{ .. الامتحانات قربت !!

][ .. يوم سيء ! ..][

اليوم الثالث اللي يمر علي بدون ما أكمل دراسة !!

صار لي جم يوم واقفة عند نفس الصفحة، كل يوم افتحها وأقرا فيها جم سطر وما اكمل !

المفروض ان قدامي 6 أيام احضر فيهم لـ امتحانين،، وبيكونون أصعب امتحانين لـ هالسمستر
مرت 3 أيام وللحين ما خلصت مادة وحدة، أعوذ بالله من الشيطان !!

يعني لازم أضغط نفسي عشان اخلص المادتين قبل يوم الأثنين،، الله يستر .. .. !



:
:
][ .. بحث مستمر .. ][

اليوم رحت أقدم أوراقي لوظيفة "أتمنى احصلها للصيف" ،

لأن جد بموت ملل إذا يلست في البيت 3 شهور ورى بعض !!

من أول طلعتي من البيت والسالفة نحاسة × نحاسة ،،

أول شي اتصلت بالمؤسسة ، وردت علي الموظفة وقالت ان اليوم آخر يوم تسجيل ..

الحين زين جي ؟؟ .. صار لي جم يوم اقول لأخوي يوديني ، ، و هو كل يوم يأجل .. ..

سويت حالة طوارئ فالبيت .. وطلعنا للمؤسسة،، بس اللي صار ان اخويه ما عرف وين مكان التسجيل !!
تمينا نحوط بالسيارة وانا ادعي ربي ان ما يخلص الوقت ونحن بعدنا ندور ..

والحمدلله .. وصلنا أخيرا للمكان المطلوب ،، بس يوم وصلنا وحصلت قسم التسجيل، كان في شاب داخل + أربع موظفات ..

واستحيت أدخل قبل ما يخلص أموره ويطلع .. بس طوّل !!

آخر شي قررت أدخل ،، واللي فيها فيها

اللي قهرني،، وحدة من الموظفات كانت بصراحة واااااايـــــــــــد Over !!

يعني ماخذة راحتها فوووووووق اللزوم و بصراحة مبين انها تتصرف بتكلف واصطناع ..

كانت تضحك بشكل هستيــــري ،، ومسوية إزعاج مش طبيعي أبدا ، حتى ما عرفت أركز في البيانات اللي اكتبها !!

واللي قهرني اكثر انه الضحك و الحركات كلها كانت جدام الشاب،، أحس موووول مش حلو هالتصرف منها !!

ولما خلصت وطلعت،، شفت اخويه مضايج، يقول لي : شو سالفة هالضحك كله داخل !! اذا هاييل اللي بيشتغلون وياج فـ من الحين اقولج انسي السالفة !

واللي يضحك في الموضوع ،، انهم عطوني ورقة فيها تعليمات الوظيفة في حال انقبلت ،، ومن ضمن التعليمات ، انه ممنوع الضحك اللي ماله داعي او المقصود منه لفت الانظار والانتباه ،،

سبحان الله بس !



.
:
.

][ .. مقالات ..][

من فترة بديت اجرب الكتابة الصحفية،،

والحمدلله، بعض مقالاتي حازت قبول التحرير ،

بس اليوم حدرت موقع الجريدة،، ولمحت مقالي منشور ،،

وبصراحة ؟!... ما عرفته من كثر التعديلات اللي فيه !!

الفقرات مغيرين ترتيبها،، وصياغة الجمل مش هي أبدا !





.
:
.

أراكم لاحقا ^_^

يقتلني ان لا تتحقق امنياتي ..


يقتلني ... !

لماذا توجد هذه اللفظة في اللغة ان كان لا وجود لها في الحقيقة ؟!

ام أننا نطلب الكثير ... !!


لست أطلب الكثير ..

هو أمر في غاية البساطة ..

في غاية السطحية ربما ..

لكنه مهم جدا .. جدا جدا بالنسبة لي ..

وما يقتلني حقا ..

انني ما أن اطلق العنان لقلبي كي يتلفظ بامنيتي تلك ... حتى يتحقق العكس تماما !



تبّت حقيقتك ِمن أمنية ..


تـــبّتْ !!!!





إلى انتفاضة أمنية :



استمري ... هكذا الارواح تنمو ..

هكذا يبزغ حقّ ..

اغزلي الأيام صبرا ..

وانثريها كالورق ..

ثم اجمعي أشتات ذاتي ..

وانفضي عنها الغسق !

أصبحت قاب ساعتين أو ادنى من أول امتحان

<-- خااااااااااايفة !!

دعواتكم


:*_*: