مشكورة على القصة والله يعينك على كتابتها أقول فيك بارض

سوووووووري نسيت اقوللكم انها منقولة

عاد ما يصير نخالف حقوق النشر

وخلونا نشوف ردودكم علشان نكمل

رووووووووووعه

بس يا ريت تحطي القصة كامله

علشان ترتاحي من ازعاجنا

انا بصرااحه من فترة قريت القصة وااااااااايد طويله
وصدج ما تتفوت
نصيحة لكم اقروا القصة لان احداثها ووووااايد روعة

بالتوفيق للكل

كمــــــــــــــلي

كملــــــــي بلــــــــــــيز


القصـــــــــه روعــــــــــــه



ويسلمــــــــــــــــــــــــــــــوووو

مرحبا

تعتذر صديقتي ريحانة عن إكمال القصة

فسأتولى انا هذه المهمة


وسأقوم بإنزال الجزء تلو الأخر حسب ردودكم

وأتمنى لكم متابعه ممتعة

في الإمارات في بيت ضاعن العمران




سلطان: والله ان هالجرايم عوار راس.. وهالمطاردات اتزيغ الواحد.. مادري متى بنحس بالأمان..


فدوى: والله لولاكم انتوا جان الفوضى من راسنا لريولنا.. ربي يعطيك العافيه..


سلطان: اقولج امسات زخينا شله شباب .. كلهم مابين ال15 وال17 سنه.. يتعاطون ابر.. والله ان هاليهال يزيغون.. مايخافون على مستقبلهم الي يضيع.. كيف توصل لهم هالأشيا رغم التوعيه الي تترس المدارس وكل مكان من هم صغار يشوفونها.. بس مادري لين وين بنوصل من هالحال.. كلهم حولوهم اداره الأحداث... لأنهم قاصرين.. ومعظم الي نزخهم جيه.. نفس هالحاله..


فدوى: تدري شو المشكله يا سلطان.. الدلع والدلال الزايد.. او الإهمال الزايد.. الإفراط في أي من هاييل يكون سبب..


سلطان: هي والله صدقج.. معظم الي نزخهم عيال تجاااار.. وكباريه.. واتصادفنا حالات استثنائيه انزخ فقارى.. بس كيف نكتشف انهم يتعاطون عقب ما نزخهم في جريمه سرقه.. ولا قتل.. عشان يحصلون بيزات.. ومع الفحوصات يبين انهم مدمنين


فدوى: دخيلك دخيلك.. لا ترمس لأني شعر راسي اتيبس.. الا اقول امي.. ما عندج خبر عن عمي خليفه.. وشو سوت هند في عمليتها؟؟


ناصر: هيه هيه انا اعرف.. انا كلمت غزوول امسات قالت لي اليوم النتيجه.. والله اعلم


فدوى: ههههههه.. انت ويا الغزلان هاي.. لازم لازم ماتروم تفارقها..


ناصر: رابيه وياي.. بالحلوه والمره وياي.. اختي التوأم هاي..


فدوى وهي تحاول انها اتنرفز سلطان وبخبث.. : انزين.. نصووور.. ما عرفت اخبار وداد؟؟


ناصر فهم قصد فدوى فحب يشاركها الخطه: وداد؟؟ هيه وحليلها.. قالت ما بترد.. بتم هناك بعد شهر بتاخذ اجازه من غير راتب,..


سلطان: لا والله.. وليش يعني؟؟ شو الدوام لعب يهال هو.. تاخذ على كيفها اجازه..وبعدين شو اتسوي هناك.. مهو هند واليوم نتيجتها.. وعلاج وخلصت.. لازم يردون البلاد احين..


ناصر: لا هي قالت ملت من اشكال الي تجابلهم اليوم.. تبا تغير..


ام سلطان: بسكم عاد.. لا تلعوزون ولدي..


ناصر: لا والله .. وليش انا مب ولدج بعدك..


ام سلطان: كلكم عيالي وتاج راسي.. بس انتوا زودتوها شوي .. روحه مب ناقص..


سلطان: محد فاهمني غيرج يامي.. صدقج.. بس شو اقول.. غير ربي يهديها واتحس..


احمد: انت صدق فايج.. لو بدالك بنساها.. شو بذل عمري عشان بنيه.. اتهبي.. وبعدين شو فاكره عمرها يعني.. اونها عاد ما تباك.. لو اتلف الدنيا ما بتلقى شرواك..


سلطان: احمد رجاء..


احمد: والله انا برمس.. تعيبك رمستيه ولا ما تعيبك هب هامني شي..


سلطان: احمد وبعدين وياك بس خلاص..


احمد: خلصوا البنات الي في البلاد طايح لنا ورى بنت عمك.. مابلاها شي.. بنت والنعم فيها.. بس هي زين الي اتسويه فيك ياخوي.. اتعذبك هاجيه..


سلطان: الله كريم..


احمد: محد كريم غيرك انت.. الي معطنها حبك كله..


ام سلطان: وبعدين يعني.. ما بتسكتون عن اخوكم.. خلوا يقيل وهو مرتاح..


احمد: اسف امي.. بس انا والله قلبي على خوي..


فدوى: والله صدقه احمد يا سلطان.. فكر.. يوم البنت ما تباك خلاص انساها..


سلطان: الله كريم.. المهم.. انا ساير حجرتي .. تبون مني شي؟؟


ام سلطان: زين جيه.. حتى قعده ما خليتوه يقعد ويانا..


احمد: ماسوينا شي نحن.. قلنا الصدق.. يعني الواحد مايروم يرمس ويقول الصدق الا وطحتوا فيه..


سلطان: يلا تمسون على خير..


طلع سلطان من عندهم وصعد غرفته والهم كان هو الغطاء الوحيد الي طاغي عليه.. تايه ومحتار.. مايعرف شو يسوي.. يرضي كرامته الي ما ترضى بهالذل الي تذله اياه بنت عمه.. ولا يرضي قلبه الي تعلق بطيف وداد.. حنانها وحبها واهتمامها وطيبتها الي تتصرف فيه ويا الكل الا معاه.. ورغم انه تقدم لها كذا مره ترفضه.. ياترى العوق فيه ولا شو .. ودي اعرف بس وارتاح.. لأني صدق تعبت.. يارب انك اتيسر علي.. واتخفف علي همي..


ومن دخل الغرفه ما صدق يشوف السرير الا وفر عمره عليه.. وماحس بعمره الا وغط في نوم عميق


..


في ألمانيا..


وصل سعيد ويا غزلان البيت.. وسعيد من اول ما نزل وهو يتحرطم على غزلان بسبب الأجياس الوايده الي لازم يشليها..


سعيد: يعني انتي الحين.. مارمتي تتشرين في البلاد.. بلشتيني وياج هني.. طفرتيبي.. شو ها.. ارحميني دخيلج.. شلي انزين جيس واحد على الأقل..


غزلان: ماشي.. مب شاله شي.. يكفي الي سويته فيني واحرجتني جدام ابراهيم الكرييييييه


سعيد: شو كريه.. الريال يبا مساعده عيب علي ما اساعده..


