تحية بأريج المحبة وبعد..
لا بد أن الجميع قد قرأ قصيدة
"السفينة" للشاعر الكبير
"حامد زيد" المتألق دوما
فعلى إثرها نظمت هذه القصيدة
وعلى نفس القافية والوزن
فآمل أن تجد لها طريقا إلى
قلوبكم الطيبة وأن تحظى
بإعجابكم..
خالص الود والتقدير..

مع نجوم الليل حلت
ذكريات أم حزينة
تشتكي صدمة ضناها
بالقدر يومه كفانا
يوم أقول أمي دخيلك
هاك قلبي لملمينه
ما بقى فيني شعور
ولا بقت فيني رزانه
جيت أبشكي حالتي
والمرء له والدينه
وجاتني بأطيب دموع
ما رضيت إلها مهانه
جاتني وبطيب قلب
"هاك قلب عذبينه"
ولا أشوف الدمع يجري
في حنى ذيك المحانه
بعد ما ذلك وهانك
جيتي أنتي تشكرينه
وبعد ما نزل مكانك
جيتي له بأكبر مكانه
أعرف إن قلبك طييب
ما به حقد ولا ضغينه
وأعرفك مهما فعل بك
تقتلي روحك عشانه
بس يا "ليلى" تحلي
بالصبر لا تذكرينه
إنطري وشوفي زمانك
كيف يفرق عن زمانه
كيف يقول إنه يحبك
ويترك القلب ويهينه
وكيف يقول إنه صفالك
مثل ما يصفي لخوانه
ما أظن إنه بيلقى مثل
حبك في سنينه
وإن لقى إشلون يحفظ
قدر من حبه وصانه
كنتي لأسراره بلاد
وكنتي لأفكاره مدينه
والشعر لجله نظمتي
والجفا شيد كيانه
ما بقى إلا تبوسي
إيديه وتقبلي جبينه
أو تقولي له دخيلك
لا تخليني جبانه
إنتي يا"ليلى" جواهر
وإنتي بأخلاقك ثمينه
هذا مو قولي ذا قوله
يوم ذاك القول زانه
ما أنتي أول شخص يبعد
عن غلا روحه وضنينه
ولا هو أول شخص
قفى ثم جرحنا ونسانا
البشر وايد وإذا ودك
يثورون إتركينه
والعمر يمضي وإنتي
ذا العمر بيدك أمانه
خابرك إنتي صدوقة
قول وأفعالك أمينه
ليه قلبك صعب يرحل
بعد ما ذلك وهانه
كم جرح فيك المودة
وما رضيتي تجرحينه
لين ما شدد عليك
الجرح واستقوى وشانه
كم هداك الهم وإنتي
عايشه بوده وحنينه
لين ما كفت حروفك
وإعرفت طعم الإهانه
وش بقى أكثر تذوقي
ووش بقى لك تنطرينه
إتركي وده كفاية
ولا تسميها خيانه
الخيانة إنك تحبي إنسان
إلا وتعشقينه
ويتركك وسط الجروح
اللي يسومها ميانه

تحياتي:
أختكم/ صوت الشمال
"لا إله إلا الله وحده لا شريك له
له الملك وله الحمد وهو على
كل شئ قدير"