إعـــــــلان

**راعيها عاشقها (ولد لوى)** · 15-07-2009, 05:56 PM

رواية (راعي سمحة)
من تأليف الكاتب المبتدئ: ولـــــد لـــــــوى
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ
الفصل الأول

عائلة المرحوم حمد تتكون من زوجته ام مراد وولدها مراد اللي عمرة 22 سنة وهو حاليا عاطل عن العمل وبنتها شوج اللي عمرها 19 سنة خلصت الثانوية العامة بس تأخرت عن التسجيل في الجامعة بسبب وفاة ابوها وماحبت تخلي وحدها وهي البنت الوحيدة وهم يسكنون في ولاية لوى بحلة اسمها لوى الجديدة.

شوج بنت وايد حلوة لون بشرتها قمحي وعيونها عسلية وواسعة وشعرها اسود طويل طولها متوسط ووزنها متوسط.
شوج وهي يالسة تشوف التلفزيون في الصالة : اماه ترانا يعنا وين هالغدا؟؟.
الام وهي واجفة تطالع شوج بتحسر : جلنالج روحي بيت المعاريس تغدي ماعيبج.
شوج : يمه كم مرة بجولج مارايحة مارايحة بيت هالخيس ولا نسيتي شو سووا فينا؟؟.
الام : ياشواجي ياحبيبتي الله كريم صح ان بنتهم طردتج من بيتهم بس كنتوا صغار الا صف خامس.
شوج: الله لايوفجها عساها ماتتهنى بحياتها الزوجية .
الام : الله يهديج انا بروح ازهب الغدا وانتي روحي وعي اخوج اذن الظهر من زمان.
شوج : اف اف انزين انزين بوعيه.
وبعدين تركب شوج الدري وهي تتافف من القهر وتدج ع باب حجرة اخوها مراد بقوة.
شوج وبصوت عالي : مرادوو اذن الظهر من زمان جوم بسك رجاد يالله.
مراد وبصوت عالي وبغضب : اذا مارحتي من هنا بييج وبكسرلج راسج يالدبة سمعتي.
مراد شاب اسمراني طويل وعريض وسيم وعيونه عسلية .
شوج وهي معصبة : زول والله عساك ماتنش من ع فراشك مول.
مراد يطلع من الغرفة ويمسك شوج من شعرها وهو يجول : انتي ماتسمعي الكلام يالدعنة؟؟ .
شوج تصارخ وتجول : أأأأأي راسي امايووو لحجي علي بيذبحني.
مراد : بذبحج اذا ازعجتيني.
الام من الطابق الاول وبصوت عالي : لابارك الله فيكم من عيال هدها هذي اختك.
مراد يودر شوج وقبل مايدخل غرفته يجول : زولي من هنا .
شوج وهي تنزل الدري تجول: اماه يدعي علي الطفس.
الام: برايه هذا اخوج مب مشكلة دعوته مب مستجابة.
شوج : انزين يالله يالله تعالي نتغدا انا يوعانة وبعدين وين الداغوص؟؟.
الام وهي تتجه للمطبخ : تراني انا الشغالة.
شوج وهي يالسة الا وصاح موبايلها : ترررن ترررن.
شوج تاخذ الموبايل وتطالع الرجم وتجول : اف ومنو هذا بعد رجم غريب ارد ولا ماارد.
شوج ترد ع الموبايل: الو منو معي ومن تبي؟؟ .
المتصل : انا عصام واريدج انتي فديت عيونج.
شوج وبعصبية: تراني بنت عرب ومااتعامل مع اشكالك باي .
وقبل ماتجفل شوج الخط الا والمتصل يجول : لحظة حياتي انا ماجلت انج مب بنت عرب ليش تضنين فيي سوء فديتج؟.
شوج: اجول بالطجاج اللي يطجك زول من ويهي لاسبك ويا هلك.
تجفل شوج الخط :مالت عليه ويا ويهه.
تدخل الام وبايدها غرشة الداغوص وتجول: منو هذا بعد ماودرتي احد بحاله مول؟.
شوج : انتي يلسي وحطي الداغوص.
الام : اندوج صرطي ترسي هالبطن.
شوج: متى بفتك من حنتج واروح بيت ريلي.
الام : امين يارب بس انتي من يباج؟؟ .
وفجاة ينزل مراد من غرفته وهو لابس دشداشته اليديدة ومتعمم ومتعطربعطر فزاع .
مراد: تراني انا طالع ومابتاخر .
الام : وين رايح ومتكشخ اخاف رايح تخطب ؟؟.
مراد : لا اطمني يوم بفكر اخطب بشحنج معي بالسيارة .
شوج : هههههاي ومن هذي تعيسة الحظ اللي بتاخذك؟؟ .
مراد : العنزة اخت التيس اللي بياخذج.
الام : روح روح عن تتاخر وحط بالك ع الطريج .
مراد :انشالله اماه يالله حياج.
الام : حياك .
مراد يطلع من الباب وشوج معصبة وتطالع امها .
الام : اشفيج تطالعيني؟؟.
شوج : مليت من الجعدة بالبيت ولا مراد يوميا برع.
الام : ماعلي بنطلع انشالله اخر الاسبوع وتو هاه خلصتي غدا اشيله ولا بتشليه؟؟ .
شوج : شيليه انتي انا بروح غرفتي .
شوج تتجه لغرفتها في الطابق الاول بعد ماتغسل ايدها الا ويصيح موبايلها : ترررن تررررن
شوج وهي تنشف ايدها بالفوطة تجول : اف اف .
الام من الصالة وهي تجشب مكان الغدا بصوت عالي : شواجي ترا موبايلج يصيح .
شوج : تو تو بيي.
تطلع شوج من غرفتها للصالة وتتجة للموبايل وتاخذه وتجعد ع الغنفة وترد: الو منو معاي؟.
المتصل : القوس قوسك والسهام سهامك.
شوج : ااااها مريوووووم .
عائلة عم شوج بو عبدالله والمكونه من بو عبدالله وزوجتة ام عبدالله وبناتهم مريم 19 سنة مخلصة دراسة ويالسة في البيت وهي رفيجة شوج
واختها حصة 24 سنة تشتغل موظفة استقبال وعندها سيارة لاند كروزر .عبدالله 23 سنة يشتغل مدير موارد بشرية وهزاع عمره20 سنة ويدرس بجامعة السلطان قابوس.
مريم بنت حلوة عليها جسم بشرتها بيضة وايد وشعرها وعيونها سود وساع.
المتصل (مريم ) : عرفتيني صج انج خطيرة .
شوج : وحد ينسى صوت بنت العم وبعدين منين لج هالموبايل؟؟ .
مريم : ابوي شراه لي بسالج وين مراد ؟.
شوج : اعرفج ماتتصلين الا عشان مراد ع العموم توه طلع .
مريم : شواجي فديتج تعالي بيتنا .
شوج : وليش ماتيين انتي؟؟.. كله بيتين وشارع وشريشة .
مريم : انزين انزين بييج العصر باي.
شوج : تمام باي .
تدخل الام الصالة وشوج جاعدة ع الغنفة ميودة موبايلها .
الام: شوج شوفيج من متصل ؟.
شوج :بنت عمي مريووم بتيي عندنا العصر.
الام : خطيبة مراد فديتها انزين انا بروح بيت المعاريس سكري الباب بالمفتاح.
شوج : انزين ولايهمج باي.
الام تدخل الحجرة مالها في الطابق الاول وتلبس عباتها وبرجعها وتطلع.
الام : يالله انا بروح سكري الباب.
شوج وهي متجهة تسكر باب الصالة : اوكي مامي حياج.
شوج تتجه لغرفتها ...وهي شاله موبايلها .....وتشغل المكيف وتسكر الباب والليت وتحط الموبايل يم الشبرية وتروش بنفسها ع الشبرية وترجد الا ودجايج يصيح موبايلها ع مسج : ترررن تررن ترررن ترررن
شوج وهي منزعجة تنش وتفتح موبايلها وهي تقرا المسج : شواجي جولي حج امي اني بتاخر الليلة وبتعشى برع .
شوج تكتب مسج وترسله وترجد : تمام باي .
والساعة ثلاث وخمسة واربعين دقيقة ياذن العصر وفجاة تنش شوج وهي عاقدة حواجبها.
شوج : ياربي ماوحيت ارجد بجوم اصلي.
تجوم شوج وتصلي وبعد ماخلصت صلاتها الا وباب الصالة يدج.
شوج : تو تو دقيقة.
تتجه شوج للباب وتحط الليسو ع راسها وتفتح الباب.
مريم : ساعتين يالدبة وانا ادج الباب وينكم .
شوج : ترا ماحد في البيت غيري .
مريم : وليش ماجلتي من قبل عشان ماايي.
شوج : عن الطفاسة عاد يالله دشي.
تدخل شوج ومريم غرفتها وتبدي سوالف البنات المعتادة.
شوج : والله لج وحشة يابنت العم.
مريم : ولمراد بعد وحشة الا جولي وينه؟.
شوج : ماعرف بس بيي متاخر الليلة.
مريم :اها بغيت اسالج انتي بعدج رافضة فكرة زواجج من اخوي عبدالله؟.
شوج : اكيد هو مطرشنج تساليني؟؟؟... انزين... ايوة بعدني رافضة.
مريم : انتي تحبين واحد ثاني جولي وسرج في بير.
شوج : بصراحة ايوة بس لاتجولين لحد.
مريم : من هو ؟ وولد من؟.
شوج : مااجدر اجولج .
مريم : اوكي مثل ماتحبين.
( وطبعا شوج جالت جيه عشان تفتك من حنة مريم واخوها عبدالله ولان مريم وعدتها انها ماراح تخبر احد )
عبدالله شاب وسيم مرتب عريض وعليه جسم طويل ابيض شوي وعيونه سود شعره اسود وطويل لحد كتفه .
واستمرت السوالف ولما يات الساعة ست ونص .
مريم : هههه والله الجعدة وياج ماتنمل ياشواجي .
شوج : ادري الكل يجول جيه .
مريم : يالله انا بروح جومي وصليني عند الدروازة عبدالله بيمرعلي.
شوج : تو الناس بس يالله مثل ماتبين .
شوج وصلت مريم عند الدروازة وكان عبدالله جاعد يترياها باللاند روفر .
مريم : يالله حبوبة باي زوريني .
شوج : باي حبيبتي.
البنات يسلموا على بعض الا وينزل عبدالله من السيارة ويتجه صوبهم.
عبدالله : السلام عليكم.
شوج ومريم : وعليكم السلام .
عبدالله : شخبارج شوج؟؟.
شوج : تمام الله يسلمك وانت شخبارك؟؟ .
يشوف عبدالله على اخته مريم بنظرة عسب تروح السيارة.
مريم : يالله انا بترياك بالسيارة باي شوج .
شوج : يالله مع السلامة.
عبدالله : انا تمام دامني شفتج .
شوج وهي متمللة : زين ...وبعدين .
عبدالله : شوج انتي بعدج رافضتني؟؟ .
شوج : انا مارجع عن قراري ابدا ياعبدالله.
عبدالله : طيب شو السبب؟؟ ...انا والله احبج ومارح احب انسانة غيرج.
شوج عصبت ونظرت لعبدالله نظرة كلها كراهية وتجول : بلا هالكلام الفاضي... ولاتنسى تسلم على عمي وخالتي .

**راعيها عاشقها (ولد لوى)** · 15-07-2009, 05:58 PM

الفصل الثاني

عبدالله : مثل ماتبين بوداعة الله وخليى بالج على روحج.
شوج : مع السلامة.
ينظر عبدالله لشوج ويبتسم ابتسامة خفيفة ويتجه للسيارة.
شوج تدش البيت وهي متضايجة .
توصل الام وتدش البيت تشوف شوج منسدحة ع الغنفة وموبايلها ع الارض .
الام : شوج شوفيج يابنيتي علامج ؟؟.
شوج : ماشي يمه توه يا ولد عمي عبود وكلمني .
الام : وشو صار يعني؟؟ .
شوج : ماشي بس سالني اذا غيرت رايي بموضوع الزواج .
الام : انزين وشوفيج عيل متضايجة؟؟.
شوج : بس جيه كل ماشوف ويهه يغثني ماطيجه .
الام : صج انج متبطرة يالله نشي اذن المغرب نشي .
شوج : انزين وصح اماه ترا مراد بيتاخر الليلة .
الام : انزين .
عند بحر حرمول مراد واثنين شباب من ربعه جاعدين يدخنون ويسولفون.
مراد : يالله شباب اذن المغرب جومو بنصلي .
عادل : باكر بنجضيها خلنا مستانسين .
محمد :عدوول جوم بنصلي ومواحين ع الوناسة .
عادل : اف اف يالله يالله كن الصلاة غصب.
مراد : الله يهديك.
ويتجه الشباب الثلاثة لسيارة مراد مكسيما 99 ويسوج مراد لاقرب مسجد في حرمول وينزلوا يصلوا.
في البيت شوج منسدحة ع الشبرية في غرفتها ومشغلة مسجلها ع اغنية راشد الماجد وعبد الكريم عبد القادر(ابي شورك) .
( ابي شورك دخيل الله يابو راشد ... ترا هالدنيا ضاجت بي وانا مليت )
الا وفجأة صاح موبايل شوج : ترررررررن تررررررررن
شوج مسكت الموبايل وشافت ان المتصل صاحب الرجم الغريب ...عشان كذا قررت ماترد. وحطت الموبايل صامت .
شوج وهي عاقدة حواجبها : اف.
ورجدت شوج دجايج الا ودخلت امها عليها.
الام : شوج جومي بسج نوم العشا جاهز جومي.
شوج : تو ...تو بيي.
الام : انزين جومي اتصلي ع اخوج شوفيه وين.
شوج : اوكي اماه.
الام : اتصلي وخبريني انا في المطبخ.
شوج : خلاص تم .
تشوف شوج موبايلها وتحصل 12 مكالمة لم يرد عليها وثلاث مسجات .
شوج : الله!! شو هذا؟ .
تفتح شوج الموبايل 10 مكالمة من الرجم الغريب و2 من مريم.
شوج : هذا مينون اخاف هذي المسجات منه بعد .
تفتح شوج المسجات ....
المسج الاول :
(شوج جولي حج امي اني يمكن ماايي الليلة ).
المسج الثاني :
(حبيبتي ليش ماتردين علي انا قصدي شريف والله) .
المسج الثالث :
( ع العموم انا اسمي عصام اذا اهتميتي اتصلي فيي ).
شوج : خل يدتك تهتم فيك؟؟؟ .
الام تدخل الغرفة وبايدها جلاص ماي وتجول : شوج اتصلتي بمراد شو جال؟؟؟.
شوج : جال في احتمال مايي الليلة .
الام : هالولد بيضيع وانا السبب.
شوج : لاتجولين جيه يايمه تلجينه سهران ويا حد من ربعه .
الام : امين يالله انا بروح حجرتي ارتاح شوي.
شوج : انا بتعشي وبشوف التلفزيون وبعدين برجد.
شوج راحت المطبخ وتعشت وبعدين يات الصالة وبايدها جلاص عصير وفتحت التلفزيون ويلست ع الغنفة وحطت قناة نجوم القصيد.
وفجاة يصيح موبايلها وتنتزج : ترررن ترررررررررن.
شوج تجوم وتشوف الرجم وكان المتصل ( عصام ) صاحب الرجم الغريب.
شوج : وهذا بعدين وياه ...جليل الادب.
ترد شوج ع الموبايل.
شوج :...............
المتصل : مساء الخير ارجوج لاتعصبين سمعيني للاخر تصدجين تراني مب جادر ارجد.
شوج وهي تتطنز: وليش ؟
المتصل : فديتج..... انتي السبب.
شوج وهي معصبة : انت هييه ..شوفيك؟؟...ماعندك ولي؟؟.
المتصل : انا احبج .
شوج تغلق السماعة بويه المتصل وتجول : اف اف شو هذا الاهبل ....اروح ارجد احسنلي .
.............
وفي اليوم التالي :
............
شوج راجدة وفجاة يصيح المنبه ع الساعة ثمان .. تجوم شوج متنرفزة كالعادة وهي عاقده حواجبها وتجوم بتثاقل وتفتح الكبت وتاخذ جلابية وردية وليسو وردي فيه رسومات سودة عشان تتسبح .
في المطبخ الام جاعدة تطبخ الريوج وتجول : مايا هالولد مادري متى بيشرف .
وفجاة يدخل مراد من الباب ويتجه للمطبخ ويجول : صباح الخير اماه شخبارج ؟.
الام : مراد انت ييت وابوي عليك وين كنت طول هالليل؟؟؟ .
مراد : ببيت واحد من الربع حلف علينا نبات معه .
الام : انزين يالله روح غير ثيابك عشان تتريج .
مراد : لا خلاص انا تريجت بروح انام تعبان .
الام : مثل ماتبى .
يتجه مراد لغرفته ويغير ثيابة ويعج بنفسه ع الشبرية وينام .
في غرفة شوج تتطلع من الحمام وتجعد ع المنظرة تسحي شعرها الطويل الاسود .
الام تدخل غرفة شوج وتجول : ماشالله ع العروس ناشة بوقت يالله جومي تريجي.
شوج : مابى اماه مب يوعانة .
الام :وشفيج انتي واخوج ماتاكلوا البر .
شوج : مراد يا؟؟... اباه يوديني اللولو ابى اشتري كم غرض جوليله .
الام : ياي تعبان مابيرضي .
شوج : اف وانا شو اسوي الحين ؟.
الام : شوفي بنت عمج حصة مابتردج .
شوج : انزين بتصل بمريوم وبشوفها اذا بتروح وياي .
الام تروح خاري وتتصل شوج ببنت عمها مريم : تررن تررررن.
في بيت عمها بو عبدالله الكل جاعد يتريج في غرفة الطعام على طاولة عريضة وطبعا بيت بو عبدالله فخم فيه ثلاث طوابق.
وفجاة يصيح موبايل مريم :تررررن ترررررررررن.
عبدالله : مسرعج وزعتي رجمج عاد ع الشعب .
مريم : بعدني ماعطيت احد غير شواااجي هذي اكيد هي .
يرتبك عبدالله لما سمع اسم شوج والكل يلاحظ .
بو عبدالله : عبود انت بعدك مصر على بنت عمك شوج ؟.
عبدالله وبتوتر: ماعرف يبه يالله انا رايح الشركة باي .
يطلع عبدالله من غرفة الطعام وتنظر حصة لمريم بنظرة ملامة .
حصة : مريوووم وهذا وقتج...شو ياب سيرة شوج؟؟ .
مريم : وانا شو سويت يعني؟؟؟ .
بو عبدالله : حصل خير عبود ريال ويعتمد عليه .
ام عبدالله : الحمدلله على كل حال.
حصة : هزاعووو وينه مشتاجيله تلجينه في مسقط يحوط من سينما لسينما .
ابو عبدالله : الله يوفج الجميع .
ينش ابو عبدالله ... وطبعا بو عبدالله يشتغل مدير لشركة خاصة فيه.
بو عبدالله : مع السلامة .
الجميع : مع السلامة .
ام عبدالله : وانتي ياحصة متى ناوية تروحي على شغلج ؟.
حصة : انا ماخبرتج اني ماخذة اجازة .
ام عبدالله : احسنلج لو تتركين الشغل بترتاحين .
حصة : واموت ملل مثل مريوووووم.
مريم : لا والله... عادي... انا مدبرة حالي .
حصة : انتي...جومي ردي ع شوج .
مريم وهي تاكل : صبري...بعدني ماشبعت.
حصة : جومي اتصلي فيها يمكن تباج بشي مهم .
مريم : زين يالله انا رايحة اتصل فيها.
في بيت ام مراد شوج عاقدة حواجبها ونايمة ع بطنها ع الشبرية الا ويصيح موبايلها :تررررررررررن ترررررررررن .
شوج : هذي اكيد مريووم .
ترد شوج ع الموبايل .
شوج : الوو.
مريم : هاي شواجي صباح الخير .
شوج : وينج وانا اتصل فيج.
مريم : شوج كنت اتريج سوري حبيبتي .
شوج : مريوووم انا ملانة من الجعدة بالبيت .
مريم : وانا بعد شو رايج نطلع نتمشى ويا مراد؟؟؟ .
شوج : لا والله سمعي عاد مراد ياي متاخر وتعبان ويبى ينام .
مريم : طيب نشوف حصة... ماعندها دوام ماخذة اجازة .
شوج : اوكي شوفيها .
مريم : وين نروح ؟.
شوج : اكيد صحار .
مريم : خلاص تم ؟ .
شوج : نروح اللولو... عشان اشتري كم غرض .
مريم : تم يالله باي بشوفها وبرد عليج .
شوج : اوكي باي .
مريم : باي .
في بيت بو عبدالله مريم في غرفة اختها في الطابق الثاني وجالت مريم عن المخطط اللي ناوية عليه اهي وشوج حج اختها وتنتظر موافجتها.
مريم : هاه حصوو موافجة ؟.
حصة: اوكي بس انا بوصلكم وبرجع البيت لانه مايخلصني انزل وياكم .
مريم : اوكي تم مشكورة انا بتصل فيج لما نخلص.
حصة : اوكي بس روحي استاذني من امي .
مريم : اوكي.
في بيت ام مراد شوج وامها جاعدين في الصالة وفجاة يصيح موبايل شوج :ترررررررررن ترررررن تررررررن ... وترد شوج : الووو مريووم.
مريم : يالله استعدي بنمر بعد شوي باي .
شوج : اوكي باي .
ام مراد : هاه بتروحوا ؟.
شوج : أي يمه بروح البس يالله .
ام مراد : ديري بالج على حالج .
شوج : انشالله اماه .

