وحيد.. وسكة عيونك تنام فْـ مهجة المحظور
ذبل فيني الأمل حتَّى ذوى زيتوني وتيني

رحيق الزهر ما يروي ظما قنديلي المكسور
أخاف من الجفاف وغيمتك ما جت تواسيني

لأنك كنت ميلاد الحياة وعطري المنثور
وأجـمــل دعوة كانت ترفرف بين كفيني

عقيمة أسئلة هالجرح وأطراف الإجابة زور
زرعت الياس ما بين الشفاه ورعشة ايديني

سألتك، كانه غيابك عتيم وشوق قلبي سور
متى شوفـك يبدد هالـمساحة المعتمة فيني

سألتك، والذي خلاّ عيونك ما تشوف النور
علام النور ما يقـدر يحط عيونه بعيني؟

سألت الرمل ويدينه غليظة والأراضي بور
متى حضنك يصير أرحم وتحضن بعدها طيني!

هنا يبست بساتينك وصار الشارع المهجور
يـودّي للـضياع وغـربة أيلولي وتشريني

هنا وانت القريب المبتعد والغايب المعذور
وضحكة فجر يغريه الغياب بخسف تكويني

ألا يا أوّل خيوط الوضوح وذنبي المستور
ألا يا آخر فصول الحصاد.. الريح تحنيني

تعبت أتسوّلك خبز الحقيقة والسّنين تدور
ورا قمحك، رغم كل المحل، ما عاد يغريني

مدامك صرتي أقفاص الحياة وحلمي العصفور
يموت الحلم من كثر الجفاف، وتذبل سنيني