غزلان: الله والمساعده الي يسمع عاد مادري شو..


سعيد: يلا عاد.. خلج حنونه علي.. ترا والله اذا دق براسي بفر الأجياس وما بشلهم..


غزلان: ها شو.. لا لا مافيني ادريبك انا مينون وبتسويها...


سعيد: حرييييييييم.. ما ايون الا بالعين الحمرا.. يلا جدامي اشوف..


غزلان: ان شاء الله..


سعيد: هههههه مطيعه استويتي اشوف..


غزلان بصوت واطي: خل اوصل فوق واحط الأغراض في امان براويك يالنحس..


سعيد: شو قلتي ما سمعت..


غزلان: ماشي.. قاعده اغني بروحي..


سعيد: لحظه غني بصوت عالي ابا ارقص..


غزلان: هههههههه.. انت ما تصدق تسمع دق.. اخبرك.. شو تتوقع احين اشكالهم.. خايفه ادخل وانصدم..


سعيد: لا ان شاء الله خير..


غزلان: انت توأم عالفاضي.. يعني مول ماشي احساس..


سعيد: شو قالولج.. توأم في كل شي..


غزلان: اففف يلا افتح الباب..


سعيد: لا انتي فتحي الباي..


غزلان: اغراض في ايدي افتح الباب..


سعيد: نزلي الأغراض وانتي فتحي الباب..


غزلان: لا حبيبي انت حط الأغراض وافتح الباب..


سعيد: لا إله إلا الله.. يلا دشي..


غزلان: احم.. الـسّــــلام عليـــــــكم


وداد: وعليكم السلام.. مابغيتوا اتردون.. جان رقدتي في السوق وياه


سعيد: هي دخيلج هزبيها شوي.. جتفي اتكسر من الأثقال الي شالنه اليوم..


غزلان: انزين شو اسوي.. خلصت اليوم كل شغلاتي لأنه بنرد ومافيني بعد اتأخر.. فخلصت كل شي في يوم واحد..


سعيد: انزين.. وداد.. شو؟؟ النتيجه كيف؟


وداد اتغيرت ملامح ويها لحزن كبير.. فهم من خلاله سعيد الموضوع وزاد حزنه.. راح على طول غرفته واما غزلان فتمت اتصيح..


وداد: شو فيج..؟؟ زعلتي من رمستي؟


غزلان: لا شو.. افكر في اختي.. هند والله يحليلها وايد تعبانه لين متى بتم على هالحال..


وداد: هي والله.. ربي يشافيها.. انا خايفه عليها زود عنج.. بس الله يكون في عونها..


غزلان: حرام والله.. واحين هي وين؟؟


وداد: تبين تروحين لها مسحي دموعج.. تدرين هي اشكثر حساسه وما تتحمل.. لا تعبينها زود..


غزلان: ان شاء الله..


راحت غزلان عند هند عشان تتطمن عليها وشلت وياها مجموعه اجياس..


غزلان: الســــلام عليكم.. اشحال حبيبتي.. ؟


هند: بخير.. انتي اشحالج؟؟


غزلان: انا بخير بس يوم شفت ويهج الحلو.. احسن من مجابل توأمج ها..


سعيد: شوووووو.. جني سمعت حد ياب طاري


غزلان: بل..


هند: هههههه


غزلان: فديت هالضحكه.. لعلها دوم.. احين شوفي.. بطلع الي بالأجياس عشان اتشوفين شو خذت لج.. ان شاء الله بس ذوقي يعيبج..


هند: دومج تاخذين لي اشيا حلوه.. وانا واثقه في ذوقج..


سعيد: ما عليج منها جذابه.. انا اخترت لج..


غزلان: عاد احين مبين الجذب.. انت شو عرفك بأغراض البنات عشان تختار اصلا


سعيد: نسيتي اني في استراليا بروحي .. تعلمت كل شي..


هند: لا والله.. طحت من عيني..


سعيد: لا لا لا لا لا.. لا تفهموني غلط..


غزلان: فهمنا وخلصنا..


سعيد: انتي افهمي ما عليه.. بس هنووودتي لا..


تموا يسولفون ويضحكون وقتها حست هند بالفرحه من كل قلبها.. تمت تضحك والكل مستانس يوم شافها تضحك ونست الي هي فيه.. اما وداد كعادتها شغل البيت على راسها.. وكل شوي قابضه التليفون تتصل في هادف الي ما يرد على مكالماتها..


وداد: وبعدين يعني ويا هالولد.. لين متى بيتم جيه.. نبا نتطمن عليه ما يرد..


ام سعيد: ها هادف من يوم ما هو صغير ما يحب الا نفسه.. ما تعرفين اخوج


وداد: خاطري اعرف على منو طالع.. ابوي.. في حد كان جيه شراته.. ؟


ابو سعيد: هيه.. عمج فاضل كان جيه الله يرحمه.. راح وابوي ما كان راضي عليه.. دوم كان يكسر بخاطر ابوي.. وامي المسكينه الي دومها كانت تاكل هزاب منه وتسكت


وداد: عيل ماشي.. طالع على عمي المرحوم.. بس كيف اتوفى؟


ابو سعيد ما يحب يعيد ذكريات طاري اخوه العود فاضل.. ما يبا عياله يعرفون عمهم شو كان.. وكيف كانت نهايته.. يخاف انهم ياخذون فكره مب حلوه عنه.. وهو ما يبا هالشي.. تم يطالع ام سعيد ومب عارف شو يرد.. وام سعيد حاولت تتدارك الوضع وردت عنه


ام سعيد: ماشي.. حادث .. ترا كان طايش الله يهداه


وداد: بسم الله على اخوي.. الله يهديه ان شاء الله.. ابوي.. لازم انسوي شي.. نوقف بويه هادف ما فينا يستوي شرات عمي المرحوم


ابو سعيد: لا.. لا تقولين هالكلام.. انا أي شي بتحمله الا انه يصير شرات عمه..


ام سعيد: بسم الله على ولدي..


وداد: المهم انا ماشي اليوم لازم ارمسه ما برتاح غير يوم يرد بتم اتصل لين ما اطفر به ويرد علي..


تمت وداد اتكمل شغلها واتحاول مره ثانيه وثالثه .. ورابعه لين ما رد عليها..


هادف: الوووو


وداد: هادف.. اخوي حبيبي اشحالك؟؟


هادف: لا والله.. حبيبي اونه.. انتي محد حبيبج غير هندوو وسعيد وغزلان.. ولا انا عمري ما كنت حبيبج..


وداد: حرام عليك لا تقول هالرمسه.. انت تدري اشكثر اتصل بك انت ما ترد علي مادري اشبلاك..


هادف: مب فايج.. مشغووول في المخيم..


وداد: انتوا بعدكم في مخيم الكشافه..


هادف: هيه.. انزين شو تبين احين؟؟


وداد: حرام عليك اترمسني جيه... هادف انت ليش كله اتحس اني ما احبك..


