روح والله لا يردّك واحدٍ هذي علومه .. روح والحب الحقيقي شيّعه وأعلِن وفاته
روح أبحلم في زمانٍ ماجنيت إلا همومه .. البعض هانت سلومه والزمن زادت رداته
روح أبحلم مثل غيري يوم كلٍ له حلومه .. وأجهر بحلمٍ حلمته والخجل نرمي عباته
والله إني من رجال عالية قدر ومحشومه .. والرجل وش هي حياته كان ركب العز فاته
ويومها عندك تساوت روحه الخل وقدومه .. ماتساوت عند خلك سكرة الحب ومماته
ما دريت اشلون يوسف شقت زليخا هدومه .. وما دريت اشلون ربي انقذه وأظهر براته
وما دريت اشلون ربي انتقم من خصومه .. وأطلعت شمس الحقيقة لين وسط السجن جاته
وأنت مثل اللي ظلم يوسف وحومك مثل حومه .. الفعل نفس الفصيله والصفات مواصفاته
توني والله عرفت إن المواضيع محسومه .. يوم شفت الحب حبي والرحى رحاته
وشفت نظرات الخيانة والغدر هذي رسومه .. قلت أجهز للعصابه قبل تاصلني حصاته
ودام هذا قدر خلك في سواته من يلومه .. ودام هذا قدر خلك كل يسوي سواته
الوصال مع المذله يالله إنك لا تدومه .. والـ فراق بعز نفس الله يا ما أكبر حلاته
لا تّصورني ضعيف مغرّقٍ دمعه كمومه .. ولا تّصورني قوي مرخصك يانصف ذاته
والله إني ما عرّضت الخافق لمن هو يسومه .. وإنت من بد الخلايق جيتني ثم قلت هاته
بس ما صنته ولا خليته يكمل لصومه .. قلت:وقف عند حدك قبل لاتقطع صلاته
والله إنك ظالم وظلمك صوّبتني سهومه .. تكسر الخافق وتسعى ياشتاته في شتاته
ياجماعه كيف يرضى حبنا تسقط رجومه .. ياجماعه كيف يرضى أكون أنا من ذكرياته
كنت أقول ليا طرى لي ياجعل يومي قبل يومه .. وإن زهمني وقال حجرف قلت:آمر ياحياته
كان يجمع كل ضد وضد قسوه مع نعومه .. والحسن من الصفات النايفات موالفاته
ويوم عزّم للموادع والجفى شفته يهومه .. كنّي اللي يلفظ أنفاسه ويشهق في وصاته
شايب من صغر سنه مفخره لعيال قومه .. ويوم موته مابقى له غير باليمنى عصاته
وآخر اللحظات دمعه حايره خانت عزومه .. والوصاة اللي نطقها جملة شقّت شفاته
روح والله لا يردك واحدٍ هذي علومه ..روح والحب الحقيقي شيّعه وأعلن وفاته