يا كثر ما أزرع بتربة خفوقي
وللحين ما أعرف .. متى بقطف الكرْم ؟

كم تشتكي من قلّة الما عذوقي
هذا ونحن من صغرنا نفسل الصرْم

مواقف الأيام زادت شقوقي
وبعض الرجال اليوم يبغالها فرْم

لكن على أية حال من وسط موقي
كم طاح في الشدة ردي وكم بقى قرْم

البارحة .. ساري أطفّي حروقي
من شاطئ الغبرة إلى شاطئ القرْم

ياللي استبحتي دم يجري فـ عروقي
ليتك تركتي الحرب في الأشهر الحرْم

ما ودي إلا تنصفيني فـ حقوقي
أنا برئ إلين ما يثبت الجرْم

هو ذنبي إني كلما زاد عوقي
أتمنى بس يديك تستأصل الورْم ؟

كنك تشكلتي على حسب ذوقي
وعيونك الله ما خلق مثلها فـ " أرْم

ذات العماد " وكلما قلت : روقي
سد العيون يفيض من سيلها العرْم

وإلى متى وأنا أتحرّى شروقي ؟
عشان يحيى كوكب ويختفي جرْم

وقلبك متى تعبره نسْمات شوقي ؟
مثل م يعبر خيط الإبرة من الخرْم

وصلت نصف الدرب .. ونوّخت نوقي
ليتك مقرر وامتحن فيك ( مدْترْم )

حتى لو أنّ الكرْم لا زال فوقي
للحين ما أعرف .. متى بقطف الكرْم ؟


twitter: @fahad_alaghbari