هادف: ذاك اول يوم اتحبيني.. يوم انا صغير.. بس من يوم ما تعبت علينا هند وانتي على هالحال والموال.. نسيتي هادف الصغير..


وداد: لا تقول هالرمسه.. انا عمري ما نسيتك.. اسأل امي وابوي كل يوم انش اتخبر عنك..


هادف: شكرا.. بعد في شي؟؟


وداد: هادف.. لا اتكلمني جيه..


هادف: مع السلامه


وماخلاها اتكمل كلامها وبند الخط بويهها.. تمت وداد اتصيح على معامله هادف لها.. هادف كان دلوع بما انه اخر العنقود.. الكل دلعه .. والكل اهتم فيه.. وداد كانت شاغله كل وقتها في رعايته .. واتشوف اموره.. كانت اكثر وحده تهتم فيه من هو صغير.. كانت هي الي اتسوي له غرشه الحليب واترضعه.. واتأكله واتلبسه.. وادرسه.. لكن من يوم ما بدت حاله هند تزداد سوء اتجه اهتمامها صوب هند.. وبدت الغيره عند هادف.. ودومه على مشاكل مع هند.. اناني لدرجه فضيعه من غير لا يفكر في حاله اخته المريضه.. كل همه ان طلباته تتنفذ ولا يرضى بكلمه لا تتوجه له..


..


في شقه ابراهيم العامودي..


كان قاعد ابراهيم ويا ربعه لكن باله عند غزلان.. يعاني من جفاف معاملتها وياه.. ما يدري سر هالجفا شو.. ليش اتعاملني جيه.. شو مسوي لها.. وهي تدري اني من يوم ما شفتها وانا احبها.. دومها حاقرتني.. ياترى هي اتحب غيري.. في حد ثاني في بالها.. لا مستحيل.. ما اتوقع.. غزلان اصلا ما تعرف الحب ولا في يوم جربته..


ابراهيم: اللوووو


حصه: هلا والله بأخوي الغالي.. اشحالك؟


ابراهيم: بخير.. انتي وين اسمع عندج حشره..


حصه: سايره ماركاتو ويا عزيزه وسالم..


ابراهيم: اشعليج يالدبه.. تظهرين وانا محد ما قمنا نترس عينج ما تبين تظهرين ويانا


حصه: افا والله يهون عليك.. انت بس تعال هني.. وكل يوم بظهر وياك..


ابراهيم: لا خلاص هونت.. شو كل يوم.. بتهدين حيلي..


حصه: هههههههه.. عيل مره ثانيه لا تعطي افرات..


ابراهيم: حصووووو.. اخوج متعذب..


حصه: لاه لاه لاه.. بسم الله عليك.. شو صاير انت بس قول لي؟؟


ابراهيم: ربيعتج هاي.. ما تحس.. ما عندها قلب ولا شو؟؟


حصه: ليش؟؟ شو يخص غزلانووو


ابراهيم: تراني اليوم شفتها وانا كنت اتشرى في السوق..


حصه: هههه.. قول الله.. شيييييييت فاتني والله.. اتخيل كيف كان شكلها.. اكيد تتطالعك من فووووق لين تحت


ابراهيم: لا دخيلج لا اتذكريني بنظراتها.. والله مغيض منها... مافيها احساس


حصه: هاي اتحس بكل شي.. الا بالشباب..


ابراهيم: لا والله.. وانا شو ذنبي ان شاء الله..


حصه: منو قال انك اتحبها ما لقيت غيرها..


ابراهيم: لا مالقيت.. ولا ابا القى..


حصه: عيل تحمل الي اييك منها.. هاي غزلان ما بتتغير..


ابراهيم: ما تعرفين ليش هي جيه وياي.. قولي لي الله يخليج لو تدرين..


حصه: يارييييييت لو ادري.. هاي غزلان وحده غامضه.. وحده همها كله السكوت.. وما ترمس.. كيف بعرف.. كلها على بعضها لغز محير..


ابراهيم: حلات اللغز يوم انه منها .. احبها والله..


حصه: وجاااااان اتغار حصووو


ابراهيم: لا انتي قلبي اصلا.. مكانج محد يشيله..


حصه: تسلم لي والله.. يلا انزين.. لا اتطول بتخلص بطاقتك.. وبعدين انا ابا استانس في مركاتو.. يلا اجلب فيسك..


ابراهيم: بل.. مووول ما تعطي ويه.. باي


حصه: ههههه.. باي



بندت التليفون وتمت اتعدل وقايتها وهي موخيه راسها من غير لا تنتبه دعمت واحد.. افتشلت حصه.. ولو ان الدعمه كانت قويه واتعور خصرها.. بس يودت عمرها ومن فشيلتها احمرت من خاطرها .. وهي تلعن في ابراهيم وعزيزه عشان ودرتها..




حصه: اااااسفه..


الولد ها تم يطالعها ومب منزل عينه من عليها.. ومب منتبه لكلامها.. مفتون بذيج العيون الي جدامه.. وذاك الخجل الي باين على ويهها.. شي عجيب.. ملامح البراءه والرقه والجمال والخجل مختلطه في انسان واحد.. ما كان قادر يقول شي.. حاس لسانه مربوط.. وحصه مستغربه من نظراته..


حصه: اسفه.. بس ليش تتطالعني جيه.. قلت اسفه؟؟


عادل: ها.. لا عادي.. ما حصل الا الخير..


حصه: السموحه..


ومشت عنه وهو يصد ورها ويتم يلاحق خطواتها.. وهي لاحظت انه صد وراها لكنها تجاهلته.. بس الفضول يقتل صاحبه تمت اتحاول انها اتصد عورى واتشوف.. ومن شافت عيونه متجهه صوبه ما قدرت ردت لفت عنه وتتصل في عزيزه عشان اتعرف مكانهم.. لكنها ضيعت.. وتمت اتدور عليهم.. فشافت على واجهه محل بدله عيبتها وااايد.. دشت عشان اتشوفها وتاخذها.. وعادل بعده وراها ويراقبها.. وهي تدري بس مطنشه.. وسارت اتدور على البدله لقت.. بس ما حصلت على قياسها كان مخلص.. طلعت وهي خاطرها في البدله ومتضايقه.. عادل دخل المحل وراها وتم يسأل راعي المحل عن البدله وعن حصه.. فعرف ان القياس الي تباه ماشي.. تم يحاول انه يدبر له البدله على القياس الي يباه بأي طريقه.. فعرف ان في فرعهم الثاني الي في السيتي سنتر عندهم.. حجز عندهم البدله ودفع سعرها في هالمحل عساس انه يروح ويستلمها من فرع الستي.. وطلع يدور على حصه الي شافها قاعده ويا اهلها على طاوله وطالبين من باسكن.. استغرب للي شافه جدامه.. سالم استاذه الي درسه في الجامعه.. شو موقفنه عند حصه.. معقوله يطلع اخوها.. جرب صوبهم وسار يسلم على سالم.. ومن لاحظت حصه انه عادل يجرب صوبهم ارتبكت.. ودقات قلبها تزيد.. مب عارفه شو اتسوي.. وترتجف.. خايفه..