**راعيها عاشقها (ولد لوى)** · 15-07-2009, 06:01 PM

الفصل الثالث

تتجه شوج لغرفتها وتلبس بنطلون جينز وقميص احمر كت وتحط شوية بودرة على ويهها وتكحل عيونها الشهلة بكحل اسود عريض وتحط شوية جلوس وردي ع شفايفها وتلبس عباتها الكويتية المسكرة وترفع شعرها شوي وتثبته بشباصة وتلبس شيلة سودة ع راسها وماننسى الشنطة الحمراء الكبيرة والبوت الاسود .
( وطبعا شوج من البنات اللي يحبوا يهتموا بشكلهم وايد وايد).
وفجاة يصيح موبايل شوج :تررررررن ترررررررن.
شوج : هذي اكيد مريووم وصلت .
الام تدخل غرفة شوج وتجول : يالله شوج بنات عمج حصة ومريوم برع بالسيارة .......بسم الله من عين الحسود خمسة وخميسة يالله وسلمي ع بنات عمج وديري بالج ع حالج . ( الام تخاف على مريم من عين الحسود).
شوج تبوس راس امها: يالله مع السلامة يمه .
وتتجه شوج لبرع وتركب السيارة وتسلم ع بنات عمها وتيلس شوج ومريم في السيت الوراني .
مريم كانت لابسة عباة خيمة وحاطة شوية بودرة وجلوس احمر وميك اب احمر ع عينها ولابسة شيلة سودة ) .
حصة : يالله ياشوج كبرتي واحلويتي .
شوج : مشكورة حصوو حتى انتي محلوة بعد.
مريم : وانا ؟.
حصة : اعوذ بالله احسنلي اسكت .
شوج : سبحان الله هي الوحيدة طالعة غير في العايلة .
حصة : عندج حج.
مريم تبوز وتجول بدلع : يعني انا مب حلوة ؟.
حصة وشوج يضحكون .
شوج : بالعكس ماشالله عليج غرشوب .
حصة : اخافج صدجتي بس ؟.
مريم : بالعكس اصلا انا واثقة من جمالي.
وتضحك البنات ...هههههههه.
وبعد عدة دجايج يوصلو البنات اللولو سنتر .
شوج : يالله حصوو مابتنزلي ؟.
حصة : لا حبيبتي انا برجع البيت .
مريم : اوكي بنتصل فيج لما نخلص باي .
حصة : باي وماوصيكن .
تنزل مريم وشوج المركز ويسحبون سلة من الكبار اللي فيهن عجلات ويدشو المحل .
مريم وشوج جعدو يتحوطوا في الطابق الارضي بالسنتر..مريم تدفع السلة وشوج يمها وفجاة تدوس مريم بالسلة ع عباة شوج وتتعثر بس ماطاحت.
شوج : انتي شفيج فضحتيني ؟.
تضحك مريم واهي حاطة ايدها ع حلجها وتجول : شكلج كان يضحك .
شوج : اجول سكتي سكتي .
مريم وشوج مانتبهوا للشاب اللي كان واجف وراهم وجاعد يضحك ... صدت شوج عليه وجالت لمريم : خلينا نمشي مكان ثاني .
مريم : اوكي يالله ههه.
مريم وشوج راحو لقسم ثاني وانشغلن بالشراء بدون مايلاحظوا ان نفس الشاب كان يتبعهم ... لحظات والتفتت شوج وشافت الشاب... تقدم الشاب ناحية شوج وجال باحترام : انا اسف بس حبيت اجول انج وايد حلوة .
شوج بصوت منخفض : احترم نفسك وخوز من ويهي ولا بخربطه لك.
الشاب : انا موافج ماعندي مانع دام ايدج بتلمس ويهي .
مريم : شوج خليه هذا جليل ادب نروح قسم ثاني .
الشاب : طيب هذا الرجم خذيه وسويلي بس رنة وانا كلي لج .
شوج انصدمت لشدة وقاحة الشاب.. واهي تطالع ايد الشاب وبايدة الرجم وفجاة يتدخل شاب ثاني ...ياخذ الرجم من ايد الشاب الاول ويجول : روح من هني ولا بيصير لك شئ ماشفته .
الشاب الاول : نعم وبصفتك شو بتمنعني ؟.
الشاب الثاني : انا اخوهم .
الشاب الاول طبعا خاف وبدون حاسية راح ولاسال.
طبعا شوج كانت مندهشة من شدة وقاحة الشاب.
مريم وهي تشكر الشاب : يزاك الله خير اخوي.
شوج : يالله مريم.
طبعا الشاب انصدم من تصرف شوج...اشلون هو يدافع عنها...واهي حتى ماصدت عليه....ولا حتى جالت شكرا . ( شكل الشاب خجاج شوي).
وراح الشاب واتجهت مريم وشواج قسم ثاني.
كان الشاب جدا وسيم بشرتة حنطاوية طويل وعريض وكان لابس دشداشة صحراوية وعمامة من نفس اللون كان لافنها ع طريقة اهل شناص ولوى وشعره كان اسود وطالع شوي من تحت العمامة .
....................................
مريم : شوج شوج شوفيج ليش ماشكرتي الريال؟؟ .
شوج : أي ريال؟؟
مريم : اللي دافع عنج .
شوج : ماشفته....اجصد مانتبهت له.
(طبعا الافكار راحت ويات ع راس مريووم لان شوج كانت جايلة حجها من قبل انها تحب شاب فتوقعت مريم ان سبب تصرف شوج مع الشاب وسكوتها هو بسبب معرفتها للشاب واكيد شوج اهي مواعدتنه) .
مريم : شوج شورايج نروح الطابق الثاني نشوف الملابس؟؟ .
شوج : يالله انا بعد ابي اشتري كم جلابية .
مريم وشوج اتجهو للمصعد عشان يصعدو الطابق الثاني وكان في شابين واجفين عند المصعد وواحد منهم نفس الشاب صاحب الدشداشة الصحراوية .
مريم وشوج وجفوا بعيد شوي عشان يركبو الشباب قبلهم ... وشوج كانت مشغولة بتظبيط شيلتها ...
