العواف يا بلابل

إزيكوا

أنا عارف زى ما أنتو عارفين .. دا مكان عذب الكلام .. مع إن الكلام العربى بالذات عذب ولو كان مستعمل فى الهجو والغضب . عشان عذوبته من حكمة ربنا ممزوجه بداخله ..

قلت دا مكان لعذب الكلام وجت التسميه عشان تفتح قوسين أو هلالين وتحط بينهما الشعر والخواطر لانه النوعين دول من الانشاء التعبيرى أقرب للبتاع العذب .

بس الركن دا وهو بالشكل دا ما حددشى أى لغه مستعمل يعنى ساب البتاع مفتوح على كل اللغات وكل الالسان ودا ذكاء إداره مشكوره عليه .

نهايتوا وطالما العذب مفتوح ويستوعب كل اللهجات .. أنا من النهارده حأنزل البتاع العذبى المعذوب باللهجة إياها

وعشان أوفر الوقت أخش فى المزمع نشره وحشره هنا .

الملحن الاستاذ ( رأفت هشاشه ) وضع لحن قوى جدا حيكسر الدنيا على نفوخ المستمعين
للاغنيه العاطفيه اللى بتهر مشاعرمن كل حته وهى من كلمات الشاعر الغنائى الكبير ( شعراوى فش ) اللى كتب مقدمة اغلب المسلاسلات التجاريه والاسبوع الجاى إن شاء الله وبتوفيق من ربنا حيسجلها المطرب السمكرى ( حكمت قمر ) ويضمها لالبومه القديم ( ماسك جناح الهوى ) ويعيد طرحه فى الاسواق ودى مرشحه للتوب وحتعمل نقله نوعيه إنفراديه للاغنيه العربيه دا اللى نطق بيه بق المدير التجارى لشركة ( إديلو ) للموسيقا والطرب فى المؤتمر الصحفى فى قاعة ( ستيروا لاند ) باليونان ووقع فى إذنى اليسرى من زميل صحفى مهتم بأخبار الفن البايز .

واللى مطلعها يقول


يا هند بنت جلال

يا ضنا عزه عبدالعال

أنتى وقعتى فى حبى

وألا سابحه فى الخيال

وأش أش أش

بكره حنبنى عش

زى طرين حلوين

انا وانتى بس إثنين

وش يبص على وش

ونعش فى أسعد حال

ردى وبلاش عبط

وسيبى قلبك يتكلم

وشيلى الكسوف اللى هبط

من ع وشك المتبلم

يالا عايز اسمعها منا

عذبه زى ماء الجنه

ويقول احبك احبك

وانا مخلوق لحبك

ما أقدر أستغنى عنا

فى لحظه دا يبقى محال

ليه لسه ساكته يا هوهو

دا الحب سكه عفيفه

ناس كثيره لما عاشوه

عاشوا حياة شريفه

وخاليه من الهموم

وحلوه يوم ورا يوم

شكا بيكا ومزيكا

ردى ربى يهديك

محروم حتى من النوم

يا جاتك ايه بلا هل الاستهبال


وبس

وسلامتكم وسلامتهم وسلامة فاطمة

ع.ع