عادل: السلام عليك دكتور.. اشحالك؟؟


سالم وهو يطالع عادل بنظره يحاول يتذكره فيها.. : امم.. عادل على ما اعتقد صح..


عادل: هي .. ماشاء الله ذاكرتك قويه..


سالم: شفت كيف.. اشحالك؟؟ شو مسوي.. ؟


عادل: والله بخير وعافيه.. انت اشحالك دكتور؟


سالم: بخير لله الحمد.. شو ها .. اتوظفت؟؟


عادل: الحمد لله.. اشتغل في الوزاره احين..


سالم: لا والله.. زين.. زين.. يالله ربي يوفقك..


نوره بنت سالم جربت من ابوها وتنادي عليه: بابا.. بابااااااااااا..


سالم: ها اشتبين.. ما تشوفين ارمس..


نوره: ماما وخالو حثه.. ما يخلوني الوح العب داخل..


سالم: ماعليه.. بنوديج احين..


نوره: وييييييو.. خالوو حثه.. بابا قال بيوديني..


سالم: عيب..


عادل من سمع طاري خالو عرف انها مب اخته.. ولكنه كان كل ما يغفل سالم عنه يراقبها وهي تحاول تتجاهله..


عادل: المهم دكتور.. انا بخليك احين.. بس حبيت اسلم عليك.. ولو ما عليك اماره تعطيني رقمك عشان اكون على اتصال وياك


سالم: تسلم.. افا عليك والله .. هاك رقمي سجله عندك.. *******


عادل: تسلم.. يلا مع السلامه..


سالم: مع السلامه


وراح عادل الي مب عارف سر تصرفه بهالطريقه.. مب قادر يفسر ليش سوى هالشي وخذا رقم سالم.. شو الي جذبه صوبهم.. حبه للسلام ولا حصه.. وحصه كانت مستغربه وخايفه في ذات الوقت.. محد قادر يفسر هالتصرف وسببه..


..


هادف كان قاعد ويا شله ربعه .. مستانس ولا مفتكر في شي.. ولا فكر انه يسأل عن حال امه المسكينه الي اتحاتيه.. ولا عن اخته التعبانه.. كيف صار؟؟ شو نتيجه عمليتها.. وكان عند البحر ويا ربعه يسولف ويضحك.. ويلعب.. مب داري الزمن كيف راح يدور وياه.. ولين متى بيتم على هالحال.. ورضى والديه عليه ممكن يتسبب في ضياعه وعدم توفيقه.. ماكان مفتكر في شي.. همه كله يستانس وبس.. وهو يلعب صار غش في اللعبه.. عصب ونش يتدافن ويتضارب وياهم..


طلال: خلاص يا جماعه هدوا..


هادف: طلال صخ عني .. عيل اخر زمن ولد الشحاتين ها يغشني..


محمد: انا هب ولد شحاتين فاهم.. انا اشرف عنك وعن عشره من امثالك.. وبعدين انا ما غشيت الورقه كانت عندي اصلا


هادف: يلا عاااااااااد.. انت اونك بتيلس اطلع عمرك برئ جدامي..


طلال: يا جماعه.. ذكروا الله ترا هاي كلها لعبه ما تسوى انكم تتضاربون عشانها..


محمد: لا خله ولد الأصول والأوادم يرمس يطلع الي في خاطره..


هادف متعود في كل طلعاته يشل وياه خنجر صغير.. سلاح يعني.. ومن سمع كلام محمد مارام طلع السلاح والكل من شاف السلاح الي شرد وخاف انه يتورط والي حاول يهديه ومب قادر.. واما هادف فخذا الخنجر وطعن فيه محمد.. : هذي لأمثالك عشان يتأدبون ويعرفون يرمسون منوو..


وهني طاح محمد على الأرض والدم منتشر كل مكان من ثيابه.. الكل شرد..الا طلال تم ثابت مكانه.. عمره ما يرضى بالظلم ولا يرضى بالإهمال.. اتصل في الشرطه عشان ايون الموقع.. ويلحق على محمد.. وما تأخروا فريق الإنجاد كلها ربع ساعه ووصلوا.. والإسعاف خذوا محمد ودوه المستشفى.. اما هادف فكانوا يطاردونه لأنه شرد.. وطبعا ما قدر عليهم.. مسكوه ودوه التوقيف.. واما محمد فكانت حالته خطيره في العنايه المركزه.. وطلال مب عارف شو يسوي.. اتصل في ناصر ولد عم هادف ..


ناصر: هلا والله طلال.. اشحالك؟؟


طلال: بخير.. يسرك الحال.. بس ماشي وقت احين للسوالف خلها بعدين.. ناصر.. وين ابوك


ناصر: ابوي؟؟ في البيت ليش شو صاير؟؟


طلال: ناصر.. هادف تراه اتضارب ويا شله ربعه والأخ طعن محمد ربيعنا.. وهو احين في المركز موقفينه.. انا اعرف ان ابوه ولا اخوه محد هني فقلت خل اخبرك عشان تتصرفون..


ناصر حاس راسه افتر مب قادر يستوعب أي كلمه.. كيف .. هادف معقوله ولد عمه يسوي جيه.. يعرف عن تصرفاته بس عمره ما تصور انه يوصل لهالحد من التصرفات ويستوي مجرم..


طلال: ناصر.. اشفيك ساكت.. شو بتسوي احين؟؟


ناصر: مادري.. بكلم سلطان وبخليه هو يفتح السالفه حق ابوي انا ماروم الصراحه.. مصدووم


طلال: والله حاولنا وياه.. حاولنا انهديه بس ما رمنا.. الله يهديه بس..


ناصر: يالله عيل.. تسلم ما تقصر..


طلال: في امان الله


بند ناصر عن طلال وسار عند اخوه سلطان.. كان قاعد في الغرفه.. يراجع اوراقه ويفكر ..


ناصر: سلطان.. فاضي؟؟


سلطان: هي تعال داخل ناصر.. شو صاير؟؟


ناصر: ماشي.. سلطان ابا اخبرك سالفه مستويه حق ولد عمي هادف.. توه ربيعي خبرني عنه


سلطان: خير خبرني..


تم ناصر يقول السالفه لسلطان.. الي مب قادر يصدق.. او يستوعب أي كلمه يسمعها.. وتم مبهت..


سلطان: لا حول ولا قوة الا بالله.. صدق فضحنا هالأخو..


ناصر: احين دخيلك نش قول حق ابوي.. عشان يتصرف..


سلطان: مب قايل شي.. انا بروح المركز وبشوف شو السالفه.


ناصر: خلاص اوكي..


سلطان: المهم مابا حد يعرف لين ما انا اتصرف واشوف اخرتها شو..