الشاب اللي كان واجف يم صاحب الدشداشة الصحراوية لاحظ شوج ودز رفيجه عشان ينتبه لها .
صاحب الدشداشة الصحراوية : اشفيك ليش دزيتني ؟.
رفيجه : ماشي بس طالع هناك الرعبوب اللي يظبط الشيلة.
صاحب الدشداشة الصحراوية : وش تباني اسوي يعني ارجص ولا اعج الرجم ؟.
رفيجه : صج انك اكبر خجاج .
طبعا صاحب الدشداشة الصحراوية كان يعرف ان شوج هي المجصودة بس حب يلعب دور الشاب اللي مب مهتم ...مثل ماهي لعبته من شوي... وفجاة وصل المصعد وركبوا الشباب .
مريم وشوج كانن جاعدات ينتظرن الشباب لحد مايصعدو.
شوج وهي تطالع مريم اللي كانت تطالعها: اشفيج تطالعيني؟.
مريم : لا سلامتج يالله نركب كاهو المصعد وصل .
اتجهت شوج ومريم للمصعد وركبو للطابق الثاني .
...........................
في بيت ام مراد .
.............................
مراد نازل من ع الدري : اماه وين شوج بغرفتها ؟.
الام وهي جاعدة ع الغنفة في الصالة تطالع مسلسل : راحت مع بنت عمها مريوم يشترن اغراض .
مراد : مريم معاها فديتها.....من وداهم.... عبود؟.
الام : لا حصة .
مراد : اها انزين انا طالع الحين بروح شركة عمي بو عبدالله... هو يباني ...يمكن عنده شغل حجي.
الام : انشالله يالله ودير بالك ع حالك .
مراد : تمام حياج .
يطلع مراد من الباب.
..................................
في بيت بو عبدالله ... ام عبدالله وحصة جاعدات عند التلفزيون .
...................................

ام عبدالله وبتحسر: ياالله ماعايبتني حالة عبود.
حصة : انا بصراحة مستغربة ليش شوج رافضة عبدالله؟! .
ام عبدالله : الله اعلم يمكن ماتبى تتزوج .
حصة : اخافها حاطة عينها على حد من الشباب .
ام عبدالله : مازين يابنتي هذي مهما صار بنت عمج من لحمج ودمج ولازم تهمج مثل مايهمج اخوج.
حصة : استغفر الله العظيم بس والله كاسر خاطري عبودو.
وبعد مايات الساعة خمس العصر .... فجاة صاح موبايل حصة: ترررررررررررن تررررررررن تررررن.
حصة : هذي اكيد مريوووم وشوج يبون يردوا البيت .
ام عبدالله : جومي ردي عليها .
حصة : انشالله يمه .
تتجه حصة للموبايل وترد ع المتصل : الووووو.
عبدالله : الووو حصوو اهلين .
حصة : هلا عبدالله.
عبدالله : بسالج.... مريم وشوج ردو البيت ؟.
حصة : لا بعدهم بالسنتر بمر عليهم لما يتصلو.
عبدالله : ابي اطلب خدمة .
حصة : افا عليك اخوي اطلب ولايردك الا لسانك.
عبدالله : ممكن تتعذري منهم جولي ان سيارتج اختربت .... انا بوصلهم .
حصة وهي تبتسم : اعرفك ماتفوت فرصة مول.
عبدالله : خليني احاول.... يمكن ترضي علي وتوافج.
حصة : اوكي خلاص تم ياخوي .
عبدالله : مشكورة حياج .
حصة : حياك .
حصة تتجه للصالة .
ام عبدالله : هاه شو صاربتروحي تييبي البنات ؟؟.
حصة : لا هذا عبدالله .
ام عبدالله : شو يبى ؟؟.
حصة : ماشي جال اهو بيروح اييب البنات من السنتر .
الام : بعد زين ...شكلج تعبانة .
حصة : يالله اماه انا بروح ارجد شوي عبدالله ريحني الصراحة .
الام : يالله حطي راسج وارتاحي .
اتجهت حصة لغرفتها في الطابق الثاني الا وفجاة صاح موبايلها :تررررن ترررررررن .
حصة ترد وتجول : الوووووووو.
مريم : حصة يالله مري علينا نبى نرد البيت .
حصة : سيارتي اختربت مريووم اسفة بس بخلي عبدالله يمر عليكم .
مريم تبتسم ابتسامة خبث وهي تطالع شوج : اوكي يالله نتريا عبدالله باي.
حصة : اوكي باي .
في اللولو سنتر بقسم الملابس بالطابق الثاني .
شوج تطالع مريم : عبدالله بيمر علينا صح ؟.
مريم : أي... حصة ماتجدر تيي سيارتها متعطلة .
شوج : اها اوكي .
في مكان ثاني بالطابق الثاني صاحب الدشداشة الصحراوية ورفيجه واجفين يشربون سفن اب .
صاحب الدشداشة الصحراوية اسمه عبد العزيز وعمره 21 سنه يشتغل اشغال حرة عنده اختين اساميهم مهرة 9ونها 7 وابوه يشتغل مقاول ومضمر بوش وامه معلمة وهو يسكن بشناص بحلة اسمها اسرار بني عمر ورفيجه اسمه حسن .
عبد العزيز كان يطالع صوب قسم الملابس وفجاة يدفره رفيجه حسن .
عبد العزيز ينتزج ويجول: اشفيك كسرتلي عظامي .
حسن : جول الصج عاد.. انت تعرف الرعبوب؟؟ .
عبد العزيز : أي رعبوب ؟.
حسن : تستهبل بعد .
عبد العزيز :الصراحة لا بس شايفنها قبل شوي بالطابق الاول .

**راعيها عاشقها (ولد لوى)** · 15-07-2009, 06:05 PM

نزلت لكم ثلاث فصول وأنتظر الردود
واذا مافي ردود ...شو اسوي عاد ؟؟؟

بشوفلي حل

**pink-flower** · 15-07-2009, 09:47 PM

نزلها مره وحده..

يوم بخلص قرأتها كامل بنقد..

