تويت
احيان تذرف دمعة تجرح العين
دمعة تعاندني وانا اعرف سببها
ان جيت باخر الدمع تنحسب دين
وان طعت دمع العين حرق هدبها
لو جيت بشرح وضعها قلت بعدين
وان جيت ابينها فصمتي غلبها
مدري على وقت مضى قاسي وشين
والا على دار شكت من عربها
مدري من اقصى الناس والا قريبين
والا على شان الحياه وتعبها
مدري دموعي سبت البعد والبين
والا لجل عيني تصعب طلبها
مدري من الي توهم مستجدين
يطمح طموح وخطوته ماحسبها
مدري دموعي من فراق المحبين
اللي خذاهم خالق قد وهبها
يمكن عرفت السر لاعاد تبكين
وماقدره ربي لعيني كتبها
ماكل مخلوق له السر تبدين
ولا كل من يدري يخلص نشبها
ياليت تبقى دمعتي داخل العين
ولا يشمت الي ماعرف وش سببها