احم هذه نهاية الجزء الاول








الجزء الثاني

(للحب عنوان)


ملخص أهم أحداث الجزء السابق: ( طلعت نتيجه فحص هند سلبيه.. أي انه ماشي علاج لحالتها الصحيه لأنه مكان الثقب يشكل خطر عليها اذا تعرضت لعمليه اخرى.. هادف ارتكب جريمه في حق ربيعه بعد ضرابه دارت بينه وبين محمد.. وسلطان تولى الموضوع .. نشوف شو سوى سلطان)

طلع سلطان من البيت وراح صوب المركز.. وناصر حبس عمره في الغرفه وقاعد يتريا اتصال سلطان وكل شوي حد من ربع هادف يتصل لناصر.. وهو اعصابه تلفانه.. ناصر صحيح انه في عمر المراهقه الا انه له شخصيه قويه .. وفي نفس الوقت انسان في غايه الإحترام.. الكل يحبه.. اساتذته .. واهله وربعه.. محبوب من قبل الكل.. وأهم من هذا كله كان متفوق جدا.. ربع هادف ماكانوا يحبونه ليش انه كان يحاول دايما يبعد هادف منهم.. الي كانوا مستغلينه لمصالحهم الشخصيه.. كانوا دوم يستهزئون فيه .. تم ناصر في هاللحظات يتذكر وحده من المواقف الي كانت اتصير له في المدرسه مع ربع هادف..

في يوم من الأيام وصل ناصر ساحة المدرسه وسوء حظه ان الشله الصايعه كانت جدامه (حميد وعيسى وحمد وعلي)

حميد: جماعه جماعه وصل وصل دلوعة الماما(( يقصدون خالد)) ...

علي: يالله خل نضحك شوي على الصبح

يمر ناصر من عندهم.......

ناصر: السلام عليكم

حميد يرد عليه بسخريه : وعليكم.............

عيسى: السلام

حمد: ورحمة الله

علي: وبركاته

ويضحكون

ناصر: الله يهديكم بس

حميد: حمد لله الله هادني شو شايفني مع ويهك

عيسى: اسكت عنه .. شو تبا فيه ... الحين بتفلسف علينا واحنا مب ناقصين

حمد: أقول نصووور... انت مواطن ولا زلمه ولا مواطن مجنس

ويضحكون على خالد

ناصر: مب راد عليكم ....

..

رجع بذكريات لأرض الواقع وابتسم وتم يطالع السما ويتأمل نور نجومها.. تذكر هادف.. ورد يطالع تليفونه شاف 5 مكالمات لم يرد عليها.. استغرب كيف انه ما انتبه على رنه التليفون.. وشاف ان سلطان متصل فيه.. على طول رد اتصل في سلطان عشان يعرف الأخبار..

ناصر: هلا.. ها طمني شو؟
سلطان: شو اقووول لك.. التهمه مثبته عليه.. البصمات وكل شي اتدل انه هو.. واهل الولد مب راضين يتنازلون لأن ولدهم شكله وايد تعبان..

ناصر: لا حول الله.. والحل احين؟

سلطان: شو اقول لك.. مادري احس راسي بينفجر.. اقولك من دشيت المركز الضباط كلهم يطالعوني بنظرات ربك لا يقول انه يمر عليك حد ويطالعك شراتهم.. يعني صدق حسيت بفشيله.. انا ضابط مكافحة الجرائم والمخدرات اخر شي يطلع ولد عمي مجرم..

ناصر:ماعليك من حد.. شو بتسوي تراه ولد عمنا لو شو ما سوى مانروم ننكره..

سلطان: صدقك.. بس ساعات ودك تزغده.. يعني عليه حركات الصراحه ما تتحمل.. لا ويا اهله ولا الي يسويها برع.. ما يفكر ها ولا شو؟

ناصر: انت شفته؟؟

سلطان: شفته .. وياليتني ما كلمته.. سود ويهي زود..

ناصر:!!!ليش؟

سلطان: يرفع الضغط ولا كنه مسوي شي.. يدافع عن نفسه بطريقه يا ناصر اتقول الي مسونه شي بسيط..

ناصر: الله يهديه.. على منو طالع مادري..

سلطان: ابوي وعمي يقولون انه طالع على عمنا فاضل المرحوم..

ناصر: ها الي يقولون اتوفى بحادث..

سلطان: ولو اني احس انه اكثر عن جيه.. لأن دوم يوم نسأل عنه يتهربون.. وبعدين ايام اول ماكان في حد يسوق الا نادرا يعني مادري انا شاك في الموضوع.. بس يالله طنش شو بتسوي

ناصر: صدقك انا بعد احس جيه..

سلطان: يلا انا وصلت البيت.. ابوي وينه؟

ناصر: مادري انا في غرفتي من وقت ما ظهرت انت ومادري عن حد

سلطان: خلاص عيل .. يلا باي

بند سلطان عن ناصر وما لحق يحط التليفون الا وسمع صوت صياح في البيت.. اتفاجأ.. شو السالفه؟؟ حد عرف شي ولا شو؟؟ طلع من غرفته يشوف شو الي صاير.. شاف كعادتها فدوى اخته من اتشوف فلم هندي تبدأ رحله المناحه عندها.. بس عاد هي تاخذ الأمر بجديه بحيث يعلى صوت صياحها.. تم يطالعها ويضحك على شكلها وتصرفها ونفس الشي جاسم ريلها..

ناصر: خبله والله..

جاسم: الله بلاني بخبله.. عاد الي يشوفها يقول بسم الله حد ميت

ناصر: ههههههه.. ايه انتي.. (فر عليها الكوره الصغيره الي كان يلعب فيها عامر ولدها).. والله انه فلم مب صدق..

فدوى صدت صوب ناصر والدموع تارسه عينها: حراااااام .. ليش جتلوووه.. والله انه مظلوم.. انت شوف .. يوم بريتي سارت عند اجاي..

ناصر: بس بس.. خلاص مظلوم مظلوم ولا تزعلين.. عاد انتي لا تقعدين اتقولين لي القصه

جاسم: ههههه.. جنها ياهل يوم تتطالع فيلم هندي.. اما يوم رايقه مافي اعقل عنها.. ما ادانيها يوم اتابع فيلم ولا شي..

ناصر: المهم خلكم من الفيلم.. في شي حقيقي صاير احين اهم من هالأفلام كلها.. لازم نقعد كلنا انفكر شو انسوي؟

جاسم: شو صاير؟؟

فدوى: شو السالفه ناصر؟؟

ناصر راح عندهم وقعد حذالهم وخبرهم السالفه بالتفصيل.. فدوى وجاسم الصدمه كانت مبينه على ملامح ويهم.. أحمد دخل ويوم شافهم مجتمعين واشكالهم مندمجين والصدمه الي في ويهم وجدية ناصر في الكلام خلاه يحس ان في شي كبير صاير.. راح عندهم وسألهم فقاله جاسم الموضوع.. ونفس الشي احمد انصدم بدوره ومب قادر يستوعب أي شي..

أحمد: لحظه لحظه.. احين السالفه هاي صدق ولا شو؟؟

ناصر: اسميك انت.. من الصبح قاعد ارمس وجاد في كلامي واخر اتشك في رمستي..