**مجوده** · 15-07-2009, 10:31 PM

حلووووووووووووو مرة ..
يسلمو والله

ننطر التكمله ~

**راعيها عاشقها (ولد لوى)** · 15-07-2009, 11:22 PM

بنك فلور ....هههه حلوة ترجمة نكج بالعربي ....بتقرأئينها غصبا عنج ....ولا مابكملها خير شر

ومشكووووورة مجودة ع ردج الحماسي

**pink-flower** · 15-07-2009, 11:57 PM

ما عرف أقرا بالاقساط

**ضـ العنجهيه ـد** · 16-07-2009, 01:12 AM

ابدعت يا اخويه ما عليك زوود يلا عااد نتريا الاجزاء الثانية لا تبطي علينا

يسلموووو

**سمـــاء** · 16-07-2009, 11:58 AM

بداية القصة جميلة ..

لكن لم يعجبني اسلوب شوق .. دفشة في كل تعاملها ..
حشة تقول لأمها انتي شلي الغدا .. وتقولها أف أف ..

خليها تتأدب في الحلقات الجاية

**راعيها عاشقها (ولد لوى)** · 16-07-2009, 04:13 PM

بنك فلور .....ماعليج إنتي ماعليج ....بتفاهم وياج!!!
ضد العنجهية : مشكووووووور عسوووول ....وإنطر التكملة
سماء : تمام سماااااااااااااا ....بخليها مأدبة في الفصول الياية .....( عن أخليها وأغوي بس )

مشكورين ع الردود واليكم فصول ثلاثة أخرى

**راعيها عاشقها (ولد لوى)** · 16-07-2009, 04:16 PM

الفصل الرابع

حسن : وشو الجصة ؟...طول عمرك وانت خجاج رافع خشمك ماتطالع البنيات مول ... البنات يطالعوك!!؟ ... هالمره شايفنك مهتم يعني بالبنية شوي .
عبد العزيز وهو يبتسم ابتسامة ثقة وسخرية بنفس الوقت : الجصة مب جصة مهتم بس شكل البنية يجذب وبالاخص عيونها الواسعة .
حسن : جمت تتغزل بالبنت وانت مب حاسس .... اجول روح روش الرجم وفك حالك .
عبد العزيز : راعي سمحة انا اروش رجمي مستحيل ... خلها هي تروش رجمها .
حسن : هههه صج عليك حركات ... خجاج وانت صاحبي فاهمنك.
وفجاة تطلع شوج ومريم من قسم الملابس ... شوج وهي مشغولة بالسوالف مانتبهت لعبد العزيز ولاصدت حتى .
حسن وهو يغازل: اش دعوى عاد لاسلام ولاكلام .
عبد العزيز يرد عليه بصوت عالي : ..طنش تعش تنتعش.
حسن : ماعبروك عزوز.
عبد العزيز : اجول اسكت...ولا بجطع لسانك...وبخلي بوش ابوي تمضغه لك.
حسن : كله ولابوش ابوك ... اسف اسف ... عاد بوش ابوك كل شي ياكلنه ...حتى النعلان.
عبد العزيز : بلا طنازه عاد خلنا ننزل اخاف البنات يطلعون من السنتر .
مريم وشوج خلصوا تشري وكانن طالعات من الباب ...عبد العزيز ورفيجه شافوهن وطلعوا وراهن .
عند موقف السيارات عبدالله واجف بسيارته اللاند روفر وجاعد يدخل الاغراض بالدبة مال السيارة وشوج ومريم يساعدنه .
حسن : شوف ...شكل الرعبوب بنت هوامير .
عبد العزيز : تهجي الشاب اللي معاهم اخوها ؟.
حسن : الصبي غرجان بالحب وبدا يغار ع الحبيبة .
عند السيارة عبدالله واجف يكلم شوج ومريم بالسيارة.
عبدالله :كيف كانت الحواطة بالسنتر؟.
شوج : زينة لاباس.
عبدالله : شوج انا ادري انج مب طايجتني بس بالنهاية انا ولد عمج وماابى الا مصلحتج.
شوج وهي رافعة حواجبها : ومصلحتي انك تبتعد عني وتخلني اشوف مستقبلي.
عبدالله يتنفس بضيج : طيب ركبي عشان اوصلكم البيت.
تركب شوج وعبدالله السيارة ومريم تلمح عبد العزيز وحسن واجفين يطالعوا ناحيتهم .
مريم : عبود تشوف هذاكهم الشباب؟؟ .
عبدالله : أي اشوفهم ليش؟
مريم : ضايجونا بالمركز
وايد وواحد منهم راش كلمة علينا ماسمعناها زين .
عبدالله : لا وتابعينكم بعد .... انا رايح اتفاهم معهم .
نزل عبدالله من السيارة متجه للشباب (عبد العزيز وحسن )وهو معصب.
(طبعا مريم ماسوت جيه الا لانها كانت تبى تشوف ردة فعل شوج) .
شوج كانت ولابالدنيا .
( او مثل مايجول المثل الناس في همة وشوج مب مهتمة).
حسن لما شاف عبدالله ياي ناحيتهم خاف وجال لعبد العزيز :هيي عزوز خلنا نروح شكل الطيب معصب .
عبد العزيز: خله يعصب شو بيسوي يعني؟؟ ... نحن ماسوينا شي غلط.
عبدالله وصل وجال : اهلين شباب شخباركم ؟.
عبد العزيز : حن تمام يالطيب .
عبدالله : انتو اللي كنتو تعاكسو البنات من شوي ؟.
حسن : لا مب نحن ... نحن ماسوينا شي .
عبد العزيز : اسكت حسوون ... شو تبى يالطيب ؟.
عبدالله : اللي مااباه اني مااخليكم تجضو ليلتكم بالمستشفى .
عبد العزيز : الطيب جاعد يهددنا ؟.
حسن : انزين انزين نحن اسفين بس بنروح .
عبدالله يعصب ويمسك عبد العزيز من دشداشته....عبد العزيز عصب ومسك ايد عبدالله وهو ويجول : اذا ماشلت ايدك بكسرها حجك.
عبدالله : وحد جالك اني خايف منك.
حسن حاول يهدي الامور ويجول : عزوز يالله يالله ... اسفين اخوي نوعدك مانكررها مرة ثانية .
عبدالله يهد عبد العزيز ويجول : اتمنى ماتتكرر .
طبعا عبد العزيز كان يحاول يستفز عبدالله بكل الطرق وجال وهو يبتسم ابتسامة سخرية : امسك خواتك بالاول .
عبدالله خلا حاله ماسمع لانه ماكان يبي يدخل بضرابة معهم واتجه لسيارته وركب .
مريم : كاهو عبود يا... زين سوا فيهم جيه جليلين الادب .
شوج :وليش عاد؟؟.
