تكون المصلحة شملت الجميع..


مع تحيات طالب التطبيقية

لما نسال ليش كذا يقلو
<<دميقراطية>>