جاسم: بس ما توقعت ان هادف توصل فيه لدرجه انه يرتكب جريمه..

ناصر: لا انا شخصيا مب متفاجأ واحد مثل هادف يطلع من البيت ولازم يكون في مخباه سلاح ولا مسيل دموع شو تبا منه؟؟

فدوى: وعمي ومرت عمي يدرون؟

ناصر: لا ما اعتقد..

أحمد: خل أي حد يعرف الا هند.. ما بتتحمل الصدمه..

فدوى: فديتك والله بعده قلبك عليها..

أحمد: حالتها الصحيه يا فدوى

فدوى: ولا تنكر انك اتحبها؟

أحمد: هيه.. بس مب الحب الي انتوا مفسرينه.. هند انسانه شفافه.. مثل الزجاج بسرعه ترومين تدخلين واتشوفين الي في خاطرها.. وفي قلبها.. وبسرعه ينكسر بس الكسر ولا الخدش الي ايي عليها ما تنساه ويكون اثره سلبي عليها..

فدوى: هي والله.. ربي يشافيها ويعافيها

ناصر: انتوا الحين حلوا مشكله هادف عقب فكروا في غيره.. اهل الولد مب طايعين يتنازلون ابد

جاسم: هني كل شي يتعقد دام انه اهل الولد مصرين صعب اننا نقدر انسوي شي.. خصوصا ان التهمه ثبتت عليه

أحمد: أي واحد من ربعه؟؟ اتعرفه انت يا ناصر؟؟

ناصر: هيه محمد منصور.. ربيعنا.. ولد مسكين طيب.. بس من يوم ما رابع هالشله قام يتأثر منهم

أحمد: والله مشكله الربع الي يخربون .. هالأيام الواحد لازم ياخذ حذره يرابع منو ولا يبتعد عن منو

جاسم: هي والله.. بس وين ايامنا نحن.. ماشي شرات الي اشوفه احين.. كنا انشاغب بس ما انأذي حد

فدوى: الله يعين عمي ومرت عمي لا دروا شو بيسوون؟؟

ناصر: انا هذا الي شاغل بالي ومعور راسي..

طلع سلطان وابوه من المكتب وشافوا الكل متيمع..

سلطان: ناصر.. خبرتهم..

ناصر: هيه..

(ضاعن) بوسلطان: شوفوا يا عيال.. اذا اتصل عمكم ولا أي حد فيهم لا تقولون لهم شي.. واذا سألوكم عن هادف قولوا انه برع ولا أي حجه ثانيه بس لا تقولون لهم السالفه

أحمد: بس ابوي.. شو بنسوي احين.. التهمة ثابته عليه

بوسلطان: هي والله مشكله.. بس انا لو مني بخليه في السجن عشان يتأدب..

ناصر: مسكين محمد.. شو حاله احين؟

سلطان: انا زرت الولد.. والدكتور قالي انه حالته بدت تستقر.. لكنه بعده ما عدى مرحلة الخطر.. واهله كلهم يصيحون.. زغت اني اجرب واقول لهم ان هادف ولد عمي .. ما هان علي المنظر الي اشوفه حريم يصيحن..

فدوى: الله يشافيه.. بس دخيلكم رمسوا هل الولد حاولو وياهم.. حرام والله انا كل خوفي على عمي ومرت عمي المساكين شو ذنبهم..

بوسلطان: والله انهم رايتهم بيضا..دوم يحاولون ويا هالولد.. بس مادري ها كيف..

ناصر: على قولتكم طالع على عمي فاضل..

بوسلطان: الله يسامحك يا فاضل.. يوم خليت ولدنا يطلع عليك..

أحمد:عمي شو ذنبه.. اصلا يوم عمي توفى انتوا ما كنتوا معرسين حتى عشان نحن ننوجد..

بوسلطان: دخيلكم.. انا ساير احط راسي لأن راسي بينفجر..

فدوى: فديت ابوي انا.. سير ريح ابوي.. راحتك اهم عندنا..

بوسلطان:يلا تصبحون على خير..
سلطان: شوووف مثل ما قلت لك ناصر.. دووم من انييب طاري عمي ابوي يغير السالفه.. اكيد مسوي شي؟؟

أحمد: انا بعد حسيت جيه,..

جاسم: شوفيكم انتوا.. فكروا في الي نحن فيه احين.. وخل عنكم موضوع عمكم..

ناصر: صدقه جاسم..

الكل سكت على رنة التليفون..ونظرات الخوف والقلق من الرد باينه على ويوهم.. راح ناصر صوب التليفون ويوم اطالع في الكاشف شاف انها مكالمة من خارج الدوله..

ناصر: انا مب راد.. أي حد ثاني خل يرد..

أحمد: ولا انا.. ماروم الصراحه..

سلطان: مالت عليكم.. بهالطريقه بتخلونهم يشكون.. خوزوا أنا الي برد علي التليفون .

رح سلطان صوب التليفون ورد عليه.. : الوووو

كانت وداد على الخط الثاني.. ساد الصمت عليها يوم سمعت صوت سلطان.. ليش انت الي رديت.. ليش؟؟ ااااااااااه مابا .. الي فيني يكفيني .. دخيلكم حسوا فيي.. : الو..

سلطان حس ان قلبه بيطلع من مكانه من سمع صوت وداد.. حس نفسه ناسي كل شي.. ومحد في باله غير صوره وداد مرسومه جدام عينه.. متى بتحنين علي.. احبج يا بنت عمي.. : وداد.. اشحالج؟

وداد: بخير الحمد لله.. انت اشحالك.. ؟

سلطان: بخير ربي يعافيج ويخليج..

وداد: سلطان.. وين هادف اتصل على تليفون وكله مغلق وهاي اول مره يغلق تليفونه.. ما تدري وينه؟

سلطان حس كأنه ماي بارد وانصب عليه.. ما عرف شو يرد ولا شو يقول.. تم ساكت.. والكل يأشر عليه انه يرمس ولا يخليها اتشك..

وداد: سلطااااااااان.. شو صاير.. قول لي.. دخيلك لا تعب قلبي.. الي فيني يكفيني..

سلطان: وداد.. مب صاير شي.. بس كنت احاول اتذكر وين شفته.. هو مضيع تليفونه في البحر وهو كان يسبح ويا ربعه.. وتدرين اليوم خميس يعني باجر الجمعه مارمنا انطلع له بدل فاقد.. لا تحاتين

وداد: اششششوه.. والله ما طاع يهدى لي بال وانا اتصل والتليفون مغلق.. ها اخرتها بيذبحني..

سلطان: بسم الله عليج.. لا تقولين هالرمسه..

وداد: سلطان..

سلطان: نعم.. امريني.. وداد.. دخيلج.. مثل ما تبيني احس بقلبج.. انتي حسي بقلبي.. اتحسين بكل القلوب الا قلبي ساهية عنه ليش.. فهميني.. ؟

وداد: شوفيك انت... شو هالرمسه.. سلطان.. انساني..