مريم : وانتي ليش محترة وايد... وجلبج معورنج عليه؟؟ .
دخل عبدالله السيارة وهو معصب وجال : صج ماعندهم حيا .
مريم : يستاهلون جليلين الادب .
عبدالله : مرة ثانية لاتروحن مثل هالاماكن بلياي او بليا مراد .
شوج : انزين يالله اخاف نتاخر ... امي بتحاتيني ... بتيي الساعة ست .
عبدالله : يالله .
طبعا عبد العزيز فيه حرة من تصرف عبدالله وعشان جيه قرر يتبعهم ويشوف وين بيروحون .
عبد العزيز : يالله حسون بنروح وراهم.
حسن : انت تبى تسويلنا مشاكل؟؟ .
عبد العزيز : انا مارح اخلي واحد مثل هذا يتحداني وانا ساكت .
حسن : تو يعني انت بتتبعهم عشان ترجع حجك من الطيب ولا عشان تشوف وين تسكن البنية ؟!!.
عبد العزيز : ليش شو مافي بنات احلى عنها ؟؟!!.
حسن : الصراحة فيه بس انت ذوجج دايم غير.
عبد العزيز يركب سيارته البي ام دبليو لونها اسود وكلها مخفي ومعه رفيجه حسن ويتبعون عبدالله لحلة لوى الجديدة .
عبد العزيز وهو بالسيارة : انا جلت بخاطري هالبنت اكيد بتكون من لوى او شناص .
حسن : البنت ولا اخوها ؟.
عبد العزيز : مب مهم .
حسن : لا بس ضنيت .
عبدالله يوجف شوج عند بيتهم وينزل هو وشوج عشان يساعدها وهي تنزل الاغراض .
عبدالله : تامرين على شي بعد بنت العم؟ .
شوج : لا ياولد العم مابى الا راحتك .
يستانس عبدالله من كلام شوج ويركب سيارته عشان يوصل اخته البيت .
تدخل شوج البيت وطبعا عبد العزيز وحسن يطالعو عن بعد .
حسن : يالله كاهي نزلت الرعبوب .
عبد العزيز : الظاهر ان الطيب مب اخوها ...يمكن ولد عمها او ولد خالها. حسن : ويمكن خطيبها.
عبد العزيز يشوف حسن بنظرة غضب : مب خطيبها انا متاكد .
حسن : انزين انزين لاتعصب يالله خلنا نروح شناص تراني يعت وابوك لو يدري عن سوالفك كان زوجك الخميس الياي ببنت جيرانكم القبيحة .
عبد العزيز : عن الغلط البنت حلوة بس جمالها مب واضح .
ويضحك الشباب :هههههاي هههههههههاي .
ويتجهو لحلتهم .
شوج تدخل البيت وبايدها الاكياس وتلجي امها جاعدة مع حرمة من الحارة يسموها ام نويصر.
شوج : السلام عليكم .
امها وام نويصر : وعليكم السلام .
سلمت شوج ع الحرمة وباستها ع راسها .
ام نويصر: ماشالله صارت حرمة .
الام : أي ماشالله عليها .
طالعت شوج امها نظرة دهشة وشلت الاكياس ودخلت حجرتها .
تفصخ عباتها وتاخذ جلابية من الكبت وتروح تتسبح .
في بيت بو عبدالله .
عبدالله وحصة جاعدين بالمكتب ويتكلمون بصوت خافت .
عبدالله : وهذا كل شي صار.
حصة : صج ان شباب هاليومين فاضين...زين نازعتهم.
وفجاة تدخل مريم عليهم وهي مبتسمة :عن شو تتحجون؟؟.
عبدالله : عنج.
حصة : نجول ان مريوووم هبلة .
مريم وبدلع: حرام عليكم بخبر ابوي.
عبدالله يبتسم لمريم ويطلع من المكتب....حصة تطالع مريم .
مريم : اشفيج؟
حصة : ماشي.... يالله حبوبة انا بروح ارجد.
مريم : مثل ماتبين .
في بيت ام مراد ... شوج راجدة ع الشبرية وهي تتثاوب وفيها رجاد.... وفجاة تدخل امها عليها وتنتزج شوج وتجول : اشفيج يمه نزجتيني حرام عليج .
الام : لا بس فرحانة ...تدرين ام نويصر ليش ياية ؟.
شوج : لا شو فيها ؟.
الام : نويصر ماشالله عليه توظف بوظيفة محترمة ومعاشه وايد زين .
شوج : الحمدلله ونحن شو يخصنا ؟.
الام : ناصر يباج ع سنة الله ورسوله ... انا جلتلها بنشوف راي البنية بالاول .
شوج وبعصبية : نعم ... انا ....ناصر يباني انا ...ليش؟.
الام : شو ليش؟ ... يبى يتزوجج .
وفجاة يدخل مراد غرفة شوج ويسال : شو السالفة ؟.
الام : ناصر ولد الجيران خطب شواج بس الظاهر انها مب موافجة .
مراد وبدهشة : نويصر ...شاب زين ... بس شوج حج ولد عمها عبود وهذا شي معروف .
الام : شوج ماتبى حتى ولد عمها .
مراد : وليش عاد؟.
طبعا شوج كانت جاعدة تستمع للحوار الحاصل بين اخوها وامها وفجاة تعقد حواجبها وتتكلم بعصبية : بلا هالكلام وطلعوا لو سمحتو ...وزواج مارح اتزوج ...يالله برع خلوني بحالي .
مراد وامه طلعوا من حجرة شوج ... وشوج سكرت غرفتها بالمفتاح وهي متضايجة ...وراشت بنفسها ع الشبرية.
شوج : ياربي انا حظي دومه ردي ... ياعبود ....يانويصر ... ماشي غيرهم .
......
في مكان اخر بشناص بحلة اسرار بني عمر .
......
عبد العزيز وحسن واجفين يم بيت عبد العزيز يبون يدخلون البيت بدون مايشوفهم ابو عبد العزيز ..لان ابوه ريال جدي شوي وحازم ومايحب سوالف شباب هاليومين ( تخميس , مغازل ومعاكسات , سهر لاخر الليل)
....طبعا انتو تسالون ليش حسن مايروح بيت اهله ... لان حسن متربي مع عبد العزيز من لما كانوا صغار مثل الاخوان ... وهما مع بعض طول الوقت وينامون يا اما في بيت عبد العزيز او بيت حسن... حسن وحيد امه وابوه ..وعبد العزيز ماعنده الا اختين صغار ( مهرة ونها ).
المهم تسلل عبد العزيز وحسن من الدروازة ودخلو الميلس ... ولما شغلو الليتات ... تفاجئو بابو عبد العزيز جاعد بالميلس .
عبد العزيز : بسم الله الرحمن الرحيم .