ومالحق سلطان ينطق الا وسدت الخط بويهه.. فهو عصب وشل التليفون وضرب فيه اليدار.. وطلع من عندهم ودخل غرفته.. عمرها ما بتحس.. عمرها ما بتحس.. دايما جيه.. قاسيه وياي انا بالذات.. ليش انا شو مسوي لج..شو ذنبي اني حبيت بنت عمي وفضلتها على كل الحريم.. اااااه.. وداااااااد .. وداااااااااد وداااااااااد.. ليش ما يغيب طيفج من بالي.. ليش.؟؟

يتبع ,,,

ألمانيا..


تمت وداد قاعده مكانها واتصيح.. ودخلت عليها هند وشافتها في هالحاله استغربت.. شو فيها؟؟ شو الي يخلي وداد اتصيح؟؟ ياترى شي صايب هادف.. الأهل هناك شي فيهم؟؟


هند: ودااااااد.. شوفيج؟؟


وداد: هند.. تعبت يا هند.. مب قادره اتحمل..


هند: بسم الله عليج شو فيج.. خبريني..


دخل عليهم سعيد وشاف هالمنظر.. ماهان عليه اخته الحبيبه وداد الحنونه اتكون في هالحاله.. قرب وقعد وياهم..


سعيد: شوفيج؟؟ خبرينا.. ما يهون علينا نشوف هاللآلئ تنزل من عيونج..


وداد: سلطان.. ليش دومي اجرحه؟؟ ما ودي بس غصبن عني.. لازم ينساني.


سعيد: وداد.. انزين شو الي يعيبه خبرينا.. ؟؟ هو يحبج؟؟ وشو الي يخليج تجرحينه؟


هند: صدقه سعيد يا وداد.. شو الي مخلنج ترفضينه..


وداد: ما تعرفون .. ولا في عمركم بتحسووون..


سعيد: انزين خبرينا.. ؟؟ شو الموضوع..


وداد: بس بشرط محد يعرف عن الموضوع غيركم,... لني حاسه بخنقه ما اقدر اني اكتم في نفسي اكثر من جيه


هند: ارمسي.. طلعي الي في خاطرج


وداد: اتعرفون مريم بنت خالته.. ؟


هند: هي بلاها..


وداد: اتحيدون من كم سنه ... يوم طاحت في المستشفى انها حاولت تنتحر؟


هند: هي احيد السالفه.. يوم كان مقرر انه سلطان يخطبج.. بس انتي على اخر لحظه هونتي..


وداد: هذا هو السبب.. مريم اعترفت لي انها اتحب سلطان.. وانها حاولت تنتحر يوم انها سمعت انه بيخطبني.. وخلتني اوعدها اني ما اخذ سلطان وانساه.. وعشان جيه من يومها وانا اصد سلطان


سعيد: شووووووو.. انتي خبله ولا شو.. اشعليج منها...


وداد: سعيد.. شو اشعلي منها.. تباني اكون سبب في موتها


سعيد: لا مب انتي ولا سلطان السبب.. السبب قلة عقلها.. غبائها.. ياهل.. هاي يوم بغت تنتحر كم كان عمرها.. 18 سنه.. يعني مراهقة..


وداد..: حتى لو.. هي اتحبه..


سعيد: شو اتحبه ما اتحبه.. وانتي بكيفج توعدينها.. ليش قلبج لهالدرجه طيب.. تحرمين قلبج من الحب الي نمى فيه من صغرج وتهدمينه بلحظه عشان خاطر بنت شرات هاي.. ياااااااهل.. اسمحي لي اقول لج يا وداد انتي الياهل مب هي..


وداد: بس مابا اكون سبب في ضررها..


سعيد: اقول انا ساير ارقد.. ماشي فايده من اني ارمسج.. اول مره احس بج ياهل يا وداد..


طلع سعيد والقهر متملك قلبه.. كيف تتنازل عن حبها لطيش مراهقة.. لييييييش؟


هند: لا تزعلين من سعيد.. تدرين فيه اشكثر يحب سلطان.. وحلم حياته انه يصير نسيبه.. خصوصا انج اتحبين سلطان بعد


وداد: هند.. انتي لو مكاني شو بتسوين؟


هند: الصراحه.. بسوي الي سويتيه.. ولو انه تصرف جنوني.. بس هالي اقدر عليه.. ما يهون علي وحده تتضرر بسببي.. بحس بتأنيب الضمير..


وداد والدموع تذرف من عيونها: افهميني يا هند.. والله اني تعبانه.. يوم عن يوم يزداد تعبي.. لاني قادره اوافق على انسان غير سلطان.. ولا قادره اوافق على سلطان.. شو اسوي.. فهميني..


هند: الله يهديها بس.. وسلطان شو رايه فيها؟


وداد: ما يحس بحبها رغم محاولاتها.. يعتبرها شرات اخته لفارق العمر من بينهم


هند: وهي لازم تضحي بحبها عشان سلطان.. لو صدق اتحب سلطان.. جان ما سوت الي سوته وحرمت سلطان منج..


دخلت عليهم غزلان وقطعت كلامهم.. : السلام عليكم.. بل.. شوفيكم سكتوا.. يعني ما تبوني اسمع رمستكم؟؟


وداد: لا بالعكس.. تعالي قعدي ويانا يا احلى غزاله في البيت,..


غزلان: ههههه.. وناسه.. لو سعيد ولا هدووف هني وسمعوج.. جان قطعوني..


هند: هههههه ما يحق لهم.. ما عندنا غير غزاله وحده..


غزلان: توني سمعت ابوي يقول انه بيجدم موعد التذاكر على اساس نرجع السبت


هند: احسن.. لأني بصراحه مليت.. ولاعت جبدي من قعده هني.. ابا ارد البلاد


وداد: انا بعد الصراحه.. وخصوصا يوم هادف مب ويانا الواحد ما يقدر يستانس..


غزلان: وانا اشتقت حق حصوووونه ربيعتي.. فديتها والله


وداد: هاج التليفون ودقي لها شو تتريين..


غزلان..: هي والله.. بس اخاف تكون راقده


وداد: لا ان شاء الله .. تدرين في البلاد الكل يسهر لوقت متأخر واحين يادوب الساعه 11 في البلاد


غزلان: هاتي .. بتصل. وبخليهم يوعونها.. ما يخصني انا مشتاقه لها الجلبه..


اتصلت غزلان .. ورد عليها عبيد.. ولد اخو حصه..


عبيد: الووو


غزلان: عبيداااااان.. حبيبي.. اشحالك؟؟


عبيد: اوه.. غزوله.. انتي اثحالث.. وينث؟


غزلان: انا في المانيا حبيبي.. بخير.. انت اشحالك؟


عبيد: بخير.. تعالي عندنا ابا اثوفث.. انا وااااااايد احبث..


غزلان: وانا بعد.. وين حصوووو؟


عبيد: حثوو.. تتطالع تلفثيون..


غزلان: ابيييييه احين بتضربك.. لازم اتقول عمووو ..


عبيد: مب كيفها..


حصه: شو فيك.. اتكلم منو انت؟


عبيد: اكلم حبيبتي.. ما يخثج..


حصه: هات.. (ضربته على راسه وسحبت عنه السماعه).. الووو


غزلان: حصووووووونه حبيبتي..


حصه: هيييييييييييييييه.. ما اصدق.. غزلانووووووو.. اشحالج فديتج انا


غزلان: تمام.. وانتي اشحالج.. وحشتيني يالحماره..


حصه: عيل انا شو اقول ملاااااااااانه هني من غيرج.... تعالي بسج قعده هناك ما اشتقتي لي؟


غزلان: اففف وايد اشتقت لقعداتنا وسوالفنا..


حصه: فديييتج وانا بعد.. بسكم تعالو هني..وايد سوالف عندي ابا اخبرج عنها..


غزلان: وانا بعد والله .. بقولج مغامراتنا..


حصه: اقووووول.. يقولون شفتي روميو هناك؟


غزلان: شووو.. روميو.. ها احيده ماااااات من سنه سكتوا..


حصه: لا لا لا.. روميو اماراتي..


غزلان: الله يخس ابليسج.. تقصدين الله يذكره بالشر


حصه: خييييييبه قويه في حق اخوي الصراحه..


غزلان: وعععع.. كرهت عيشتي وطلعتي وكل شي فيني من شفته


حصه: اصلا تتمنين اتشوفين شراته


غزلان: اخبرج.. يلا باي.. خسرتيني.. اتصلت اسمع اخبارج مب اخباره


حصه: ههههههه فديتج والله .. لا خلاص كله ولازعلج.. اصلا هو الفير بيوصل.. راد البلاد عندنا خلاص.. خذي راحتج هناك


غزلان: ونحن بعد احتمال نرجع على يوم السبت


حصه: حلفي.. اللللللللللللله ونااااااسه


غزلان: والله ملينا من القعده هني


حصه: وشخبار هندوو؟


غزلان: الحمد لله.. المهم يلا ما بطول عليج.. برد البلاد.. اخبرج سويتي الي قلت لج عليه؟


حصه: افا عليج انتي بس..


غزلان: جيه اباج.. شاطره يلا سلمي على خالوو... وعلى عبيدان حبيبي..


حصه: تعالي حشرني كل يوم يسأل عنج.. اونه شاري لعبه يديده يبا يلعبها وياج


غزلان: ههه.. فديته.. شريت له العاب من هني بعد..


حصه: تسلم ايدج.. يلا مع السلامه


بندت غزلان عن حصووو .. ومسكتها وداد من جتفها..


غزلان: بسم الله .. خرعتيني؟؟


وداد: شو الي طالبته منها؟وتتخبرين اذا سوته ولا لا؟


غزلان: ماشي.. قلت لها تاخذ نوته وتكتب فيه كل يوم مع التاريخ من يوم ما سافرت لليوم الي برد فيه السوالف الي تستوي..


وداد: خييييييبه وكاله انباء انتي..


غزلان: لازم .. عشان ما اكون مثل البهيمه ما اعرف شي..


وداد: لا زين زين ماشاء الله الإخت أم هلال..


هند: ههههههه .. وحليلج يا غزلان..


..


بيت ثابت


عادل: امووور.. مادري ليش هالبنت جذبتني بهالطريقه.. مع انها اصغر عني..


أميره وهي مب منتبهه لكلامه واتبدل في القنوات..


عادل: حوووووو.. اكلمج انا.. خلي عنج الريموت شوي..


أميره: هههههه.. سوري والله بس كنت مندمجه شوي. شو قلت


عادل: البنت الي قلت لج عنها.. وايد تطري لى بالي..


أميره: ابييييييييي.. عدووووول والله وقمت اتحب..


عادل: شو احب الله يهداج.. فسرتيها على حب..


أميره عيل شو تفسيرها يا فيلسوف.. ترا ماشي غيرها بنت شفتها وللحين كله اتفكر فيها


عادل: يمكن اعجاب.. مب حب..


أميره: ترا الإعجاب يتحول إلى حب..


عادل: يجوز..


ام عادل: عادل.. أميره.. انا سايره ارقد تامروني بشي؟


عادل نش من مكانه وباس راسها: فديتج يامي مابا غير سلامتج..


ام عادل: فديتك يمي.. ان شاء الله اتبوس الكعبه..


اميره وهي تركض اتدز عادل بعيد عن امها: خوز انت بس اتبوسها انا لازم احضنها وابوس هالخدود الحلوه وهالراس..


ام عادل: فديتج والله


ام عادل.. توفى زوجها يوم كانت اميره صغيره.. ومن يومها كرست حياتها لتربيه عيالها.. رغم انها مب كبيره في السن وايد .. عمرها 41 سنه.. رفضت كل من تقدم لها .. لأنها بغت تتفرغ لعادل وأميره .. فكانت لهم الأب والأم والإخت والأخ.. حبهم لأمهم يفوق أي احساس ثاني.. امهم تشتغل مديره في إحدى المدارس.. الكل يحبها .. لحنانها وطيبتها..


اميره: ربي يخليج لنا يا امي..


ام عادل: ولا يحرمني من عيال مثلكم..


اميره: امي... ترا ولدج عاشق..


ام عادل: هههه.. فديته ولدي والله كبرت.. وقمت اتحب وتعشق.. منو هي يمي.. خبرني عنها.. ودي اشوفك معرس والله


عادل: خيييييييبه.. معرس وعاشق مره وحده.. ماعليج من هالجذابه لا عاشق ولا شي


اميره: افا اتخش عن امي.. خل عنك.. انا بقولها.. نحن مب متعودين انخش شي عنها


ام عادل: عيل انا اليوم بسهر وياكم.. ماشي رقاد..


اميره: امي.. ولدج شاف وحده وعيبته ومن يومها مب قادر يشيلها من باله..


ام عادل: من هاي؟؟ اعرفها؟


عادل: ماعرف شي عنها.. بس انا اعرف ريل اختها كان استاذي في الجامعه.. والبنت عيبتني حسيتها صح صغيره بس محترمه ومؤدبه


ام عادل: اشكثر صغيره يعني؟


عادل: جيه امبين عليها في الثانويه..


اميره: امي.. لا تكون وحده من البنات الي عندج في المدرسه..


ام عادل: يجووز.. عطني اسمها وانا بشوف؟


عادل: ماعرف والله


اميره: مايبالها شي.. اتخبر عن اسم ابوها اقل شي.. وامي بتروم اظهر اسمها..


عادل: مادري بشوف.. بتخبر..


امير: الللللللله وناسه.. اخيرا


عادل: اخيرا شو؟


اميره: بتعرس.. وبلبس فستان وبكشخ..


ام عادل: والله لو بنت زينه واهلها ناس زينين.. ليش لا يا عادل... فرحتك تراها فرحتي..


عادل: ههههههه.. مستعيلين وايد..


نهاية الجزء الثاني

وبإنتظار ردودكم