**راعيها عاشقها (ولد لوى)** · 16-07-2009, 04:20 PM

الفصل الخامس

حسن : يالله عزوز خشمك.... انا خلاص وصلتك ... حياك... تفاهم ويا ابوك انا بروح.
عبد العزيز: وين رايح تعال.
طبعا ابو عبد العزيز كان يطالعهم وهو معصب.
عبد العزيز : شخبارك يبه؟ ...شلونك؟؟.
ابو عبد العزيز : وين كنتو ؟.
حسن وبارتباك: كنا بصحار عمي ...ماسوينا شي... لاخمسنا بالسيارة ولاعزوز غازل هذاك الرعبوب مال لوى .
عبد العزيز يدز حسن : الله يبحصك اسكت.
ابو عبد العزيز يوقف ... وطبعا حسن منضم ورا ظهر عزوز ...وكان الاثنين وايد متخرعين .
ابو عبد العزيز : اتمنى مايكون شي من اللي في بالي صح ... واتمنى تصيروا رياييل وتبدو تفكروا بشغل ثابت ...يالله انا بروح ارجد ...وبكرة من الساعة ثمانية ابيكم بالمزرعة...بيي رفيجي باجر عشان يشتري كم يمل من بوشنا.
عبد العزيز : انشالله يبه تصبح على خير.
ابو عبد العزيز طلع من الميلس وعبد العزيز يحر حسن بعينه.
حسن شاف على عبد العزيز وجال: يالله تصبح على خير.
عبد العزيز : تو تصبح على خير هاه ؟....حسون اذا درى ابوي باللي صار بيذبحنا نحن الاثنين.
حسن : انزين انزين لاتعصب بروح انام .... بكرة عندنا شغل ... تصبح على خير .
عبد العزيز : وانت من هله ... انا بتسبح بالاول وبعدين برجد .
حسن : تم .
ويتثاوب حسن ويروش بعمره ع الغنفة ... ويتجه عبد العزيز للحمام اللي بالميلس عشان يسبح ... بيت بو عبدالله بيت متواضع مكون من طابقين .
.........
في اليوم التالى في لوى .
.........
في بيت بو عبدالله الكل جاعد ع الطاوله يتريجون .
بو عبدالله : امس تكلمت مع مراد ولد عمكم عشان يشتغل بالشركة.
عبدالله : بعد زين يبه ... عشان يصرف على اهله.
مريم : يبه انا بروح اليوم عند شوج .
بو عبدالله : روحي يبه ...وخلي شوج تزورنا ... من فترة مب شايفنها.
ام عبدالله : أي صج انا بعد ابي اشوفها .
حصة : يالله يايمه كيف تحب شوج ... اخافها تحبها اكثر منا.
ام عبدالله : يالله عاد ... انا احبكم كلكم .
ويضحك الجميع :ههههههه ههههههههه.
في بيت ام مراد ...الاوضاع هادية ... مراد وشوج نايمين ... وامهم جاعده تطبخ الريوج.
الام تنتهي من اعداد الريوج وتحطة بالصالة وتركب الطابق الثاني... وتدج باب غرفة مراد وبصوت عالي : مراد يالله ع اساس عمك شغلك بالشركة... جوم عاد تريج وروح الشركة .
مراد وبصوت نعسان : انزين يمه تو ..تو بتسبح وبلبس وبنزل .
الام : يالله اترياك .
تنزل الام الطابق الاول وتروح المطبخ عشان تكمل شغل وغسل صحون .
طبعا بها الوجت تنش شوج وهي متثاجلة ..وكالعادة عاقدة حواجبها... تروح تغسل ويهها وتطلع ع الصالة وتجعد تتريج.
ينزل مراد وهو متعطر ومتكشخ ... كان لابس دشداشة بيج ...ومتعمم بعمامة بيضة فيها نجش بني... ويجعد يتريج مع شوج .
مراد : صباح الخير شواجي .
شوج وبدون تركيز : صباح النور ...ماشالله طالع كشخة بها الدشداشة.
مراد وباستغراب : اول مرة تعترفين اني وسيم وكشخة.
شوج وعت لحالها وجالت: انت صدجت ع حالك ؟... بعدك مثل ما انت سواء لبست دشداشة كشخة او لبست يونية ماتفرج .
مراد : أي هذي شوج اللي اعرفها ... يالله انا بروح ... عمي عرض علي شغل بشركته .
شوج : بالتوفيق.
يطلع مراد من الباب وشوج جاعدة تطالعه وتجول : وش عليك تطلع وتتكشخ وتروح وتيي .
.........
في مكان ثاني بشناص بحلة اسرار بني عمر .
.........
حسن وا بو عبدالعزيز ركبوا سيارة البيكب واتجهو للمزرعة....اما عبد العزيز جعد يتريج مع امه وخواته اللي كانن لابسات ملابس المدرسة...وبعدين بيلحج ابوه وحسن للمزرعة .
ام عبد العزيز : عزوز متى ييت امس؟....ماشفناك مول البارحة.
عبد العزيز يغص ويسعل:كح كح.
ام عبد العزيز وبخوف: خذ هذا جلاص ماي اشفيك انا شو جلت؟.
عبد العزيز : لا ماشي يمه ...بس كنت سرحان شوي .
طبعا عبد العزيز كان سرحان يفكر برعبوب لوى (شوج طبعا) ومانتبه لامه وهي تكلمه .
عبد العزيز : شو كنتي تجولين يمه ؟.
ام عبد العزيز:لا سلامتك ...اللي ماخذ عجلك يتهنابه .
مهرة : صح عزوز .... رجية امس سالت عنك .
(طبعا رجية بنت جيرانهم القبيحة واللي جمالها مب واضح مثل ماجالوا حسن وعزوز)
عبد العزيز : شو تبى ؟.
نها : جالتلنا مانجولك .
ام عبد العزيز تضحك : ياحليلها رجية ...صراحة بنت حبوبة واخلاق .
عبد العزيز وهو ماسك جلاص ماي عشان يشرب : جولي نها حبيبتي شو جالتلج رجية؟ ...بوديج الحديقة باكرالخميس اجازة.
نها مستانسة : والله؟؟! ...انزين ...جالت انها تحبك وايد.
عبد العزيز يغص بالماي مرة ثانية ويكح: كح كح .
ويشرب ماي ....وامه وخواته جاعدات يضحكن عليه :هههههه هههههه.
عبد العزيز : ذبحتوني انا بجوم الحج بابوي احسن .
ام عبد العزيز : يالله مهرة...نها لبسي مصرج....عن نتاخر
ع المدرسة .
طبعا ام عبد العزيز تشتغل معلمة بنفس مدرسة بناتها وعندها سيارة هوندا وعادة هي توصل بناتها المدرسة .
طلع الكل من البيت واتجهوا لاشغالهم .
..............
في لوى في حلة لوى الجديدة ببيت ام مراد.
..........
شوج جاعدة تطالع التلفزيون وكانت حاطة قناة نجوم 2 وتسمع اغنية عيضة المنهالي (ياشاغل فكري وقلبي عن الناس ....... )
وفجاة تدخل امها عليها وتجول: شوج انا بروح بيت ام نويصر ...زين؟...وديري بالج ع حالج .
شوج : انزين اماه.
تحط ام مراد ع راسها ليسو وتطلع ...وشوج طبعا جاعدة تطالع التلفزيون ....وفجاة صاح موبايلها: ترررررررن ترررررررررن.
...........
وفي مكان ثاني بشناص وبالتحديد مزرعة بو عبد العزيز.
..........
حسن جاعد ينظف البوش ويغسلهم بالماي وعبد العزيز جاعد يتصل يمه .
حسن : الصراحة انت صديج وفي ... انا اشتغل وانت تتسلى بموبايلك .
عبد العزيز يطالع حسن بنظرة خجة ..وموبايله على اذنه.
عبد العزيز : الووووو.
المتصل : الوووووووو...انت وينك؟. ع اساس بتتصل فيي امس.
عبد العزيز : اسف خالتي بس كنت وايد مشغول البارحة.
المتصل خالة عبد العزيز واسمها جواهر عمرها 26 سنة ومتزوجة من ثلاث سنوات وماعندها عيال هي وزوجها فراس .
جواهر : انزين شو سويت..لجيت البخوراللي موصتنك عليه؟؟ .
عبد العزيز : خالوو بصراحة دورت باللولو والسفير .. حتى سنتر بوينت دورت فيه بس مالجيت اللي تبينه .
جواهر : اوكي خلاص مشكور ... بشوف ريلي اليوم بيروح الفجيرة ... يمكن يلجي .
عبد العزيز : اوكي سمحيلي خالو .. يالله باي .
جواهر : لا عادي ... باي عزووز.
..........
في مكان ثاني في لوى ببيت ام مراد.
..........
شوج جاعده ترد ع المتصل وتجول : انزين انا ماسويت شي يخليج تزعلين مني .
مريم : لا بس انا حسيتج امس وايد مهتمة فيه.
شوج : انا اعرفه عشان اهتم فيه؟حتى شكله مااذكره.
مريم : ماعرفج...ع العموم انا متصلة عشان اجولج اني بيي عندج العصر.
شوج : هذي مايبالها استئذان ....اترياج يالله باي.
مريم : باي شواجي ....سلمي ع خالتي.

**راعيها عاشقها (ولد لوى)** · 16-07-2009, 04:24 PM

الفصل السادس

شوج : اوكي بايباي.
تجفل شوج الخط وترجع تنسدح ع الغنفة وجعدت تفكر...
طبعا بالكلام اللي جالته لها مريم .
شوج : بصراحة انا سويت لنفسي سالفة ..... اخاف مريووم تروح تخبر احد وتسويلي مشاكل مع هلي ... بخبرها الحقيقة اليوم .
في بيت ابو عبدالله .... حصة ومريم جاعدات بالصالة .
مريم : حصووو ممكن اجولج شي؟.
حصة : اكيد مريوم.
مريم : الصراحة انا السالفة مضيجتني ... لانها تخص اخوي.
حصة : شو مريووم ؟ شو السالفة ؟ عسى ماشر ؟؟.
مريم : شوج ياحصة .
حصة : شوفيها؟.
مريم : تحب واحد ثاني .
حصة : اهي جالتلج ؟؟.
مريم : أي ... لا وبعد كانت مواعدتنه بالسنتر ... وانا شفته بعيني ...وعبدالله بعد شافه بس بدون مايعرف السالفة .
حصة : كان المفروض تخبرين عبدالله .. هذي السالفة تخصة اهو وبس ...وبعدين حرام كل اللي يسويه حقها واهي مب مهتمة!!.
مريم : اوكي انتي شوفي الاحسن ... وخبريه.
حصة : خلاص اخبره اليوم...بس اللي تحبه من هني ؟؟.
مريم : لا لا مااعتقد ...اول مرة اشوفه ... يمكن بحلة ثانية من لوى.
حصة : الله يستر ...اخافها تطلع وياه بعد...طلعت شواج مب سهلة .
مريم : انا بروح عندها العصر اليوم .
حصة : زين لاتييبلها سيرة شي من اللي جلناه.
مريم : انشالله .
...........
في مكان ثاني بشناص بمزرعة بو عبد العزيز .
...........
عبد العزيز وحسن ينظفوا البوش ويغسلوهم وابو عبد العزيز يساعدهم.
حسن : عمي انا تعبت الصراحة ....ودي ارتاح.
ابو عبد العزيز : افا بس افا ... انت مب ريال؟؟.
عبد العزيز : صج والله ياحسن .... انت مب ريال؟؟...لو محطين نها ومهرة هني كان بينظفوا كل البوش ولابيتعبون.
حسن : الله ...يامكبرها عند الله.
ابو عبد العزيز : اشتغلو اشتغلو ....الريال تو بيوصل.
عبد العزيز: بسالك يبه منو هالريال ؟... صاحبك ؟.
ابو عبد العزيز: هذ رفيجي من لوى .... بو عبدالله ....يشري بوش حج السباقات .
حسن : من لوى... ذكرتني بال....!!!.
عبد العزيز طالع حسن بنظرة غضب عشان جيه خاف حسن وسكت ... وطبعا حسن كان يجصد رعبوب لوى ( شوج ).
ابو عبد العزيز : يالله شباب انا بروح انتظر الريال تحت السبلة .
عبد العزيز : اوكي يبه .
راح ابو عبد العزيز .... وحسن خايف من عزووز لايذبحه.
عبد العزيز : تصدج حسوون ....شو رايك نروح لوى اليوم ؟؟.
حسن : ليش ؟..امس كنا هناك .
عبد العزيز : ابى اروح اشوف الرعبوب.
حسن : عزوز من صجك ؟... جول الصج؟؟ .... انت ... انت تحب؟؟.
عبد العزيز : وراعي سمحة ... انا .... تعرفني مب مال هالسوالف ... بس داجة براسي ... ابي اشوفها.
حسن : تمام ... انا وياك ... تراني مب خسران شي ... الا شخبار عروس المستقبل رجية ؟؟.
عبد العزيز : تجصد بنت الجيران ؟؟.
حسن : ومن غيرها .
عبد العزيز : امس جايله حج خواتي الصغار انها تحبني .
حسن : تو الناس ... تراه شي واضح ... نظراتها ..... وييتها بيتكم يوميا .
عبد العزيز : لا وخواتي يوميا عندها بالبيت يحبنها .
حسن : ههههههههههاي ... يحليلهن مهرة ونها .
عبد العزيز : كاهو ابوي ويا الريال يايين ....اصطلب .
ابو عبد العزيز وصاحبه بو عبدالله يايين صوب عزوز وحسون .
بو عبد العزيز : وهذا هو ولدي عبد العزيز وهذا رفيجه حسن .
عبد العزيز وحسن يخاشمو الريال ويسلموا عليه .
ابو عبدالله وهو يضرب بايده كتف عبد العزيز : ماشالله كبرت ياعزوز وصرت ريال يعتمد عليه ... اخر مرة شايفنك وانت عمرك خمس سنوات .
ابو عبد العزيز : الا شخبار عيالك عبدالله وحصة والصغير اسمه ... هزاع.
ابو عبدالله : كلهم تمام ... بس في بعد مريوم انت مالحجت عليها ... هي الاصغر .
ابو عبد العزيز : ماشالله ... انا بعد عندي بنتين صغار نها ومهرة .. وحدة صف ثالث ووحدة صف اول .
ابو عبدالله : ماشالله ... الله يخليهم لك.
ابو عبد العزيز : وهذا حسن اذا تعرفة ولد الراهي جارنا .
ابو عبدالله : اها ... ولد الراهي ... ابوك بعده يشتغل بدبي؟؟.
حسن : لا عمي ... خبرك عتيج ... تو يشتغل بمسقط .
ابو عبدالله : زين زين ماشالله.
ابو عبد العزيز : وهذا البوش اللي جدامك كله حلالنا ... انت بس شاور وانا رهن الاشارة .
ابو عبدالله : ماشالله كبرت المزرعة ... الله يحفظلك حلالك .
ابو عبد العزيز : وترانا ننتظر منك زيارة انت والعايلة الكريمة .
ابو عبدالله : انشالله يابو عبد العزيز .
وطبعا عبد العزيز وحسن جاعدين يطالعو بعض وهم متمللين من سوالف الشواب وسوالف البيع والشرا.
...........
في لوى في بيت ام مراد.
..........
شوج ومريم وام مراد جاعدين بالصالة يسولفون .
ام مراد : ماشالله عليج يامريم كبرتي واحلويتي .
مريم : مشكورة خالتي ... تسلمين ... هذا من ذوجج.
شوج : اماه ممكن اتكلم مع مريووم اروحنا.
ام مراد : اعرفكن انتن البنيات وسوالفكن... انا بروح اكمل الشغل والتنظيف .
مريم : ماتبي مساعدة خالتي؟؟.
ام مراد : لا حبيبتي مشكورة يالله انا طالعة.
طلعت ام مراد ...وشوج جاعدة تطالع مريم بنص عين وهي مغتاضة من دلع مريوم الزايد.
مريم : اشفيج شوج؟؟.
شوج : سلامتج بس مستغربة من وين نزلت عليج كل هاللطافة؟؟.
مريم : انا طبعي جيه.
وتضحك شوج ضحكة سخرية : هههههي انزين وشو السالفة اللي تبيني فيها؟؟.
مريم : سؤال وياليتيج ماتكذبين علي.
شوج : اتفضلي.
مريم : الشاب اللي شفناه امس واللي دافع عنج ....تعرفينه؟؟.
شوج وباستغراب : ومن وين اعرفه؟؟.
طبعا مريوم لوت بوزها بضيج : جلت اتمنى ماتكذبين علي.
شوج : انزين انا ماكذبت.
مريم : حسيته امس يطالعج وايد... جلت اكيد شايفنج بمكان من قبل.
شوج وهي تضحك : صج والله؟؟.
مريم : واشفيج تضحكين؟؟؟.
شوج بجدية : عليج يامريم ....يعني انا حتى شكله مامتذكرتنه ....وانتي تجولين اعرفه.
مريم : انزين ياشوج مثل ماتبين.
في بيت بو عبدالله ... عبدالله وحصة جاعدين بالمكتب... وحصة خبرت كل السالفة اللي جالتها لها مريم لعبدالله.
حصة : وهذا كل شي ياخوي.
عبدالله واهو معصب : يعني مريم رافضتني عشان واحد ثاني؟؟.
طلع عبدالله واهو معصب من البيت وركب سيارته متجه لبيت ام مراد.
.................................................. ....
في بيت ام مراد .
مريم : يالله شواجي انا لازم اروح اتاخرت وايد.
شوج وهي تبوس مريم : اوكي ولاتجاطعينا عاد.
وفجاه صوت هرن سيارة عبدالله ... واللي نزل منها وهو واجف عند الدروازة ويسلم على ام مراد.
عبدالله : خالتي اذا في امكانية بغيت شوج بسالفة.
ام مراد : انشاالله ...كاهي طلعت من الصالة ويا مريم.
مريم : وي هذا عبدالله ...تعالي.
شوج : مب جنه معصب؟؟.
مريم : مادري.
ام مراد بصوت عالي : شواج ولد عمج يباج.
وتدخل ام مراد البيت وتتجه شوج ومريم لعبدالله .
عبدالله : السلام عليكم .
شوج ومريم : وعليكم السلام .
عبدالله : مريم روحي السيارة ... ابى اكلم شوج بموضوع خاص .
تتجه مريم للسيارة وتركب .... شوج تطالع عبدلله باستغراب ... وعبدالله يطالعها واهو معصب.
شوج : اشفيك معصب ؟؟.
عبدالله : يعني ماتدرين ليش؟؟.
شوج : لا مادري!!... شو صاير؟؟.
عبدالله : من هو؟؟.
شوج: من؟؟.
عبدالله : من هو؟؟... عشان اذبحه وافتك منه.
شوج : لو سمحت اتكلم عدل...انا مب فاهمة شي!!.
عبدالله وباسلوب ساخر : الحبيب اللي رافضتني عشانه.
شوج تفتح عيونها وتفتح حلجها .... وتعصب وبدون حاسية تصفع عبدالله كف على خده....عبدالله حط ايده على خده واهو مستغرب ...انحرج وماقال ولاكلمة ...اتجه لسيارته ...ركب وراح.
شوج واهي مب مصدجة اللي سوته ... انهارت وجعدت تبكي وركضت لغرفتها وسكرت الباب ع روحها.
في نفس الوقت وصل مراد وشاف سيارة عبدالله وهو رايح ... دخل البيت وشاف امه بالمطبخ جاعدة تنظف .
مراد : السلام عليكم .
ام مراد : وعليكم السلام .
مراد : يمه ولد عمي عبدالله كان عندنا؟؟.
ام مراد : أي كان يحاجي اختك شوج .
مراد : وبشو يباها ؟؟.
ام مراد : مادري ... بس يمكن نفس الموضوع ... الزواج .
مراد : اها ..ووينها شوج ؟؟.
ام مراد : يمكن بحجرتها او بالصالة .
يتجه مراد لحجرة شوج ويدج الباب .
مراد : شوج فتحي الباب بحاجيج.
شوج : بعدين مراد انا تو مشغولة .
مراد وباستغراب: اوكي مثل ماتبي.

إعـــــــلان

new NEW new NEW وحصريا** راعـــــــــي سمحة

new NEW new NEW وحصريا** راعـــــــــي سمحة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق